2027: Kwankwaso Ya Yi Maganar Makomar Tallafin Fetur a Gwamnatin Peter Obi

1. Rabiu Kwankwaso ya ce jam’iyyar NDC na iya dawo da tallafin man fetur idan ta lashe zaɓen shugaban kasa
2. Ya ce cire tallafin ya jefa ’yan Najeriya cikin matsin tattalin arziki, kuma har yanzu ba su gama farfadowa ba
3. Idan sun shiga ofis, ya nuna jam’iyyarsu za ta dauki matakan da suka dace domin su saukaka wa ’yan Najeriya

M Malumfashi ya shafe shekaru 10 yana kawo labaran Hausa musamman na siyasa, addini, tarihi, wasanni da al’ada

Abuja - Rabiu Musa Kwankwaso mai takarar mataimakin shugaban kasa a NDC ya yi zancen yiwuwar maido tallafin fetur.

'Dan takarar mataimakin shugaban kasar ya ce jam’iyyar za ta dauki duk matakan da suka dace domin a rage farashin mai.

An yi hira da Rabiu Musa Kwankwaso

Rabiu Musa Kwankwaso ya yi maganar dawo da tallafin man fetur idan jam’iyyar ta lashe zabe ne a hirar shi da Channels.

Kara karanta wannan

Kwankwaso ya sake maganganu kan Atiku, ya tono tsohon tarihi

A ranar Alhamis aka yi wata hira da aka yi da shi a shirin siyasa na Politics Today domin jin inda jam’iyyarsu ta sa gaba.

Tattanawar ta tabo zancen alakarsa da Atiku Abubakar, hadaka, siyasa da sauran sha'anin mulki.

Ana cikin radadin janye tallafin man fetur

A ranar 29 ga Mayun 2023 ne Shugaba Bola Tinubu ya sanar da cire tallafin man fetur a lokacin rantsar da shi kan mulki.

Tun bayan nan litar fetur ya yi ta tashi daga kimanin N200 zuwa kusan N1, 500 a halin yanzu.

Rabiu Kwankwaso ya ce har yanzu ’yan Najeriya ba su farfado daga matsin tattalin arzikin da cire tallafin man ya haifar ba.

Kamar Peter Obi, ya nuna yaki da cin hanci da rashawa a bangaren man fetur na iya taimakawa wajen magance wannan matsala.

Ya ce:

“Mun ga illar cire tallafin tun daga ranar farko har zuwa yau. Ina ganin har yanzu babu wanda ya farfado daga girgizar tattalin arzikin da cire tallafin ya haifar.”

Kara karanta wannan

2027: Dattijon Arewa da ya yi siyasa da Sardauna ya yi maganganu kan Tinubu

Matsayar NDC a kan tallafin man fetur

Tsohon gwamnan ya ce shugabannin NDC sun sha zama domin tattauna matsalolin kasar da yadda za a magance su idan an ci zabe.

Sun kuma duba abubuwan da suka faru a lokacin Peter Obi a Anambra da nasa mulkin a Kano, tare da na jagoransu, Seriake Dickson.

The Cable ta bibiyi hirar, ta rahoto Kwankwaso ya ce jam’iyyar za ta yi duk abin da za ta iya domin saukaka wa talakawa rayuwa.

Madugun na Kwankwasiyya ya kara da cewa halin rayuwa a Najeriya ya yi tsanani matuka.

'Dan takaran mataimakin shugaban kasar ya ce matsayinsu na bai-daya shi ne cewa farashin makamashi ya yi tsada sosai.

“Za mu yi duk abin da ya dace domin rage farashin man fetur a kasar nan. Hakan ya hada da duk matakan da za mu iya dauka, har da dawo da tallafin,”

- Rabiu Kwankwaso

Mace tana takarar shugaban kasa a NRM

Kara karanta wannan

Gwamnatin Tinubu ta kare farashin mai, ta magantu kan yiwuwar dawo da tallafi

Rahoton nan cewa yake yi Dr. Esther Okereke ta ce maza sun gaza a Najeriya don haka lokaci ya yi da za a ba mace damar yin mulki.

‘Yar takarar shugaban kasar kuma tsohuwar 'yar wasan fim ta ce wutar lantarki da tsaro su ne gaba na idan ta shiga fadar Aso Rock.

Tsohuwar jarumar ta ce ba wai ta na neman kujera don jinsinta ba ne, talakawa ta sa a gaba don haka ta ke neman jama'a su zabe ta.

Asali: Legit.ng