Abu Ya Girma: An Yi Zarge Zarge Masu Nauyi kan INEC dangane da Zaben 2027

• Kwamitin yakin neman zaben Makinde-Daura ta zargi wasu jami’an INEC da shirin bai wa wakilan APC miliyoyin katunan PVC da masu su ba su karɓa ba
• Ya nemi INEC ta bayyana adadin katunan da ba a karɓa ba, inda suke da kuma matakan da ake ɗauka domin kare su
• MDPCO ta ce amfani da katunan PVC da ba a karɓa ba wajen magudin zaɓe zai fuskanci turjiya, tare da kira ga jama’a su kasance cikin shiri

​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Kwamitin Yaƙin Neman Zaɓen Shugaban Ƙasa na Makinde-Daura (MDPCO) ta yi zargin cewa wasu jami’an INEC na shirin bai wa wakilan jam’iyyar APC miliyoyin katunan zaɓe na dindindin (PVC) da masu su ba su karɓa ba gabanin zaɓen 2027.

Kwamitin ya ce akwai zarge-zargen da ke yawo a bainar jama’a game da yadda ake kula da katunan PVC da ba a karɓa ba, da kuma yiwuwar wasu mutane su samu damar shiga wuraren da aka ajiye su ba bisa ka’ida ba.

Kara karanta wannan

Tirkashi: An huro wutar da za ta iya sanya INEC hana Pantami da wasu yin takara a 2027

Kwamitin ya nemi INEC ta yi bayani

Jaridar Leadership ta ce hakan na kunshe ne a cikin wata sanarwa da daraktan sadarwa na kwamitin, Richard Ihediwa, ya sanya wa hannu.

A cikin sanarwar, kwamitin MDPCO ya yi kira ga hukumar INEC da ta gaggauta mayar da martani kan zarge-zargen.

Kwamitin ya ce zargin ya ɗora wa INEC babban nauyi na tabbatar da tsaron kayan zaɓe da kuma ingancin tsarin rajistar masu zaɓe.

Ya kuma yi zargin cewa wasu jami’an zaɓe da aka yi wa katsalandan na iya taimakawa wajen samun damar amfani da katunan PVC da ba a karɓa ba.

A cewar kwamitin, ana iya amfani da katunan wajen shigar da mutanen da ba su yi rajista ba zuwa rumfunan zaɓe domin yin tasiri kan sakamakon zaɓe a wasu wurare.

“PVC da ba a karɓa ba ba kadarar siyasa ba ce”

MDPCO ya jaddada cewa katunan PVC da ba a karɓa ba bai kamata a ɗauke su a matsayin kadarar da za a iya rabawa ko amfani da ita wajen siyasa ba.

Kara karanta wannan

INEC ta yi wa 'yan siyasa kudin goro, ta gargade su kan zaben 2027

“PVC da ba a karɓa ba bai kamata ya zama wani abu da za a iya zubar da shi ba, kuma bai kamata ya zama kadarar siyasa ga maƙiyan sahihin zaɓe ba,” in ji kwamitin.

Ta ce dole ne a ci gaba da kula da katunan a matsayin kayan zaɓe masu muhimmanci, tare da tabbatar da cewa ba su shiga hannun mutanen da ba su da izini ba.

An danganta zargin da goyon bayan Makinde

MDPCO ya danganta zargin da abin da ya bayyana a matsayin ƙarin goyon bayan da ɗan takarar shugaban ƙasa na Allied Peoples Movement (APM), Injiniya Seyi Makinde, da mataimakinsa, Alhaji Lawal Musa Daura, ke samu.

Kwamitin ya yi zargin cewa APC na ƙoƙarin yin katsalandan ga tsarin INEC saboda goyon bayan da ta ce tikitin APM ke samu a sassa daban-daban na ƙasar.

Sai dai wannan zargi ne daga kwamitin yaƙin neman zaɓen, kuma ba a gabatar da wata hujja a cikin sanarwar da ta tabbatar da cewa jami’an INEC ko APC na shirin yin hakan ba.

ADC ba za ta amince da magudin zabe ba

Kara karanta wannan

Gwamna Zulum ya umarci cafke 'yan 'Tinubu Must Go a Borno'? An ji yadda zancen yake

A wani labarin kuma, kun ji cewa shugaban jam’iyyar ADC, Sanata David Mark, ya ce jam’iyyar za ta bi ƙa’idojin zaɓen 2027, amma ba za ta amince a yi mata magudin zaɓe ba.

Sanata David Mark ya ce ADC za ta mutunta dokokin hukumar zaɓe ta ƙasa, INEC, da kuma ƙa’idodin jam’iyyar.

Asali: Legit.ng