Adadin Wadanda Suka Mutu Ya Haura 150 a Harin Jirgin Saman Sojoji a Zamfara

• Wasu shaidun gani da ido sun bayyana cewa adadin mutane da jirgin saman sojoji ya hallaka a Zamfara na karuwa
• Mutanen suka ce adadin wadanda suka mutu ya haura 150 bayan harin jirgin sojoji a Kasuwar Tufa jihar Zamfara
• Fiye da mutane 40 na asibiti yayin da mazauna suka bayyana firgici da fashewar bom a kasuwar Tufa a Zamfara yanzu har yanzu

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Gusau, Zamfara - Rahotanni daga jihar Zamfara sun bayyana cewa adadin mutanen da suka mutu a harin jirgin sojoji na karuwa.

An tabbatar da cewa harin jirgin sojin Najeriya a Kasuwar Tufa ya yi sanadin mutuwar mutane fiye da 150.

Shaidu sun fadi adadin mamata a Zamfara

Mazauna sun ce sama da mutane 40 na asibiti a Gusau yayin da fashewar bam ta jefa kasuwar cikin rudani mai tsanani sosai yanzu, cewar Aminiya.

Kara karanta wannan

An saki sunayen kananan hukumomi 3 da Boko Haram ta tilasta wa biyan haraji a Yobe

Wata majiya ta ce mazauna sun zargi yiwuwar an tsegunta bayanan harin, inda ’yan bindiga suka tsere kafin jirgin soji ya kai farmaki ne.

Wani dattijo Malam Abdullahi Hassan ya ce ya bar kasuwa jim kaɗan kafin jirgin yaƙi ya kai hari a Kasuwar Tufa a jihar Zamfara.

Ya ce yana hira da tsofaffi sai ya fara jin fargaba sosai, yana cewa halin tsaro ya rikitar da rayuwarsu da tsananin tsoro.

Bayan ya koma gida ya ji fashewar ƙara mai ƙarfi, daga baya ya ce an kai hari, mutane da yawa har kimanin 150 sun mutu.

Yadda harin ya raba mutane da ƴan uwansu

Wani mazaunin yankin ya ce ya rasa ’yan uwa biyar, kuma ’yarsa da ƙaninsa sun samu munanan raunuka a harin kasuwar Tufa.

Ya ce kafin harin ’yan bindiga sun riga sun shigo da babura amma suka fice kafin jirgin ya kai farmaki a yankin, kamar yadda Daily Post ta ruwaito.

Ya yi zargin an tsegunta bayanan harin, don haka ’yan bindiga suka gudu tun kafin jirgin saman ya kai hari a kasuwar Zamfara.

Kara karanta wannan

Bayan tadiye yaransa a tantancewar APC, Fubara ya magantu kan alakarsa da jam'iyya

Wani ya ce ya ga gawarwaki da yawa kuma yawanci yara ne masu sayar da abinci da kayan gargajiya a kasuwar.

Ya bayyana cewa ya taimaka wajen binne mamata cikin awanni da dama, gawarwaki sun lalace sosai a cikin mummunan yanayi.

Ya ce ba a ga gawar ɗan bindiga ba, kuma babu musayar wuta tsakanin sojoji da ’yan bindiga kamar yadda aka bayyana.

Ya ƙara cewa mutane 40 na asibiti a birnin Gusau suna jinya, yayin da ake ci gaba da neman waɗanda suka ɓace yayin harin.

Harin jirgin sojoji: Gwamnatin Zamfara ta magantu

Mun ba ku labarin cewa Gwamnatin jihar Zamfara ta yi martani bayan rahoton cewa jirgin saman sojoji ya hallaka mutane kusan 100 wanda aka ce adadin na ƙaruwa sosai.

Gwamnatin ta ce yankin da aka kai harin sanannen maboyar ‘yan bindiga ne da jami’an tsaro ke bibiyarsu domin kokarin tabbatar da zaman lafiya da kare rayukan al'ummar yankunan.

Shugaban karamar hukumar Zurmi, Hon. Samaila Hussaini Moriki, ya ce ana gudanar da bincike domin gano hakikanin abin da ya faru a yankin.

Wanda ya tantance Muhammad Malumfashi, babban edita a Legit.ng.

Asali: Legit.ng