Peter Obi Ya Ki Karbar Tayin Zama Abokin Takarar Atiku a ADC? An Ji Gaskiyar Zance

• Peter Obi ya yi magana kan batun cewa ya ki karbar tayin zama abokin takarar Atiku Abubakar a ƙarƙashin jam’iyyar ADC a zaɓen 2027
• Ɗan takarar na NDC ya ce batun haɗin gwiwar ’yan adawa ya kamata ya shafi jam’iyyun siyasa, ba tattaunawar ’yan siyasa guda biyu kawai ba
• Obi da Atiku sun kasance cikin hadakar ’yan adawa da ta haɗa kai a ƙarƙashin ADC a 2025, kafin daga bisani kowannensu ya fito a matsayin ɗan takarar wata jam’iyya

​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Ɗan takarar shugaban ƙasa na NDC, Peter Obi, ya musanta rahotannin cewa ya ƙi karbar tayin zama abokin takarar Atiku Abubakar, ɗan takarar shugaban ƙasa na ADC, a zaɓen 2027.

Peter Obi ya ce ba a taɓa yi masa irin wannan tayin ba, don haka ba zai yiwu ya ƙi wata shawara da ba a gabatar masa da ita ba.

Kara karanta wannan

Shugaban Amurka ya 'tsorata', ya fara laluben lokacin dakatar da yaki da ƙasar musulunci ta Iran

Tsohon Gwamnan na Jihar Anambra ya bayyana hakan ne yayin wata hira da Arise TV ranar Alhamis, 10 ga watan Satumban 2026, inda yake amsa tambayoyi kan yiwuwar haɗin gwiwar jam’iyyun adawa gabanin zaɓen 2027.

Obi ya ce ba a taɓa yi masa tayin ba

Obi ya ce bai san inda labarin cewa ya ƙi zama mataimakin Atiku ya samo asali ba, yana mai cewa ba a taɓa gabatar masa da wannan zaɓin ba.

“Ban san inda aka faɗi hakan ba. Ban ma kasance a matsayin da za a yi mini irin wannan tayin ba, balle in ƙi shi,” in ji Obi.

Kalaman nasa sun zo ne yayin da ake sake tattauna yiwuwar jam’iyyun adawa da ’yan takaransu su haɗa kai domin kalubalantar jam’iyya mai mulki a zaɓen 2027.

Ya ce haɗin gwiwa ba batun mutum ɗaya ba ne

Obi ya ce idan za a yi wani haɗin gwiwa tsakanin jam’iyyun adawa, bai kamata a mayar da batun zuwa tattaunawar mutum da mutum ba.

Kara karanta wannan

Peter Obi ya kinkimo maganar kisan Sardauna, ya bayar da shawara

A cewarsa, dole ne shugabannin jam’iyyun da abin ya shafa su zauna su tattauna yadda za a aiwatar da irin wannan haɗin gwiwa.

“Ni ɗan takara ne, haka ne. Shugabana Atiku ma ɗan takara ne na wata jam’iyya. Ni kuma ɗan takara ne na wata jam’iyya. Don haka, abin da ake magana a kai shi ne jam’iyyu biyu su haɗu; ba batun shi ko ni ba ne,” in ji shi.

Obi da Atiku sun taɓa kasancewa cikin ƙawancen adawa

Obi da Atiku na cikin ’yan siyasar adawa da suka shiga ƙawancen da aka kafa a ƙarƙashin ADC a shekarar 2025.

An kafa ƙawancen ne a matsayin wani yunƙuri na ’yan siyasar adawa na samar da dandali guda kafin zaɓen 2027.

Sai dai daga baya tsarin siyasar ya sauya, inda Obi ya zama ɗan takarar shugaban ƙasa na NDC, yayin da Atiku ya zama ɗan takarar ADC.

Peter Obi ya yi magana kan Tinubu

A wani labarin kuma, kun ji cewa Peter Obi, ya ce akwai lokutan da yake ganin ba Shugaba Bola Tinubu ba ne ke da cikakken iko kan gwamnatinsa ba.

Obi ya ce ya kamata shugaban kasa da kansa ya riƙa yi wa ’yan Najeriya bayani kan batutuwan da suka shafi ƙasar, maimakon barin mataimakansa su riƙa magana a madadinsa.

Asali: Legit.ng