Kurunkus: Atiku, Tinubu da Peter Obi Sun Bayyana Hanyar da Suka Samu Dukiyoyinsu

• Zaben 2027 na da manyan 'yan takara guda uku wadanda za su fafata domin neman ragamar shugabancin Najeriya
• Manyan 'yan takarar guda uku, Bola Tinubu, Atiku Abubakar da Peter Obi sun bayyana yadda suka samu dukiyoyinsu
• Peter Obi da ke takara a karkashin inuwar jam'iyyar NDC ya bayyana cewa shi dan kasuwa ne tun kafin ya shiga siyasa

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Naeriya za ta gudanar da babban zaɓenta na gaba a Janairu 2027, inda Shugaba Bola Tinubu zai nemi wa’adi na biyu kuma na ƙarshe.

Yayin da zaɓen shugaban ƙasa na 2027 ke ƙaratowa, ’yan Nijeriya da dama na tambayar wata muhimmiyar tambaya: daga ina manyan ’yan takarar, waɗanda duk suke da ɗimbin dukiya, suka samu kuɗinsu?

Legit.ng ta duba yadda manyan masu neman kujerar shugaban ƙasa suka ce suka tara arzikinsu.

Kara karanta wannan

Zaben 2027: Ma'aikata za su huta, dan takara ya yi alkawarin biyan mafi karancin albashin N500,000

Abin da Peter Obi ya bayyana

A wata hira da ya yi da shirin The Morning Show na Arise TV a watan Oktoban 2021, Peter Obi, wanda a yanzu yake takarar shugaban ƙasa a jam’iyyar Nigeria Democratic Congress (NDC), ya bayyana kansa a matsayin ɗan kasuwa da ya koma harkar banki kafin ya fara aiki a gwamnati.

Obi ya ce ya gudanar da wani kamfanin kula da kasuwanni da aka tsara, sannan shi ne kaɗai mai shigo da man shafawa na salad na Heinz, Ovaltine da kayayyakin South African Breweries zuwa Nijeriya.

Ya kuma bayyana cewa wani kamfani da ya bar kafin ya zama gwamnan Anambra daga baya ya koma kasuwancin Next Cash and Carry da ake gani a Fatakwal da Abuja.

Obi ya ce yana da babban kaso na hannun jari a wasu bankuna, sannan ya kasance a kwamitin gudanarwar bankuna uku, inda ya shugabanci ɗaya daga cikinsu, kafin a zaɓe shi a matsayin gwamnan jihar Anambra.

Kara karanta wannan

Magana ta kare, INEC ta fitar da sunayen yan takarar shugaban ƙasa na ƙarshe kafin zaben 2027

“Na yi kasuwanci mai kyau sosai amma na shiga harkar banki,” in ji shi, inda ya ƙara da cewa siyasa a ƙarshe ta rage masa dukiya, sai dai bai yi nadamar shiga cikinta ba.

Tinubu ya bayyana asalin arzikinsa

A wata hira da BBC a watan Disamban 2022, Tinubu, wanda ke cikin manyan jagororin jam’iyyar All Progressives Congress (APC) mai mulki, ya ce arzikinsa ya samo asali ne daga kadarorin gidaje da ya gada sannan ya ci gaba da bunƙasa su tsawon shekaru.

Tinubu ya ƙaryata zargin cewa ya karɓi kuɗi daga asusun jihar Legas, inda ya ce Bankin Duniya da IMF sun binciki bayanan kuɗin jihar Legas kuma ba su gano wani abu da bai dace ba.

Ya ce: “Na gaji manyan kadarorin gidaje; na sauya darajarsu.”

Ya ƙara da cewa tun bayan barin ofishin gwamnan Legas a shekarar 2007, bai sake samun wani muƙamin gwamnati ba kuma bai karɓi wata kwangilar gwamnati ba.

Atiku ya bayyana hanyoyin arzikinsa

Tsohon mataimakin shugaban ƙasa Atiku Abubakar, wanda a yanzu yake takarar shugaban ƙasa a jam’iyyar African Democratic Congress (ADC), ya amsa irin waɗannan tambayoyi a wata hira da Arise News a watan Afrilun 2026.

Kara karanta wannan

NDC: Hanyar da jam'iyyar su Kwankwaso za ta tattara kudin yakin neman zabe

Ya ce arzikinsa ya samo asali ne daga jarin da ya zuba a harkar mai da iskar gas, sufuri da sarrafa kayayyaki, noma, kadarorin gidaje da ilimi, waɗanda ya gina kafin ya shiga siyasa.

Ya ƙara da cewa ya taimaka wajen ɗaukar nauyin Peoples Democratic Party (PDP) da kuɗinsa a lokacin da aka kafa jam’iyyar.

Atiku ya kuma yi magana kan wani binciken gwamnati da aka ƙaddamar a lokacin mulkin tsohon Shugaba Olusegun Obasanjo, wanda ya ce Nasir El-Rufai da Nuhu Ribadu suka jagoranta.

Ya ce a lokacin ya bayar da damar a cire kariyar da yake da ita daga bincike da son ransa domin a gudanar da binciken, sannan binciken ya wanke shi saboda hanyoyin da yake samun kuɗinsa a bayyane suke kuma halastattu ne​.

Atiku ya gode wa wata mata

A wani labarin kuma, kun ji cewa Atiku Abubakar ya amsa addu’ar wata mata mai suna Khadijat, wadda ta roƙi Allah Ya sauƙaƙa masa cika alkawuran da ya yi.

A sakon da matar mai suna Khadijat ta wallafa ta roki Allah ya ba Atiku Abubakar damar sauke nauyin da ya dauka idan ya ci zaben 2027.

Asali: Legit.ng