2027: Bayan Hukuncin Kotu, PDP Ta Dauki Matsaya kan Takarar Sheikh Pantami a Jihar Gombe

• PDP ta ce za ta sake gudanar da zaɓen fitar da gwani na gwamnan Gombe bayan kotu ta soke takarar Farfesa Isa Pantami
• Kotun Tarayya ta umarci jam’iyyar ta gudanar da sabon zaɓen fitar da gwani cikin kwanaki 30 masu zuwa
• Jam’iyyar adawa ta PDP ta ce za ta bi umarnin kotu tare da tabbatar da bin tsarin dimokuraɗiyya da dokokinta

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Gombe, Nigeria - Jam’iyyar PDP ta ce za ta gudanar da sabon zaɓen fitar da gwani na neman kujerar gwamnan Jihar Gombe a zaben 2027.

Hakan ya biyo bayan hukuncin Babbar Kotun Tarayya na soke zaben da ya samar da tsohon Ministan Sadarwa da Tattalin Arzikin Zamani, Farfesa Isa Ali Pantami, a matsayin ɗan takarar PDP a Gombe.

Kara karanta wannan

Bayan ƙarewar wa'adin INEC, ina makomar Pantami da Gwarzo da sauransu?

Sakataren Yaɗa Labarai na PDP ta kasa, Haruna Mohammed Jungudo, ya bayyana hakan a cikin wata sanarwa ranar Alhamis, kamar yadda Punchi ta ruwaito.

Wane hukunci kotu ta yanke?

Babbar Kotun Tarayya da ke zama a Gombe ta soke fitowar Pantami a matsayin ɗan takarar gwamna na PDP, sannan ta umarci jam’iyyar ta gudanar da sabon zaɓen fidda gwani cikin kwanaki 30.

Mai shari’a Amina Aliyu Mohammed ce ta yanke hukuncin, bayan wata ƙara da mai neman tikitin gwamna na PDP, Usman Aliyu Garry, ya shigar inda ya ƙalubalanci tsarin da ya samar da Pantami a matsayin ɗan takarar jam’iyyar..

Pantami ya samu tikitin PDP ne ta hanyar amincewar murya a wani zaɓen fidda gwani da aka gudanar a watan Mayu 2026, bayan ya fice daga jam’iyyar APC.

PDP za ta bi umarnin kotu

Da yake martani kan hukuncin, Jungudo ya ce PDP na nan kan matsayinta na tabbatar da dimokuraɗiyyar cikin gida, bin matakan da suka dace da kuma kiyaye kundin tsarin mulkinta da ƙa’idojin zaɓe.

Kara karanta wannan

Kotu ta amince da bukatar matashin da ake zargi da taɓa mutuncin gwamna a Facebook

Sanarwar ta ce:

"PDP ta lura da hukuncin Babbar Kotun Tarayya da ke zama a Gombe, wanda ya soke zaɓen fidda gwani na jam’iyyar na farko na neman kujerar gwamnan Jihar Gombe tare da umartar gudanar da sabon zaɓe.

“PDP, a matsayinta na jam’iyya mai biyayya ga doka, tana mutunta tsarin doka da ikon bangaren shari’a. Saboda haka, jam’iyyar za ta nazarci hukuncin a hankali tare da ɗaukar matakan gaggawa domin tabbatar da bin umarnin kotun.

“Saboda haka, jam’iyyar za ta fara matakan da suka dace domin gudanar da sabon zaɓen fidda gwani na neman kujerar gwamnan Jihar Gombe bisa hukuncin kotun.”

Wani lauya mai zaman kansa da ke aiki a Kaduna, Barista Tukur Badamasi ya yi wa Legit karin haske kan bin umarnin kotu musamnan ka batun takarar Pantami.

Tukur ya ce a hukuncin da ya karanta, kotu ba ta hana Pantami shiga sabon zaben fitar da gwanin da za a sake gudanarwa ba.

Kara karanta wannan

Bayan zargin son Pantami, Wike ya magantu kan taimakon wani dan takara

"Hukuncin ya soke hanyar da PDP ta bi ta gudanar da zaben farko ne amma banga inda ya hana Malam sake neman takara ba, saboda haka idan PDP ta bi umarnin kotu ta sake zabe, shike nan."

"Amma ainda nake tunanin za a samu matsala shi ne batun yaushe ya shiga PDP da kuma wa'adin da INEC ta sanya na mika rijistar mambobin jam'iyyu, amma dai na ga hukuncin bai taɓo nan ba gaskiya," in ji shi.

Pantami da Gwamna za su kece raini

Kun ji cewa ɗan takarar gwamnan jihar Gombe na jam'iyyar APC, Dr Jamil Isyaku Gwamna, ya ce a shirye yake ya yi muhawara da sauran 'yan takara.

Ɗan takarar gwamnan jihar na PDP, Farfesa Isa Ali Pantami, shi ma ya ce a shirye yake ya halarci muhawarar domin tattauna tsare-tsare, nasarori da makomar Gombe.

Asali: Legit.ng