Ragunan Layya Sun Yi Tashin Gwauron Zabi Ana Shirin Babbar Sallah a Jihar Kaduna
- Farashin raguna ya yi tashin gwauron zabi a wsu kasuwannin jihar Kaduna kafin yayin da musulmi ke shirye-shiryen sallar layya
- Bincike ya nuna cewa farashin dan matsakaicin rago da bai kai girma sosai ba ya tashi daga N150,000 zuwa N250,000
- Masu saye da dillalai sun danganta tashin farashin da matsin tattalin arziki da matsalar tsaron da ake fama da su a sassan kasar nan
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Kaduna, Nigeria - Yayin da al’ummar Musulmi ke shirin bukuwan sallar layya (Eid-el-Kabir), farashin raguna ya yi tashin gwauron zabi a jihar Kaduna.
Rahotanni sun nuna cewa lamarin ya sa mutane da dama sun dakatar da sayen dabbar da za su yi layya da ita duk da wadatar dabbobin a kasuwanni.
Source: Facebook
Binciken da Vanguard ta gudanar a wasu manyan kasuwannin dabbobi da ke cikin birnin Kaduna ya nuna cewa kasuwannin sun cika da raguna, amma babu masu saye.
A kasuwannin Zango, Rigasa da Bashama Road, ana sayar da kananan raguna tsakanin N150,000 zuwa N250,000, yayin da matsakaita da manyan raguna ke kaiwa daga N300,000 har zuwa Naira miliyan 1, gwargwadon iri da girmansu.
Mazauna Kaduna sun koka
Wasu mazauna jihar Kaduna sun bayyana cewa farashin ya yi tsada sosai idan aka kwatanta da shekarun baya.
Wani magidanci, Abdulrahman Usman, wanda aka gani yana cinikin rago a kasuwar Zango, ya nuna damuwa kan yadda farashin dabbobin ya yi tashin gwauron zabi.
Sai dai ya ce yana fatan farashin zai sauka yayin da ranar Sallah ke kara matsowa.
Wani dillalin dabbobi a kasuwar Rigasa, Alhaji Suleiman Adamu, ya danganta tashin farashin da tsadar sufuri, abincin dabbobi da kuma matsalar tsaro da ke shafar hanyoyin safara.
A cewarsa, karin kudin kula da dabbobin kafin a sayar da su ma ya taimaka wajen tashin farashin, kamar yadda Punch ta kawo.
Wasu raguna sun kai N700,000
Shi ma wani dillali, Bilyaminu Musa, ya ce yana kawo raguna daga jihar Neja domin kwastomominsa na musamman.
“Na shafe kusan shekara 10 ina wannan kasuwanci. Ina kawo raguna ga abokan ciniki na na musamman da suka san darajar irin wadannan raguna,” in ji Musa.
Ya bayyana cewa daga cikin raguna 40 da ya kawo, an riga an sayar da guda 14.
Source: Original
Da aka tambaye shi farashin mafi karamin da mafi girman rago, ya ce mafi kankanta shi ne ragon N350,000 ne yayin da mafi girma ya kai N700,000.
An ba da hutun babbar sallah a Turkiyya
A wani labarin, kun ji cewa Shugaba Recep Erdoğan ya ba da sanarwar ƙara hutun Sallar Layya na shekarar 2026 zuwa kwanaki tara ga ma'aikatan gwamnati a Turkiyya
Bukukuwan sallar za su fada tsakanin 27 zuwa 30 ga watan Mayu, amma dai yanzu an haɗe su da kwanakin aiki na Litinin da Talata don samun hutu mai tsawo.
Sallar layya, wadda Turkawa ke kira da Kurban Bayram, tana ɗaya daga cikin manyan bukukuwan Musulunci da ake gudanarwa don tunawa da sadaukarwar Annabi Ibrahim (AS).
Asali: Legit.ng
