ADC Za Ta Shiga Zaɓen 2027, Keyamo Ya Ce Takarar Atiku Ce Ke Cikin Haɗari

• Ministan Sufurin Jiragen Sama, Festus Keyamo, ya ce ADC za ta shiga zaɓen 2027 duk da hukuncin kotu kan shugabancin jam’iyyar
• Keyamo ya bayyana cewa takarar Atiku Abubakar da sauran ’yan takarar da suka fito ƙarƙashin ɓangaren David Mark ce ka iya fuskantar matsala
• Maganganun ministan sun jawo martani daga ’yan Najeriya da suka bayyana ra’ayoyi mabambanta a kafar sada zumunta ta X

FCT, Abuja - Ministan Sufurin Jiragen Sama da Sararin Samaniya, Festus Keyamo, ya yi karin haske kan hukuncin kotu da ya shafi rikicin shugabancin jam’iyyar ADC, yana mai cewa jam’iyyar za ta shiga zaɓen 2027.

Keyamo ya ce ba daidai ba ne a ce hukuncin kotun ya hana ADC shiga zaɓen gaba ɗaya. A cewarsa, abin da hukuncin ya shafa shi ne shugabancin ɓangaren Sanata David Mark da matakan da wannan ɓangare ya ɗauka, ciki har da zaɓen fitar da gwani da ya samar da Atiku Abubakar a matsayin ɗan takarar shugaban ƙasa.

Kara karanta wannan

Sama da kasa ba za su hade ba idan aka hana Atiku takara in ji ministan Tinubu

Ministan ya bayyana hakan ne a wani saƙo da ya wallafa a shafinsa na X ranar Lahadi, 8 ga Nuwamba, 2026.

Keyamo ya yi magana kan ADC

A cikin saƙonsa, Keyamo ya ce masu ikirarin cewa ADC ba za ta kasance cikin jam’iyyun da za su shiga zaɓen 2027 ba suna yaɗa bayanan da ba daidai ba.

Ya ce ADC za ta shiga zaɓen, amma takarar ’yan siyasar da suka fito ƙarƙashin ɓangaren David Mark, ciki har da Atiku, na iya fuskantar matsala dangane da hukuncin ƙarshe da Kotun Ƙoli za ta yanke.

Ministan ya kuma yi tambaya kan haƙƙin sauran ’yan takarar da suka lashe zaɓen fitar da gwani a ƙarƙashin shugabancin da ya kira na asalin masu jam’iyyar.

Ya tambayi ko waɗannan ’yan Najeriya sun fi ƙarancin daraja ne idan aka kwatanta su da David Mark da Atiku Abubakar.

Abin da kotu ta yanke

A ranar Alhamis, 5 ga Nuwamba, 2026, Babbar Kotun Tarayya da ke Abuja ta yanke hukunci kan rikicin shugabancin ADC.

Kara karanta wannan

Ministan Tinubu ya fito ya yi maganganu kan rusa takarar Atiku

Mai shari’a Peter Lifu ya soke shugabancin kwamitin riƙon ƙwarya da David Mark ke jagoranta, tare da bayyana cewa kafa kwamitin bai bi ƙa'idojin kundin tsarin mulkin jam’iyyar ba.

Kotun ta kuma soke matakan da kwamitin ya ɗauka, ciki har da zaɓen fitar da gwani da ya samar da Atiku a matsayin ɗan takarar shugaban ƙasa na ADC a zaɓen 2027.

Hukuncin ya jefa makomar wasu matakan siyasar jam’iyyar cikin rashin tabbas, musamman batun takarar Atiku da sauran ’yan takarar da suka fito ƙarƙashin shugabancin Mark.

ADC ta dauki matakin daukaka kara

Bayan hukuncin, ADC ta sanar da ɗaukaka ƙara zuwa Kotun Ɗaukaka Ƙara, tare da shigar da buƙatar dakatar da aiwatar da hukuncin har sai an kammala sauraron ƙarar.

Jam’iyyar ta kuma sanar da Hukumar Zaɓe Mai Zaman Kanta ta Ƙasa (INEC) game da matakin da ta ɗauka, tana mai buƙatar hukumar ta dakata da duk wani mataki da zai iya shafar shari’ar kafin kotun ɗaukaka ƙarar ta yanke hukunci.

A cikin sanarwar da daraktan yaɗa labaran kwamitin yaƙin neman zaɓen shugaban ƙasar ADC, Phrank Shaibu, ya fitar, jam’iyyar ta ce za ta ci gaba da shirye-shiryen siyasa yayin da take bin hanyoyin shari’a.

Kara karanta wannan

Obi ya shiga wa Atiku fada kan rusa 'yan takarar ADC da kotu ta yi

’Yan Najeriya sun yi martani

Maganganun Keyamo sun jawo martani daban-daban daga masu amfani da kafar sada zumunta ta X wacce aka fi sani da Twitter.

Harrison Adodo ya nuna rashin amincewarsa da yiwuwar hana Atiku shiga zaɓen 2027, yana mai cewa bai kamata a cire ɗan takara daga fafatawar siyasa ta hanyar da zai hana masu zaɓe damar yanke shawara ba.

A nasa martanin, wani mai amfani da sunan @Uncle_Dips ya tambayi dalilin da ya sa ministan ke tsoma baki sosai kan yadda wata jam’iyya ke gudanar da harkokinta da kuma wanda zai yi mata takara.

Shi kuwa Ahmed Ibrahim ya bayyana cewa Atiku zai kasance cikin masu takarar zaɓen 2027, yana mai cewa babu wanda zai iya hana .

Asali: Legit.ng