Bayan Ficewar Babachir, Sabuwar Rigima Ta Bullo a ADC a Jihar Adamawa

• Tsugunne ba ta kare ba a jam'iyyar ADC reshen jihar Adamawa biyo bayan kammala zaben fitar da gwani don zabar 'yan takara
• Wani mai neman takara da ya samu nasara a zaben fitar da gwani, ya yi zargin cewa ana yunkurin kwace nasarar da ya samu
• Ya bayyana cewa zai bi dukkanin hanyoyin da shari'a ta tanada domin ganin cewa ba a yi masa fin karfi ba ko danniya

​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Adamawa - Wani sabon rikici ya ɓalle a cikin jam'iyyar ADC a Jihar Adamawa sakamakon zargin da ake yi kan tafka magudi.

Ana dai zargin cewa ana tafka magudi a kan sakamakon zaɓen fitar da gwani na jam'iyyar ADC na Majalisar wakilai na Mazabar Yola ta Arewa, Yola ta Kudu da Girei.

Kara karanta wannan

2027: NDC ta jawo tsohon shugaban matasan APC, ta tsaida shi takarar gwamna a Gombe

Sakamakon zaben ADC ya zo da kura a Adamawa

Kungiyar yaƙin neman zaɓe ta Injiniya Abubakar Bashir (Sadeeq) ta yi zargin cewa ana ƙoƙarin sauya sakamakon zaɓen fitar da gwanin da aka gudanar a ranar 21 ga Mayu, 2026, rahoton Daily Trust ya nuna hakan.

A cewar sakamakon da jami'an zaɓe na jam'iyyar suka sanar a ranar 27 ga Mayun 2026, Abubakar Bashir ya samu ƙuri'u 33,931 inda ya doke sauran masu neman takara guda shida.

Zayyad Ayuba Tumba ne ya zo na biyu da ƙuri'u 16,266, yayin da Yusuf Garba ya samu ƙuri'u 14,611 a zaben fitar da gwanin.

An yi zargin an shirin sauya sakamakon zabe

Sai dai kuma, kungiyar yaƙin neman zaɓen ta yi iƙirarin cewa wani jerin sunaye da ke yawo a dandalin sada zumunta na nuni da cewa wani ɗan takara daban, wanda yana ɗaya daga cikin waɗanda suka sami ƙuri'u mafi ƙanƙanta a zaɓen, shi ne aka tura sunansa zuwa babbar hedkwatar jam'iyyar ta kasa a matsayin wanda ya yi nasara.

Kara karanta wannan

Adelabu: Tsohon Ministan Tinubu ya tayar da kura kan zaben fitar da gwani na gwamna

Jaridar TheCable ta ce a cikin wata sanarwa da Mohammed Daud Kachalla ya sanya wa hannu a madadin kungiyar yaƙin neman zaɓen, an bayyana wannan ci gaba a matsayin yunƙuri na gangan domin murƙushe muradin mambobin ADC a faɗin mazabar.

Wani bangare na sanarwar na cewa:

“Abin ya zo mana da mamaki da bacin rai cewa wani jerin sunaye da ake iƙirari yana yawo a dandalin sada zumunta a halin yanzu yana nuni da cewa wani ɗan takara daban, wanda ya samu mafi ƙanƙantar ƙuri'u a lokacin zaɓen fitar da gwani, an miƙa sunansa ga hedkwatar jam'iyya ta kasa a matsayin wanda ya yi nasara a zaɓen."

An shirya daukar matakin shari'a

Kungiyar yaƙin neman zaɓen ta jaddada cewa nasarar Abubakar Bashir a bayyane take kuma gagaruma ce, inda ta yi gargaɗin cewa duk wani ƙoƙari na sauya sakamakon zai gurgunta tsarin dimokuraɗiyya na cikin gida na jam'iyyar, sannan ya hana mambobin jam'iyyar da suka shiga zaɓen haƙƙinsu.

Ta lashi takobin bin dukkan hanyoyi na shari'a da na tsarin mulki domin kare abin da ta bayyana a matsayin ingantaccen umarni da mambobin jam'iyyar suka bayar cikin 'yanci.

Haka kuma, majalisar yaƙin neman zaɓen ta yi kira ga shugabancin ADC a matakin jiha da na ƙasa da su tabbatar da sakamakon da aka sanar, sannan su kare mutuncin tsarin zabar 'yan takara na jam'iyyar.

Kara karanta wannan

Hayatu Deen: Wanda ya fafata da Atiku a ADC ya yi maganar zuwa kotu kan sakamakon zaben

Babachir ya fice daga jam'iyyar ADC

A wani labarin kuma, kun ji cewa tsohon sakataren gwamnatin tarayya, Babachir Lawal, ya sanar da ficewarsa daga jam'iyyar ADC.

Babachir Lawal ya bayyana cewa ya yanke shawarar barin ADC ne, saboda an tafka magudi a zaben fitar da gwanin da ya samar da Atiku Abubakar a matsayin dan takara.

Ya ce daya daga cikin manyan dalilan da suka sa ya fice daga ADC shi ne rashin son kasancewa cikin abin da ya kira "injin magudin zaɓe" na Atiku a babban zaɓen 2027.

Wanda ya tantance Muhammad Malumfashi, babban edita a Legit.ng.

Asali: Legit.ng