Cikin Awanni 24 Kacal, Sojoji Sun Hallaka Ƴan Bindiga 19, Sun Ceto Gomman Mutane
- Rundunar Sojin Najeriya ta ce dakarunta sun ceto mutane 23 da aka yi garkuwa da su, tare da hallaka ’yan ta’adda 19 cikin sa’o’i 24
- A Zamfara, Operation FANSAN YAMMA ta ceto mutane 18 da ’yan ta’adda suka yi garkuwa da su a gidajensu, bayan dakarun sun kai farmaki
- A Borno, Operation HADIN KAI ta ceto mutane biyar da suka tsere daga sansanin ’yan ta’adda, yayin da sojoji suka kwato makamai a Enugu
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
Abuja - Rundunar Sojin Najeriya ta bayyana irin nasarori da ta samu a yaƙi da ta'addanci a fadin kasar.
Rundunar ta ce dakarunta sun ceto mutane 23 da aka yi garkuwa da su, tare da hallaka ’yan ta’adda 19 a wasu ayyuka daban-daban.
Source: Facebook
Rahotannin ayyukan soji sun bayyana cewa dakarun sun gudanar da samame da sintiri a sassan Najeriya cikin sa’o’i 24, daga Litinin zuwa Talata, cewar PM News.
Sojoji sun ceto mutane a Zamfara
A Zamfara, dakarun Operation FANSAN YAMMA sun ceto mutane 18 da aka yi garkuwa da su daga gidajensu a Sabon Gari, ƙaramar hukumar Kaura Namoda.
Rahoton ya ce dakarun sun mayar da martani ne bayan samun kiran neman agaji, inda suka fafata da ’yan ta’addan tare da tilasta musu tserewa.
’Yan ta’addan sun gudu, inda suka bar mutanen 18 da suka yi garkuwa da su, waɗanda dakarun suka ceto ba tare da wani rauni ba.
A wani samame, dakarun sun ceto wani mutum da aka yi garkuwa da shi a wajen ƙauyen Kukawa, ƙaramar hukumar Kanam ta Plateau.
Wanda aka ceto ya shaida wa dakarun cewa an yi garkuwa da shi daga Duguri a Bauchi ranar Alhamis, kafin daga bisani aka miƙa shi ga dagacin ƙauyen.
A Plateau, dakarun Operation ENDURING PEACE sun hallaka wani ɗan ta’adda tare da kwato bindigar AK-47 da harsasai biyu a wani samame.
Aikin ya biyo bayan bayanan sirri da wani da ake zargi da fashi da makami ya bayar, wanda ya jagoranci sojoji zuwa Nwur, ƙaramar hukumar Shendam.
Source: Original
Sojoji sun hallaka 18 a Kebbi
A Kebbi, dakarun Operation FANSAN YAMMA sun hallaka ’yan ta’adda 18 yayin wani hari da suka kai kan jami’an Mobile Police Special Intervention Squad a Makuku.
Rahoton ya ce dakarun sun kuma lalata babura biyar tare da kwato bindigogin AK-47 guda biyu da aka ƙera a gida yayin wani samame a Plateau, cewar Punch.
A Borno, dakarun Operation HADIN KAI sun ceto mutane biyar da suka tsere daga wani sansanin ’yan ta’adda da ke yankin tsaunukan Mandara.
Dakarun Bataliyar Task Force ta 82 Division sun hango mutanen biyar ne yayin sintiri a hanyar Amuda Bridge zuwa Ngoshe-Gava, a ƙaramar hukumar Gwoza.
Rahoton ya ce mutanen sun tsere daga sansanin ne bayan samun rashin jituwa tsakanin ’yan ta’addan, tare da wasu mayaƙan barin sansanin.
Kokarin sojoji a Enugu
A Enugu, dakarun 82 Division da 103 Battalion sun kwato bindigogin AK-47 guda huɗu, mujallu bakwai da harsasai 133 daga wani maboyar masu garkuwa.
An kwato kayan ne a dajin Umuchingu Ujenike, inda dakarun suka gudanar da aikin share fagen murƙushe masu garkuwa da mutane da ’yan ta’adda.
Rahoton ya ƙara bayyana cewa dakarun na ci gaba da gudanar da ayyukan tsaro domin dakile ayyukan ’yan ta’adda, ’yan bindiga da masu garkuwa.
Ayyukan rundunar sun haɗa da sintiri, samame, kai farmaki da amfani da bayanan sirri domin gano maboyar masu aikata laifuka a sassan Najeriya.
Rundunar ta ce waɗannan ayyuka sun taimaka wajen ceto mutanen da aka yi garkuwa da su da kuma kwato makamai daga hannun masu laifi
Sojoji sun yi gumurzu da ƴan bindiga
Mun ba ku labarin cewa rundunar Sojin Najeriya ta jagoranci wani samame da ya kai ga ceto mutane 16 da aka yi garkuwa da su a jihar Kogi.
An ceto mutanen ne bayan haɗin gwiwar sojoji da rundunar sojin ruwa, 'yan sanda, 'yan banga da mafarauta a cikin daji.
Wani mafarauci ya rasa ransa yayin musayar wuta da masu garkuwa da mutanen, yayin da ɗan sanda guda ya samu raunuka
Asali: Legit.ng
