Rigima Ta Yi Zafi, Atiku Ya Yi Tone Tone kan Obasanjo

• Atiku Abubakar ya zargi Olusegun Obasanjo da ci gaba da yaɗa ƙarya da yaudara a kansa tsawon sama da shekaru 20
• Paul Ibe ya ce zargin Obasanjo kan marigayi Ghali Na’Abba bai yi daidai da bayanan tsohon ɗan majalisa ba
• Atiku ya kuma ƙalubalanci wasu zarge-zargen da suka shafi PTDF da dangantakar Obasanjo da Mike Adenuga

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon mataimakin shugaban ƙasa Atiku Abubakar ya zargi tsohon shugaban ƙasa Olusegun Obasanjo da ci gaba da kamfen din “ƙarya, magudin siyasa da yaudara” a kansa tsawon sama da shekaru 20.

Atiku ya bayyana cewa sababbin zarge-zargen tsohon shugaban ƙasar ba su da tushe ballantana makama.

Atiku ya bayyana hakan ne a ranar Lahadi, 9 ga watan Agustan 2026 ta hannun mai ba shi shawara kan harkokin yaɗa labarai, Paul Ibe.

Kara karanta wannan

Gwamnatin Tinubu ta sauko bayan 'yan Katolika sun ja daga, za a tattauna

Ya bayyana hakan ne yayin da yake mayar da martani kan wani sabon zargin Obasanjo cewa tsohon mataimakin shugaban ƙasan ya nemi goyon bayan marigayi Kakakin Majalisar Wakilai, Ghali Na’Abba, domin cire shi daga mulki a lokacin da suke kan mulki tsakanin 1999 da 2007.

An ruwaito cewa Obasanjo ya yi zargin ne a ranar 23 ga Yuli, lamarin da ya sake farfaɗo da wata tsohuwar takaddama ta siyasa da ta shafi dangantakarsa da Atiku.

Zargin Na’Abba bai yi daidai ba

A cikin sanarwar da Ibe ya fitar a Abuja, ya ce ya zama al’adar Obasanjo ya sake fito da zarge-zargen cin amana da rashawa a kan Atiku a duk lokacin da zaɓe ya ƙara kusantowa.

“Wannan karon, ya zaɓi ya mai da wani mutum da ya rasu kusan shekaru uku da suka gabata batun zarginsa marar tushe,” in ji Ibe.

Ya ƙara da cewa Na’Abba, wanda ya rasu a shekarar 2023, ba zai iya ba da amsa ga zargin ba, yana mai bayyana ikirarin a matsayin na ƙeta.

Kara karanta wannan

Faston da ya buga da Tinubu a fadar shugaban kasa ya sake magana

Sai dai Ibe ya kawo maganar tsohon ɗan Majalisar Wakilai Abubakar Bwari, wanda ya kasance mai tsawatarwa a majalisar tsakanin 1999 da 2007, yana mai cewa bayaninsa ya saɓa da na Obasanjo.

A cewar Bwari, Na’Abba bai taɓa neman a cire Obasanjo daga mulki ba. Sai dai ya ce Atiku ne ya riƙa shiga tsakanin tsohon shugaban ƙasar da ’yan majalisar a madadinsa.

Atiku ya taimaki Obasanjo

An kuma ƙalubalanci wani labari da ya shafi dangantakar Obasanjo da Atiku a lokacin da ake shirin zaɓen shugaban ƙasa na 2003.

Ibe ya kawo wani bidiyo inda tsohon gwamnan jihar Abia kuma tsohon gwamnan jam’iyyar PDP, Orji Uzor Kalu, ya ce Atiku ne ya durƙusa a gaban gwamnonin PDP domin neman goyon bayansu ga sake zaɓen Obasanjo.

“Atiku ya durƙusa; mun kai kimanin gwamnoni 17. Ya durƙusa a gabanmu ya ce ba ya son ya ci amanar Obasanjo. Shekaru huɗu kamar kwana huɗu ne,” Kalu ya ce, kamar yadda aka ruwaito a cikin sanarwar.

A cewar Ibe, bayanin Kalu ya saɓa da zargin da ake cewa mutanen da ke goyon bayan Obasanjo ne suka yaɗa cewa tsohon shugaban ƙasar ya tilasta masa durƙusawa a gaban Atiku domin samun goyon bayansa na wa’adi na biyu.

Kara karanta wannan

Fadawa Tinubu 'gaskiya' na neman jefa malaman addini a cikin matsala

Ibe ya kuma kawo wata magana daga Kalu cewa gwamnonin PDP sun fara shirye-shiryen da ka iya kaiwa ga Atiku ya zama shugaban ƙasa, amma Atiku ya ƙi cin amanar Obasanjo, wanda a baya ya amince ya ba shi mukamin mataimakin shugaban ƙasa.

Takaddamar PTDF

Sanarwar ta kuma sake duba ɗaya daga cikin manyan abubuwan da suka haifar da takaddama tsakanin Obasanjo da Atiku, wato binciken da aka gudanar kan asusun Petroleum Technology Development Fund (PTDF) jim kaɗan kafin zaɓen shugaban ƙasa na 2007.

Obasanjo ya buƙaci Majalisar Dattawa ta gudanar da bincike kan zargin almundahanar kuɗi da ya shafi PTDF.

Atiku ya musanta aikata laifi, sannan ya gabatar da kansa domin a bincike shi, yana mai cewa kuɗin da ake magana a kansu suna cikin asusun ajiya na ƙayyadadden lokaci.

A lokacin, Atiku ya kuma ce zarge-zargen na da alaƙa da siyasa, kuma an ƙirƙire su ne saboda adawarsa da yunƙurin Obasanjo mai cike da cece-ku-ce na neman wa’adi na uku a mulki.

Ibe ya yi zargin cewa binciken wani ɓangare ne na ƙoƙarin danganta Adenuga da Atiku kan zarge-zargen da suka shafi kuɗin PTDF.

Ya kuma yi watsi da zargin cewa Adenuga ya yi amfani da kuɗin PTDF wajen biyan kuɗin lasisin gudanar da kamfanin Globacom, yana mai cewa ɗan kasuwar ya samu kuɗin ne daga BNP Paribas Bank domin gudanar da wannan ciniki.

Kara karanta wannan

Bayan shan suka Gwamna Abba ya kare matakin ba 'yan APC filaye sama da 1500

Dangantakar Obasanjo Da Adenuga

Sanarwar ta kuma jawo hankali kan bayanin Oba Adetona game da hulɗarsa da Adenuga bayan tsare ɗan kasuwar da kuma ficewarsa daga Najeriya.

A cewar bayanin marigayi basaraken, daga baya Obasanjo ya haɗu da Adenuga a wani taron jama'a, sannan ya gayyace shi zuwa Ota, inda ake zargin ya nemi taimakon shugaban Globacom wajen gina wani ginin gudanarwa a Jami’ar Bells da Obasanjo ya kafa.

“Mike ya amince, kuma Cachez Turnkey Projects Ltd ta gudanar da aikin a madadinsa,” sanarwar ta nakalto Oba Adetona yana cewa.

Ibe ya ce daga baya Adenuga ya bar Najeriya sakamakon abin da ya bayyana a matsayin ci gaba da tsangwama daga EFCC, amma ya dawo bayan Obasanjo ya bar mulki.

Ya kuma kawo bayanin Oba Adetona cewa aikin ginin Jami’ar Bells ya ragu a lokacin da Adenuga baya Najeriya, sannan jami’ar ta nemi ganawa da ɗan kasuwar domin tattauna yadda za a ci gaba da aikin.

Kara karanta wannan

Alaka ta yi tsami, Atiku ya yi wa Obasanjo sabon tonon silili

Ƙungiyar Atiku ta ce wannan bayanin ya haifar da tambayoyi kan bambancin yadda tsohon shugaban ƙasar ya mu’amalanci Adenuga a bainar jama’a da kuma irin hulɗar da ake zargin ya yi da shi a ɓoye.

Saboda haka, Ibe ya ce ya kamata a duba sabon zargin Obasanjo a cikin yanayin dangantakar siyasa tsakanin mutanen biyu, wadda ta kasance cikin cece-ku-ce tsawon sama da shekaru 20.

Me Obasanjo ya ce kan zarge-zargen?

Har yanzu Obasanjo bai fito fili ya mayar da martani kan zarge-zargen da ke cikin sanarwar Atiku ba.

Lokacin da aka tuntubi mataimaki na musamman ga tsohon shugaban ƙasa kan harkokin yaɗa labarai, Kehinde Akinyemi, domin jin ta bakinsa, ya ce:

“Ba ni da abin cewa.”

An turawa Atiku bakin kudade

A wani labarin kuma, kun ji cewa dan takarar shugaban kasa na jam'iyyar ADC, Atiku Abubakar, ya bayyana damuwarsa kan wasu kudi da aka tura masa.

Atiku ya nuna damuwar ne kan wani abin da ya kira shigar masa da kudi cikin yanayi mai cike da shakku zuwa daya daga cikin asusun ajiyarsa na banki.

Asali: Legit.ng