'Obi na Yi wa Atiku Aiki a Boye domin Ya Samu Nasara a 2027'

• Ɗan takarar shugaban ƙasa na jam'iyyar AAC, Omoyele Sowore, ya zargi Peter Obi da jagorantar magoya bayansa a boye domin su yi wa Atiku Abubakar aiki a zaɓen 2027.
• Sowore ya yi zargin ne a wani saƙo da ya wallafa, inda ya ce Obi na adawa da manufofinsa na kawo sauyi a Najeriya, amma bai gabatar da hujjar da ta tabbatar da zargin ba
• Zargin ya jawo martani daga masu amfani da kafafen sada zumunta, inda wasu suka goyi bayan Sowore, wasu suka kare Obi, yayin da wasu suka nemi ya gabatar da hujjoji

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja – Ɗan takarar shugaban ƙasa na jam'iyyar AAC, Omoyele Sowore, ya zargi Peter Obi da yi wa Atiku Abubakar aiki

Kara karanta wannan

'Yar siyasar Arewa da Tinubu ya gina amma wasu suka butulce masa a 2023'

Sowore ya zargi dan takarar NDC, Peter Obi da jagorantar magoya bayansa a ɓoye domin su yi wa Atiku Abubakar na jam'iyyar ADC aiki.

Sowore ya bayyana hakan ne a wani saƙo da ya wallafa a Facebook, inda ya yi zargin cewa Obi na ƙoƙarin taimaka wa Atiku saboda rashin goyon bayansa ga manufofin kawo sauyi da yake fafutuka a kai.

Zargin da Sowore ya yi wa Obi

A cikin saƙon nasa, Sowore ya bayyana Obi a matsayin wanda yake yaudarar jama'a, yana mai zargin cewa yana tura magoya bayansa su yi wa Atiku aiki a ɓoye saboda sun yi hannun riga da manufofinsa na kawo sauyi.

Ya rubuta cewa:

“Idan ba ku lura ba, Peter Obi, wanda aka shirya a matsayin mai yaudarar jama'a, yana jagorantar magoya bayansa a ɓoye domin su yi wa Atiku Abubakar aiki, saboda suna adawa da manufofinmu na kawo sauyi. Obi yana shirin zama sakataren gwamnatin tarayya a gwamnatin Atiku.”

Zargin nasa ya zo ne a daidai lokacin da ake ci gaba da shirye-shiryen zaɓen shugaban ƙasa na 2027, inda Obi da Atiku ke takara a ƙarƙashin jam'iyyu daban-daban.

Kara karanta wannan

Atiku ya magantu kan tsadar kayan noma, ya fadi mafita tare da sukar Tinubu

Obi na NDC, Atiku na ADC

Peter Obi na takarar shugaban ƙasa a ƙarƙashin jam'iyyar NDC, tare da Rabiu Kwankwaso a matsayin abokin takararsa na mataimakin shugaban ƙasa.

A gefe guda, Atiku Abubakar na takarar shugaban ƙasa a ƙarƙashin jam'iyyar ADC, inda Rotimi Amaechi yake matsayin abokin takararsa na mataimakin shugaban ƙasa.

A baya dai, an yi ƙoƙarin haɗa kan jam'iyyun adawa domin su marawa ɗan takara guda baya a ƙoƙarin ƙalubalantar Shugaba Bola Tinubu da mataimakinsa Kashim Shettima na jam'iyyar APC a zaɓen 2027. Sai dai, har yanzu ba a cimma wannan buri ba.

Martanin jama'a kan zargin Sowore

Saƙon Sowore ya jawo muhawara a kafafen sada zumunta, inda masu amfani da Facebook suka bayyana ra'ayoyi mabambanta kan zargin da ya yi wa Obi.

Larry Kings ya yi tambaya kan zargin da Sowore ya yi, inda ya ce:

“To, Obi ya ƙi zama mataimakin shugaban ƙasa ne domin ya zama sakataren gwamnatin tarayya?”

Kara karanta wannan

Dan takarar ADC a Gombe ya yi alkawura, zai kara da Pantami da Jamilu

Moyosola Niran-Oladunni kuwa ta nuna shakku kan zargin Sowore, inda ta ce:

“Ina ganin Sowore yana yi wa APC aiki ne.”

Earl Okezie ya soki Sowore kan abin da ya ɗauka a matsayin magana da ba ta dace da batun ba, yayin da Olufemi Samuel ya yi kira ga magoya bayan Obi da su nemi hujjojin zargin ko kuma su ɗauki matakin shari'a.

Peter Ocheikwu kuma ya yi tambaya cewa:

“Shin wannan ne dabarar yaƙin neman zaɓenka?”

Hungbeme Moses Wenayon shi ma ya goyi bayan zargin Sowore, inda ya yi zargin cewa Obi yana aiki da tsofaffin 'yan siyasa da ya kira masu aikata laifi, yana mai cewa Sowore ya yi gaskiya.

'Tinubu na da karfi a jihohi'

A wani labarin, kun ji cewa Sanata Abdulaziz Yari, ya bayyana cewa za a ƙaddamar da yaƙin neman zaɓen sake zaɓen Shugaba Bola Tinubu a hukumance ranar 14 ga Oktoba.

Yari ya kuma yi iƙirarin cewa Tinubu na da iko da jihohi sama da 20 na Najeriya, yayin da ya ce Peter Obi na NDC da Atiku Abubakar na ADC ba za su iya cewa suna da iko da wata jiha a wajen yankunansu ba.

Tsohon gwamnan jihar Zamfara ya bayyana hakan ne bayan ganawa da Tinubu a fadar shugaban ƙasa, inda ya ce sun amince da jadawalin rangadin jihohi da za a gudanar gabanin zaɓen shekarar 2027.

Asali: Legit.ng