Wike Ya Tsage Gaskiya kan Rawar da Ya Taka Wajen Soke Takarar Gwamnan APC a 2028

• Ministan Abuja, Nyesom Wike, ya musanta zargin cewa shi ne ya haddasa hukuncin kotu da ya soke amincewa da Hope Uzodinma a matsayin ɗan takarar APC
• Wike ya bayyana cewa yana saɓani da gwamnan Imo kan ƙungiyar Rainbow Coalition da ke mara wa Shugaba Bola Tinubu baya a zaɓen 2027.l
• Ministan ya ce manufar ƙungiyar ita ce tabbatar da nasarar Tinubu, yayin da tsarin rabon kujeru zai shafi zaɓen ‘yan Majalisar Dokoki ta Ƙasa.

​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Rivers - Ministan Babban Birnin Tarayya (FCT), Nyesom Wike, ya musanta cewa yana da hannu a hukuncin Babbar Kotun Tarayya da ya soke amincewa da takarar Gwamnan Jihar Imo, Hope Uzodinma.

Hukuncin kotun dai ya soke amincewa da Hope Uzodinma a matsayin ɗan takarar APC na kujerar sanatan Imo ta Yamma a zaɓen 2027.

Kara karanta wannan

Da gaske gwamnatin tarayya ta kulla yarjejeniyar tsaigaita wuta da Boko Haram

Wike ya bayyana hakan ne a ranar Alhamis, 5 ga watan Nuwamban 2026 yayin tattaunawarsa da manema labarai a Fatakwal, babban birnin Jihar Rivers,.

Ministan na babban birnin tarayya Abuja ya kira zarge-zargen da ake yi masa da cewa ƙoƙari ne na ɓata masa suna.

Sai dai ministan ya amince cewa yana saɓani da Uzodinma kan ƙungiyar siyasa ta Rainbow Coalition, wadda ke goyon bayan ƙoƙarin Shugaba Bola Tinubu na sake lashe zaɓen shugaban ƙasa a 2027.

Wike ya musanta hannu a hukuncin kotu

Da yake mayar da martani kan zargin cewa shi ne ya taka rawa wajen hukuncin kotun, Wike ya ce bai shigar da ƙara ba, kuma shi ba ɗan jam’iyyar APC ba ne.

A kalamansa:

“Ban je kotu ba, kuma ni ba ɗan APC ba ne. Mutane suna faɗin haka ne saboda kwana guda kafin hukuncin, ya fito fili ya gargaɗi mutanensa cewa babu wata Rainbow Coalition.

Kara karanta wannan

Oshiomhole ya kwance wa Atiku da Peter Obi zani a kasuwa kan zaben 2027

“Ya ce idan ya gan ka, zai ƙwace motar. Don haka da hukuncin ya fito, sai suka ce ni ne na yi hakan. Ta yaya hakan zai yiwu?”

Ministan ya bayyana cewa ba shi da alaƙa da shari’ar, duk da cewa yana da bambancin ra’ayi da gwamnan Imo kan batun ƙungiyar Rainbow Coalition.

Ya tambayi Uzodinma abin da yake tsoro

Wike ya ƙalubalanci Gwamna Hope Uzodinma da ya bayyana dalilin da ya sa yake adawa da ƙungiyar Rainbow Coalition.

“Me Hope Uzodinma yake tsoro a cikin Rainbow Coalition?”

Ministan ya jaddada cewa babban burin ƙungiyar shi ne haɗa kan masu goyon bayan Tinubu domin tabbatar da nasararsa a zaɓen shugaban ƙasa na 2027.

Ya kuma bayyana cewa sauran batutuwan siyasa, ciki har da tsarin rabon kujeru tsakanin yankuna, za su kasance cikin abubuwan da za a yi la’akari da su wajen zaɓen ‘yan Majalisar Dokoki ta Ƙasa.

Wike ya kare alaƙarsa da Rochas Okorocha

A yayin tattaunawar, ministan ya kuma kare alaƙarsa da tsohon gwamnan Jihar Imo, Rochas Okorocha, duk da bambance-bambancen ra’ayin siyasa da ke tsakaninsu.

Kara karanta wannan

An fara batun Tinubu ya je Umrah ne don neman kuri'un 'yan Arewa, hadiminsa ya magantu

Wike ya ce ba zai cutar da abokansa saboda kawai suna da alaƙa da mutanen da yake adawa da su a fagen siyasa ba.

Ya bayyana cewa bambancin ra’ayin siyasa ba zai sa ya juya wa abokansa baya ko ya cutar da su saboda matsayinsu na siyasa ba.

Wike ya soki Atiku

A wani labarin kuma, kun ji cewa Nyesom Wike, ya kalubalanci tsohon mataimakin shugaban ƙasa, Atiku Abubakar, da ya bayyana irin nasarorin da ya samu a shekaru takwas da ya yi a kan mulki.

Wike ya kuma buƙaci ’yan Najeriya su yi la’akari da sukar da tsohon shugaban ƙasa Olusegun Obasanjo ya yi wa tsohon mataimakinsa, yayin da ake tunkarar zaɓen shugaban ƙasa na 2027.

Asali: Legit.ng