Tsohon Gwamna Ya Fadi Abin da Zai Hana Peter Obi Lashe Zaben Shugaban Kasa

• Ayodele Fayose ya ayyana Peter Obi a matsayin mutumin kwarai, amma ya ce ba shi da damar samun nasara a 2027
• Tsohon gwamnan ya bayyana cewa rabuwar kan 'yan hamayya a matsayin babban abin da zai kashe jam’iyyar NDC
• Fayose ya ce sai idan jam'iyyun hamayya sun hade waje guda za su iya kayar da APC mai mulki kuma yanzu sun makara

M Malumfashi ya shafe shekaru 10 yana kawo labaran Hausa musamman na siyasa, addini, tarihi, wasanni da al’ada

Abuja - Ayodele Peter Fayose wanda ya yi mulki sau biyu a Ekiti ya ce Peter Obi ya barar da damarsa ta cin zaben 2027.

Tsohon gwamnan na jihar Ekiti yana ganin yiwuwar nasarar Peter Obi ta ragu tunda ya sauya-sheka zuwa jam’iyyar NDC daga ADC.

Ayo Fayose ya yi maganar zaben 2027

A yammacin ranar Talata Ayo Fayose ya yi wannan bayani da aka yi hira da shi a wani shirin na siyasa a gidan talabijin na TVC.

Kara karanta wannan

Duk da shan wahala a zaɓen Osun, Davido ya faɗi yadda Tinubu zai yi nasara a 2027

Da yake nazarin yadda zaben 2027 zai kasance, Fayose ya nuna kuskuren ‘yan adawar da suka fice daga cikin hadakar ADC.

‘Dan siyasar yake cewa da jagororin hamayyar sun yi zamansu a wuri guda, da sun fi samun damar kifar da Bola Tinubu a 2027.

Ya ce:

“Lokacin da dukkansu suke ADC, zan iya fada wa kowa cewa haduwarsu za ta yi dasiri.

Ranar da Obi ya bar jam’iyyar ADC zuwa NDC, a ranar ya sha kasa.”

Peter Obi ya sha yabon tsohon gwamnan Ekiti

Duk da haka, jaridar Punch da ta bibiyi hirar ta ce Fayose ya bayyana Obi a matsayin nagartaccen mutum da ya bar tarihi.

Tsohon jigon na PDP yake cewa ‘dan takaran na shugaban kasa a zaben 2023 ya nuna cewa za a iya gyara abubuwa a kasar.

Babban kalubalen da ya ce ‘yan adawa za su fuskanta shi ne kin hada-kai sun tunkari APC mai rike da mulki tun a 2015.

Kara karanta wannan

Gwamnan Osun ya yi wuf ya karyata ADC da ta ce sun hada kai a doke APC

"Amma idan ‘yan adawa suka ki hada-kai, za su cigaba da shan kasa.

"Yanzu an makara sosai. INEC ta tantance kowa. Ko mutum ya ce ya janye, ya rage na shi.

"Dole a tsoma kafa a shiga ruwa. Ba za a iya fita ba. Tuni an riga an jike."

- Ayo Fayose

Ayo Fayose ya ba Bola Tinubu nasara

Da ake zancen takarar Bola Tinubu kuwa, Fayose ya yi wufe ya ce shugaban kasar zai zarce domin yana da goyon bayan jama’ansa.

Hasashen Mista Fayose ya ba Tinubu kuri’u miliyan hudu daga Kudu maso yamma da yake la’akari da abin da ya faru a zaben 2023.

'Dan Ganduje ya bar jam'iyyar NDC

Rahoton nan ya ce alakar ‘dan Abdullahi Ganduje da Rabiu Kwankwaso ta kare bayan kwanaki kimanin 80 kacal a jam’iyyar NDC.

A ranar Lahadin nan, Abdulaziz Abdullahi Umar Ganduje ya koma APC da ya yi murabus daga NDC a karamar hukumar Dawakin Tofa.

Kara karanta wannan

Abin da ADC ta yi da ya taimaka wajen kayar da jam'iyyar APC a zaben gwamnan Osun

Shugabannin mazabarsa ta Gandje sun karbe shi kuma an ba shi katin zama 'dan jam'iyyar APC da mahaifinsa ya taba shugabanta.

Asali: Legit.ng