Jirgin Rundunar Sojojin Najeriya Ya Yi Hatsari, Ana Fargabar Mutane Da Dama Sun Mutu

• Ana fargabar mutuwar mutane da dama bayan wani jirgin sojoji ya yi hatsari a Igbokoda, hedkwatar Karamar Hukumar Ilaje ta Jihar Ondo
• Lamarin ya faru ne a wannan yankin da ke gabar teku, inda ya jefa mazauna garin cikin firgici da tashin hankali
• Har yanzu ba a tabbatar da irin helikwaftan ko adadin mutanen da ke cikinsa ba yayin da jami'an suka fara aikin bincike da ceto

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Ondo, Nigeria - Rahotannin da muka samu yanzu sun nuna cewa wani jirgin helikwafta na rundunar sojin Najeriya ya yi hatsari a Igbokoda, hedikwatar Karamar Hukumar Ilaje ta Jihar Ondo.

Lamarin ya faru ne da sanyin safiyar yau Litinin a Larada Street da ke Ilaje, inda rahotanni suka ce jirgin ya fada cikin kogi.

Kara karanta wannan

Gwamnatin tarayya ta fitar da bayanai kan jirgin saman sojoji da ya yi hatsari

Har zuwa lokacin hada wannan rahoton da jaridar The Nation ta wallafa, ba a san adadin mutanen da ke cikin jirgin ko kuma sunayen wadanda ke cikinsa ba.

Jirgin sojojin Najeriya ya yi hatsari

Shugaban Karamar Hukumar, Maurice Oripelaye, wanda ya yi magana da manema labarai ta wayar tarho, ya tabbatar da faruwar lamarin.

Ya ce an gano kayayyakin soji a wurin da jirgin ya fadi wanda ya sa aka far zargin jirgin na sojoji ne, amma ba a iya tabbatar da adadin jami’an da ke cikinsa ba.

Wasu mazauna garin da suka tabbatar da faruwar lamarin sun shaida cewa jami’an agaji da hukumomin tsaro sun tattara jami’ansu zuwa wurin.

“Yayin da nake magana da ku, an kara kaimi wajen neman wadanda ka iya tsira da kuma tantance yawan wadanda abin ya shafa,” in ji daya daga cikin majiyoyin.

An kuma gano cewa jami’an Rundunar Sojojin Ruwa ta Najeriya da ke Forward Operating Base (FOB) sun shiga aikin ceto. Har yanzu ba a gano musabbabin hatsarin ba.

Kara karanta wannan

Sama da mutane 30 sun mutu da hatsarin jirgi ya rutsa da masu zuwa jana'iza a Najeriya

Rundunar yan sanda ta tabbatar

Yayin da yake tabbatar da aukuwar lamarin, Jami'in Hulɗa da Jama'a na Rundunar 'Yan Sandan Jihar Ondo, DSP Abayomi Jimoh, ya bayyana sun samu labarin hatsarin jirgin saman.

A rahoton Daily Trust, Jimoh ya ce:

“Rundunar 'Yan Sandan Jihar Ondo ta tabbatar da rahoton hatsarin jirgin saman da ya afku a Igbokoda da ke Karamar Hukumar Ilaje a Jihar Ondo a ranar Litinin.

"Cikakkun bayanan afkuwar lamarin na ci gaba da bayyana sannu a hankali, yayin da ake ci gaba da gudanar da kokari domin gano ainihin yadda abin ya faru.”

Rundunar ta kuma yi kira ga al'umma, musamman mazauna garin Igbokoda da makwabtansu, da su kwantar da hankalinsu tare da kauce wa yada labaran jita-jita da ba a tantance su ba.

Mutane 30 sun mutu a hatsarin jirgi

Kun ji cewa hukumar SEMA ta jihar Benuwai ta tabbatar da mutuwar fasinjoji sama da 30 a hatsarin jirgin ruwa a mashigar Buruku.

Kara karanta wannan

Tashin hankali: Hatsarin jirgi ya rutsa da mutane 70 a hanyar dawowa daga jana'iza

Jirgin ruwan na gargajiya wadda aka hada da katako ya kife ne yankin mashigar Buruku da ke kogin Katsina-Ala, a Karamar Hukumar Buruku ta jihar Benuwai.

Mai magana da yawun Benue-SEMA, Tema Ager, ya ce zuwa yanzu an gano gawarwaki hudu ciki har da wani limamin Cocin Anglican.

Asali: Legit.ng