Tirkashi: ADC Ta Bankado Makarkashiyar da Ake Kullawa Arewa gabanin Zaben 2027

• Jam’iyyar ADC ta ce ta samu rahotannin wani shiri na saye da karɓar PVC daga wasu ’yan Najeriya a sassan Arewacin ƙasar
• Ta yi zargin cewa wasu mutane masu alaƙa da jam’iyya mai mulki na biyan kuɗi domin karɓar katunan zaɓe daga jama’a
• ADC ta bukaci INEC da hukumomin tsaro su binciki lamarin, yayin da ta shawarci masu katunan zaɓe su ƙi bayar da su tare da kai rahoto

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Jam’iyyar African Democratic Congress (ADC) ta yi gargadi kan wani shiri da ake yi a Arewacin Najeriya gabanin zaben 2027.

Jam'iyyar ADC ta yi gargadi kan rahotannin wani shiri da ta ce ana gudanar da shi domin saye da karɓar katunan zaɓe na dindindin, PVC, daga wasu ’yan ƙasa a sassan Arewacin Najeriya.

Hakan na kunshe ne a cikin wata sanarwa da sakataren yada labarai na kasa na jam'iyyar Bolaji Abdullahi, ya fitar wadda aka sanya a shafin X ranar Alhamis, 17 ga watan Satumban 2026.

Kara karanta wannan

Sarkin Musulmi ya bayar da shawara kan mutanen da za a zaba a 2027

A cewar sanarwar da Bolaji Abdullahi ya fitar, jam'iyyar ADC ta ce ta samu rahotanni da dama kan lamarin.

ADC ta yi zargin ana biyan jama’a kuɗi

Jam’iyyar ADC ta yi zargin cewa wasu mutane da ke aiki da muradun jam’iyya mai mulki suna biyan wasu jama' masu ƙaramin ƙarfi kuɗi domin karɓar katunan PVC ɗinsu.

ADC ta ce tana ɗaukar matakan da suka dace domin tattara rahotannin tare da samo hujjoji masu inganci kan mutanen da ke da hannu wajen gudanar da abin da ta kira shirin.

Sai dai jam’iyyar ce ta yi waɗannan zarge-zarge, kuma bayanan ba su nuna cewa hukumomi sun tabbatar da su ba.

“Ba sayen kuri’a kawai ba be”

ADC ta ce karɓar PVC daga hannun wanda aka ba, ba zai ba wani damar amfani da ita kai tsaye ba, saboda tsarin tantance masu kaɗa ƙuri’a na buƙatar amfani da bayanan yatsu.

Saboda haka, jam’iyyar ta ce tana ganin manufar irin wannan aiki na iya kasancewa hana wasu ’yan ƙasa yin amfani da haƙƙinsu na zaɓe.

Kara karanta wannan

Ko da tsiya tsiya: ADC ta bayyana shirinta kan zaben 2027

ADC ta bayyana hakan a matsayin wani nau’in ƙoƙarin hana jama’a kaɗa ƙuri’a, tana mai cewa hakan na iya shafar haƙƙin tsarin mulkin ’yan Najeriya.

An nemi INEC ta binciki lamarin

Jam’iyyar ta yi kira ga Hukumar Zaɓe Mai Zaman Kanta ta Ƙasa (INEC) da hukumomin tsaro su fara bincike cikin gaggawa kan rahotannin.

Ta bukaci hukumomin su gano mutanen da ke ɗaukar nauyin shirin tare da gurfanar da duk wanda aka samu yana saye, karɓa ko riƙe katunan zaɓe ba bisa ka’ida ba.

ADC ta kuma shawarci duk wani ɗan ƙasa da aka tunkara domin ya sayar da PVC ɗinsa da ya ƙi karɓar tayin, ya adana duk wata hujja da yake da ita sannan ya kai rahoto ga INEC, hukumomin tsaro ko ofishin ADC mafi kusa.

ADC ta gargadi jama'a

Bolaji Abdullahi ya ce bai kamata a yi amfani da matsalolin tattalin arzikin da jama’a ke fuskanta wajen karɓar haƙƙinsu na zaɓe ba.

Ya ce kuɗin da mutum zai karɓa saboda PVC na iya amfanar da shi na ɗan lokaci, amma illar rasa damar amfani da katin zaɓen na iya shafar shi na tsawon shekaru.

Kara karanta wannan

Dan takarar shugaban kasa ya kawo sabon tsarin tallafi da zai taimaki 'yan Najeriya

Bolaji ya ce PVC ba katin roba kawai ba ce, tana wakiltar damar ɗan ƙasa ta zaɓar shugabannin da zai wakilce shi.

Shirin ADC kan zaben 2027

A wani labarin kuma, kun ji cewa jam’iyyar ADC ta bayyana cewa ta shirya fuskantar duk wani yanayi a zaɓen 2027 da ake tunkara.

ADC ta bayyana cewa tana da kwarin gwiwar kayar da jam’iyyar APC mai mulki idan aka gudanar da zaɓen cikin gaskiya da adalci.

Asali: Legit.ng