'Yan Bindiga Sun Tattara Manoma kusan 50 zuwa Daji, Sun Nemi Makudan Kudin Fansa

• Ana zargin ’yan bindiga da sace manoma da wasu ma’aikatan gona a Mariga, yayin da shugaban ƙaramar hukumar ya ce adadin waɗanda aka sace ya kai 47
• Shugaban ƙaramar hukumar ya ce masu garkuwa sun tuntubi wasu ’yan uwan waɗanda aka sace, inda suka nemi N2m a matsayin kuɗin fansa kan kowane mutum
• ’Yan sandan Niger sun tabbatar da sace sama da mutane 20 a yankin, lamarin da ya haifar da bambanci kan adadin waɗanda aka yi garkuwa da su

​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Neja - Ana zargin ’yan bindiga da yin garkuwa da manoma da dama a wasu hare-hare daban-daban a ƙaramar hukumar Mariga ta Jihar Niger.

Shugaban ƙaramar hukumar, Alhaji Aliyu Bagga Muhamadu, ya ce adadin mutanen da aka sace ya kai 47, yana mai cewa masu garkuwar na neman N2m kan kowane mutum kafin su sake su.

Kara karanta wannan

'Yan sanda sun cafke kwamishina da wasu mutane 4 kan kashe darakta

Rahoton tashar Channels tv ya ce an sace mutanen ne yayin da suke girbin gyada a Tungan Rimi, da ke Ma’undu-Beri Ward na ƙaramar hukumar Mariga.

Lamarin ya faru ne da yammacin ranar Asabar, inda maharan suka kuma tafi da wasu maza da ke aiki a gonaki da ke kusa.

An ce wata mata ta haihu a hannun masu garkuwa

Shugaban ƙaramar hukumar Mariga ya tabbatar da lamarin yayin wata tattaunawa ta waya, inda ya ce rahotannin da ke zuwa gare shi sun nuna cewa ɗaya daga cikin matan da aka sace ta haihu yayin da take hannun masu garkuwa.

A cewarsa, masu garkuwar sun tuntubi wasu ’yan uwan waɗanda aka sace, inda suka buƙaci a biya N2m ga kowane mutum kafin su sake su.

Ya ƙara da cewa an tattara jami’an tsaro tare da ’yan sa-kai domin ƙoƙarin ceto mutanen.

An yi arangama da ’yan bindiga

Kara karanta wannan

An shiga tashin hankali da sabon rikici ya barke a Taraba, rayuka sun salwanta

Shugaban ƙaramar hukumar ya ce jami’an tsaro da ’yan sa-kai sun yi arangama da waɗanda ake zargin ’yan bindiga ne a kusa da ƙauyen Alibani, bayan sun ratsa ta Kasuwan Garba da Biri. Ya ce yayin arangamar, wani ɗan sa-kai ya samu raunuka.

Ana zargin an kai waɗanda aka sace Bariki Forest Rahotanni sun ce daga bisani maharan sun shiga Dajin Bariki, wanda kuma ake kira Ma’undu, inda ake zargin cewa aka kai mutanen da aka sace.

Wasu ’yan uwan waɗanda abin ya shafa sun ce har yanzu ba su samu damar tattaunawa kai tsaye da ’yan uwansu ba, kuma ba su samu tabbataccen bayani kan inda suke ba.

Sai dai bayanan da suke samu na nuna cewa akwai yiwuwar an kai mutanen cikin Dajin Ma’undu.

’Yan sanda sun ce sama da mutane 20 aka sace

Sai dai Rundunar ’Yan sandan Jihar Niger ta bayar da wani adadi daban, inda ta tabbatar da sace mutane sama da 20 a ƙauyen Mukura da ke yankin Kasuwan-Garba na ƙaramar hukumar Mariga.

Jami’in hulɗa da jama’a na rundunar, SP Wasiu Abiodun, ya ce an kai rahoton lamarin ranar 28 ga Satumba, bayan sace mutanen da misalin ƙarfe 3:00 na yamma ranar 27 ga Satumba.

Kara karanta wannan

'Yan bindiga sun rutsa mutane a zungureren rami, an rasa rayuka da dama

Ya ce jami’an tsaro na haɗin gwiwa suna ci gaba da gudanar da ayyukan ceto domin kuɓutar da waɗanda aka sace.

Bambanci kan adadin waɗanda aka sace

Yayin da shugaban ƙaramar hukumar Mariga ya ce mutane 47 aka sace a lamarin gonakin gyada, bayanin ’yan sanda ya ce sama da mutane 20 ne aka yi garkuwa da su.

Har yanzu ba a iya daidaita wannan bambanci kan adadin waɗanda aka sace ba, yayin da jami’an tsaro ke ci gaba da ƙoƙarin gano inda waɗanda abin ya shafa suke tare da ceto su.

'Yan bindiga sun kashe masu hakar ma'adanai

A wani labarin kuma, kun ji cewa 'yan bindiga sun hallaka akalla mutane biyar masu hakar ma'adanai bayan kai hari a Plateau.

Maharan sun rutsa mutanen ne a wurin haƙar ma’adinai da ke ƙauyen Marit, ƙaramar hukumar Barkin Ladi ta Jihar Plateau.

Asali: Legit.ng