Shehu Sani Ya Bayar da Shawara ga Pantami da Sauran 'Yan Takarar da INEC Ta Cire Sunayensu
- Shehu Sani ya shawarci ’yan takarar da ba a saka sunayensu cikin sabon jerin INEC ba da su guji ɓarnatar da kuɗi da lokaci wajen shigar da ƙara
- Daga cikin waɗanda sunayensu suka ɓace akwai tsohon Ministan Sadarwa, Isah Ali Ibrahim Pantami, da ’yan takarar gwamnan Ogun da Kano
- Kotun Ƙoli ta tabbatar da ingancin wasu sassan Dokar Zaɓe ta 2026 da kuma sabon jadawalin zaɓen 2027 da INEC ta fitar
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Jihar Kaduna - Tsohon Sanatan Kaduna ta Tsakiya, Shehu Sani, ya shawarci ’yan takarar da Hukumar Zaɓe Mai Zaman Kanta ta Ƙasa (INEC) ta cire sunayensu daga jerin ƙarshe na masu neman takara.
Sanata Shehu Sani ya shawarci 'yan takarar da INEC ta cire sunayensu da su guji ɓarnatar da kuɗinsu wajen ƙalubalantar matakin a kotu.
Source: Facebook
Shehu Sani ya bayar da shawarar ne a wani rubutu da ya yi a shafinsa na Facebook ranar Asabar, 10 ga watan Oktoban 2026.
Shawarar tasa ta biyo bayan fitar da sabon jerin sunayen ’yan takarar da za su fafata a zaɓen 2027, wanda ya nuna cewa an cire wasu fitattun ’yan siyasa.
Dalilin matakin INEC
INEC ta fitar da jerin sunayen ne bayan shugaban hukumar, Farfesa Joash Amupitan, ya yi alƙawarin cewa za a duba ƙorafe-ƙorafen jam’iyyun siyasa da ’yan takarar da suka nuna rashin gamsuwa da tasirin hukuncin Kotun Ƙoli kan cancantar tsayawa takara.
A wani taron manema labarai da ya gudanar a Abuja a farkon makon, Amupitan ya ce hukumar ta karɓi kwafin hukuncin kotun da aka tabbatar da sahihancinsa a ranar Talata, kuma tana nazarinsa domin sanin matakin da ya kamata ta ɗauka.
Bayan hukuncin, INEC ta bayyana cewa jam’iyyun siyasa ba za su shiga zaɓen 2027 ba idan suka gabatar da ’yan takarar da sunayensu ba sa cikin rajistar da suka miƙa wa hukumar cikin wa’adin da aka kayyade.
Babu Pantami da wasu fitattun ’yan takara
Daga cikin fitattun mutanen da ba a ga sunayensu a sabon jerin INEC ba akwai tsohon Ministan Sadarwa da Tattalin Arzikin Dijital, Farfesa Isah Ali Ibrahim Pantami, wanda ke neman kujerar gwamnan Jihar Gombe.
Pantami ya kasance ɗan takarar neman tikitin gwamna a APC, amma ya sauya sheƙa zuwa PDP bayan jam’iyyar APC mai mulki a jihar ta zaɓi Jamilu Isyaku Gwamna a matsayin ɗan takararta ta hanyar matsayar bai ɗaya.
Sauran waɗanda ba a saka sunayensu cikin sabon jerin ba sun haɗa da Ladi Adebutu, ɗan takarar gwamnan Ogun na PDP, da Aminu Abdussalam Gwarzo, ɗan takarar gwamnan Kano na jam’iyyar Nigeria Democratic Congress (NDC).
Shehu Sani ya ce yaƙin kotu zai zama ɓata lokaci
Da yake mayar da martani, Shehu Sani ya ce hukuncin Kotun Ƙoli da ya ba INEC damar cire wasu sunayen ’yan takara a bayyane yake.
Ya shawarci waɗanda abin ya shafa da su daina ɓarnatar da kuɗi, lokaci da kuzari wajen yaƙin da yake ganin sun riga sun sha kaye a cikinsa.
Sanatan ya kuma roƙi lauyoyi, musamman manyan lauyoyi masu muƙamin SAN, da su ba ’yan siyasar shawarar da za ta taimaka musu, maimakon ƙarfafa musu gwiwar shigar da sabbin ƙararori.
“Ina kuma roƙon waɗannan lauyoyi da manyan lauyoyi masu muƙamin SAN da su tausaya wa ’yan takarar, su bar su su huta, maimakon su yaudare su wajen kashe ƙarin kuɗi kan shigar da sabbin ƙara.”
“Shekaru huɗu za su zo su wuce; ya kamata su yi shiri domin nan gaba.” In ji shi.
Source: Facebook
Pantami ya magantu kan cire sunansa
A wani labarin kuma, kun ji cewa bangaren Farfesa Isa Ali Pantami ta yi magana bayan rasa sunansa a cikin jerin sunayen masu takara a zaɓen 2027.
Ya buƙaci magoya bayan ɗan takarar da su kwantar da hankalinsu, su kasance masu haƙuri da kyakkyawan fata, yana mai cewa matsalar ta ɗan lokaci ce kuma ba hukunci na ƙarshe ba.
Asali: Legit.ng
