Kabir Masari: Yadda Wani Dan Arewa Ya Zama Dan Gaban Goshin Tinubu
- Mai ba Shugaban Ƙasa Bola Ahmed Tinubu shawara kan harkokin siyasa, Alhaji Ibrahim Kabir Masari, ya zama ɗaya daga cikin ’yan siyasar da ke da tasiri a harkokin siyasa
- Daga matsayin wanda aka saka a matsayin ɗan takarar mataimakin shugaban ƙasa na wucin gadi a 2022, Masari ya ƙara samun tasiri a cikin harkokin siyasa da suka shafi Tinubu
- Wasu majiyoyi sun ce Masari ya zama ɗaya daga cikin mutanen da suka fi kusanci da Shugaba Tinubu a siyasar Arewa, yayin da tasirinsa ke ƙara bayyana ana shirin 2027
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.
FCT, Abuja – Mai ba Shugaban Ƙasa Bola Ahmed Tinubu shawara kan harkokin siyasa, Alhaji Ibrahim Kabir Masari, ya zama ɗaya daga cikin manyan ’yan siyasar da tasirinsu ke ƙara bayyana a siyasar Najeriya.
Masari ya fara samun babban matsayi a idon jama’a ne bayan da aka sanya sunansa a matsayin ɗan takarar mataimakin shugaban ƙasa na wucin gadi ga Tinubu kafin zaɓen 2023, kafin daga bisani aka maye gurbinsa da Kashim Shettima.
Source: Facebook
Na gaban goshin Tinubu a Arewa
Daily Trust ta rahoto cewa bayan nasarar Tinubu a zaɓen 2023, an naɗa Masari a matsayin mataimaki na musamman kan Harkokin Siyasa, sannan bayan shekara uku aka ƙara masa matsayi zuwa Mai Ba Shugaban Ƙasa Shawara kan Harkokin Siyasa.
Rahotanni sun nuna cewa wannan matsayi ya ƙara ba shi damar shiga harkokin siyasa da suka shafi shugaban ƙasa da jam’iyyar APC.
Kafin tasirin Masari ya ƙaru, wasu ’yan siyasa irin su Sanata Abu Ibrahim sun kasance cikin mutanen da suka daɗe suna da kusanci da Tinubu.
Tinubu da Abu Ibrahim sun san juna tun lokacin da suka kasance sanatoci a shekarar 1992, yayin da wasu tsofaffin gwamnoni irin su George Akume, Joshua Dariye da Ali Modu Sheriff su ma suka kasance cikin mutanen da ke da kusanci da shugaban ƙasa.
Sai dai majiyoyi sun bayyana cewa Kabir Masari ya zama sabon jigon siyasar Tinubu a Arewa.
Ana kiran Masari da ‘Wazirin Tinubu’
A wani taro na baya-bayan nan, Shugaba Tinubu ya kira Masari da “Waziri”, lamarin da ya ja hankalin shugabannin siyasa da dama a Arewa.
A al’adar Hausawa, Waziri matsayi ne da ake danganta shi da babban mai gudanar da harkokin masarauta, wanda yake kusa da sarki wajen tafiyar da mulki.
Kiran Masari da wannan suna ya haifar da ƙarin maganganu kan matsayin da yake da shi a wajen shugaban ƙasa, inda wasu suka fara kiran shi da “Wazirin Tinubu”.
Wata majiya da ta yi imanin cewa Masari na da cikakken goyon bayan shugaban ƙasa ta ce duk lokacin da ya je wani taron siyasa, gwamnoni, ministoci da manyan jami’an gwamnati kan kasance cikin waɗanda ke tare da shi.
Majiyar ta ce Masari kan yi zirga-zirga tare da ayarin motoci masu yawa, ciki har da motocin wasu manyan jami’an gwamnati.
An maganganu kan irin tasirinsa
Wani rahoto ya nuna cewa ana ta maganganu a tsakanin wasu shugabannin siyasa a Arewa cewa Masari na daga cikin mutanen da ake tuntuba wajen neman taimako daga Shugaba Tinubu.
Wata majiya ta ce wani gwamna daga Arewa maso Yamma ya taɓa bayyana wa wani babban ɗan siyasa cewa ya dace su yi aiki tare da Masari domin a samu zaman lafiya a siyasar yankin.
Sai dai waɗannan bayanai sun fito ne daga majiyoyin da ba a bayyana sunayensu ba.
A wani ziyara da Masari ya kai jiharsa ta Katsina, an ce ya yi amfani da jirgin sama mai saukar ungulu wajen zirga-zirga tare da wasu makusantansa, lamarin da ya jawo ce-ce-ku-ce a jihar.
Tafiyar Masari a cikin APC
Tasirinsa a cikin APC ya fara bayyana ne tun lokacin da ya shiga cikin tsarin shugabancin jam’iyyar na ƙasa.
Masari ya taɓa zama Sakataren Jinƙai na Ƙasa a lokacin Adams Oshiomhole na shugabancin APC, inda ya samu damar kusantar tsarin tafiyar da jam’iyyar tare da gina alaƙa da gwamnoni da ’yan majalisa.
Wannan ƙwarewa ta ba shi damar zama ɗaya daga cikin masu tsara harkokin siyasa a jam’iyyar.
Dangantakarsa da Tinubu ta ƙara bayyana musamman a lokacin shirye-shiryen zaɓen shugaban ƙasa na 2023.
Ahmad Mohammad na Democratic Sustainability Forum ya ce tasirin Masari ya fi karkata ne kan tsara harkokin siyasa, kusanci da shugabannin ƙasa da kuma haɗa kan masu ruwa da tsaki.
Ya ce Masari ya ƙara bayyana a harkokin da ke tallata ajandar siyasar Tinubu da Gwamnan Katsina, Dikko Radda, tare da tuntubar ƙungiyoyi daban-daban a jihohin Arewa.
Source: Facebook
Tasirin masari gabanin 2027
Yayin da ake fara shirye-shiryen zaɓen 2027, Masari ya shiga cikin harkokin haɗa shugabannin siyasa da ƙungiyoyi daban-daban a Arewa.
A farkon watan nan, ya tara malaman addinin Musulunci da shugabannin addini 500 daga jihohin Arewa 19 da Abuja a Katsina.
Bayan taron, an bayyana cewa mahalarta sun nuna goyon baya ga neman Shugaba Tinubu ya sake tsayawa takara a 2027, tare da bayyana wasu matakan da suka ce gwamnatin ta ɗauka kan tsaro, abubuwan more rayuwa da tattalin arziki.
Gwamnonin Jigawa, Umar Namadi; Kano, Abba Yusuf; Yobe, Mai Mala Buni; Sokoto, Ahmad Aliyu da Kaduna, Uba Sani na daga cikin waɗanda suka halarci taron.
APC ta caccaki Wike
A wani labarin, kun ji cewa shugaban APC na Jihar Bayelsa, ya yi watsi da tasirin “Rainbow Coalition” a jihar, yana mai cewa jam’iyyar na da tsarin da zai ba ta damar neman goyon bayan Shugaba Bola Tinubu.
Warman Ogoriba ya ce APC ta kasance cikin haɗin kai kuma tana da tushe a matakin ƙasa, tare da tsarin jam’iyya a dukkan ƙananan hukumomi takwas da mazabu na siyasa na Jihar Bayelsa.
Ya ce APC ba za ta bari ƙawancen siyasa da ke wajen tsarin jam’iyyar ya ɗauke mata hankali ba, tana mai cewa za ta ci gaba da faɗaɗa yawan mambobinta.
Asali: Legit.ng
