"Ka Shirya Barin Villa"; Melaye Ya Fadi Dabarar ADC Ta Kifar da Tinubu a 2027

• Dino Melaye ya bukaci Shugaba Bola Tinubu da iyalansa su fara tattara kayansu daga Fadar Shugaban Kasa
• Jigon ADC ya ce jam’iyyar za ta kayar da APC a zaben 2027 saboda yadda ’yan Najeriya suka gaji da mulkin Tinubu
• Melaye ya zargi gwamnatin Tinubu da kasa magance matsalolin yunwa, rashin tsaro da sauran kalubalen da ke addabar kasar

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Wani jigon ADC, Dino Melaye, ya bukaci Shugaba Bola Tinubu da iyalansa su fara tattara kayansu daga Fadar Shugaban Kasa, yana mai cewa jam’iyyar za ta kayar da APC a zaben 2027.

Melaye ya ce sakamakon zaben zai nuna yadda ’yan Najeriya ke kara nuna rashin gamsuwa da gwamnatin Tinubu, wadda ya zarga da kasa magance yunwa, rashin tsaro da sauran matsalolin da ke addabar kasar.

Kara karanta wannan

Shugaban APC ya sauka a Kano, ya yi ganawar sirri da Sarki Sanusi II

Tsohon Sanatan kuma lauya ya bayyana hakan ne yayin wata hira da tashar Arise Tv ranar Litinin, 24 ga watan Agustan 2026.

Melaye ya hango nasarar ADC

Melaye ya nuna kwarin gwiwa kan damar da ADC ke da ita na lashe zaben, yana mai cewa dabarar jam’iyyar ta samun nasara abu ne mai sauki saboda ’yan Najeriya sun shirya ganin sauyin gwamnati.

“Dabarar samun nasarar ADC abu ne mai sauki. Jama’a suna tare da mu. Jama’a sun gaji da mummunan shugabanci."

“Sun gaji da karya. Sun gaji da karbar bashi. Sun gaji da kasafin kudi uku a jere da ba a aiwatar da su ba,” in ji Melaye.

Ya yi zargin cewa duk da cewa gwamnati na karbar bashi domin gudanar da kasafin kudinta, akwai kwangiloli da dama da aka bayar amma har yanzu ba a biya kudinsu ba.

“Misali, ka ce ka karbi bashi domin gudanar da kasafin kudi. Ka karbi kudin. Ka samu kudin. Amma ba a aiwatar da kasafin kudin ba."

Kara karanta wannan

Abin da Atiku zai yi don magance rashin tsaro cikin kwana 100 idan ya zama shugaban kasa

“Ba a samar da kudin kasafin ba. Ba a biya kudin kwangilolin da aka bayar a 2024 ba. Har yanzu kana aiwatar da kasafin kudin 2024 a 2026,” in ji shi.

Melaye ya soki Gwamnatin Tinubu

Jigon ADC ya kuma soki gwamnatin Tinubu, yana mai cewa yanzu ’yan Najeriya sun fara tsoron gwamnati maimakon gwamnati ta damu da yadda jama’a za su mayar da martani.

“Amma a gwamnatin Tinubu, mutane suna tsoron gwamnati saboda suna da tsananin karfin hali, suna da mugunta, ba sa damuwa, ba su damu da komai,” in ji shi.

Melaye ya kuma zargi shugaban kasar da yin kalaman da ya ce suna nuna cewa magudin zabe, tashin hankali da kwace akwatunan zabe abubuwa ne da ake iya amincewa da su a siyasa.

Ya ce irin wadannan kalamai ba su dace da shugaban kasa ba, wanda ya kamata ya kasance abin koyi ga matasan Najeriya.

“Kuna da shugaban kasa da ya fito fili ya gaya wa duniya cewa komai daidai ne a siyasa. Magudin zabe ya halatta a siyasa. Tashin hankali ya halatta a siyasa. Kwace akwatin zabe ya halatta a siyasa,” in ji shi.

Kara karanta wannan

"Na tausaya masa": Jigon PDP ya hango matsalar da za ta tunkari Tinubu idan ya yi tazarce

Ya bukaci Tinubu ya shirya barin Villa

Melaye ya yi hasashen cewa sakamakon zaben 2027 zai haifar da sauyin gwamnati, inda ya bukaci shugaban kasa da iyalansa su shirya barin Fadar Shugaban Kasa.

“Kuma ina gaya muku cewa sakamakon zai bayyana a watan Janairu. Shugaban kasa da iyalansa su fara tattara kayansu da sauran abubuwan da suke da su daga Villa, har da wadanda ke bangaren ma’aikata na Villa, saboda za a samu sauyin gwamnati,” in ji shi.

Kungiya ta bukaci a cafke Melaye

A wani labarin kuma, kun ji cewa wata kungiyar siyasa mai suna Asiwaju Bola Ahmed Tinubu 2027 Forum ta bukaci a kama tsohon Sanatan Kogi ta Yamma, Dino Melaye.

Kungiyar ta bukaci gwamnatin tarayya da hukumomin tsaro su gudanar da bincike kan kalaman Melaye, tana gargadin cewa maganar na iya shafar tsaron kasa.

Asali: Legit.ng