Murnar Ranar Ƴanci: Gwamna Ya Yi Bajinta, Ya Naɗa Hadimai 1700 a Gwamantinsa

• Gwamnan Ebonyi, Francis Nwifuru, ya naɗa tsofaffin shugabannin ƙananan hukumomi 10 a matsayin masu ba shi shawara na musamman
• Nwifuru ya rantsar da waɗanda ya naɗa yayin bikin cika shekaru 30 da ƙirƙirar Ebonyi, tare da miƙa sandar ofis ga sarakunan gargajiya uku
• Gwamnan ya ce gwamnatinsa ta mai da hankali kan ilimi, lafiya, tituna, ababen more rayuwa, noma, tsaro da bunƙasa jarin ɗan’adam tun 2023

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abakaliki, Ebonyi - Gwamnan Jihar Ebonyi, Francis Nwifuru, ya naɗa tsofaffin shugabannin ƙananan hukumomi 10 a matsayin masu ba shi shawara na musamman.

Majiyoyi sun tabbatar da gwamnan ya kuma naɗa wasu hadimai 1,710 a matsayin mataimakan zartarwa.

An rantsar da waɗanda aka naɗa ne a filin wasa na Abakaliki Township ranar Laraba, yayin bukukuwan cika shekaru 66 da samun ‘yancin Najeriya da kuma shekaru 30 da ƙirƙirar Jihar Ebonyi, cewar Punch.

Kara karanta wannan

Da gaske Tinubu ya roƙi Trump ya rufa masa asiri kan zargin safarar ƙwaya?

Gwamna ya ba sarakuna sandar mulki

Nwifuru ya kuma miƙa sandar mulki ga sarakunan gargajiya uku daga ƙananan hukumomin Afikpo, Edda da Ishielu, yana mai cewa ƙirƙirar Ebonyi sakamakon buri, sadaukarwa da jajircewar waɗanda suka kafa jihar ne.

Ya ce cikin shekaru 30 da jihar ta yi, Ebonyi ta sauya daga yanayin da aka ƙirƙire ta zuwa kasancewa “cikakkiyar jiha mai alfahari” a Tarayyar Najeriya.

Nwifuru ya ce ya kamata al’ummar jihar su duba inda suka fito tare da tambayar irin makomar da suke shiryawa al’ummomin da za su zo bayansu.

Ya ce wannan batu ne ke jagorantar manufofi da shirye-shiryen gwamnatinsa, musamman yadda ilimi, bunƙasa jarin ɗan’adam, ababen more rayuwa da samar da damammaki suke cikin abubuwan da ta fi bai wa muhimmanci.

Gwamnan ya ce tun bayan hawansa mulki a shekarar 2023, gwamnatinsa ta mayar da hankali wajen inganta tituna, gadoji, asibitoci da sauran ababen more rayuwa, tare da zuba jari a ilimi, lafiya, noma, tsaro da bunƙasa jarin ɗan’adam.

Kara karanta wannan

Kasa za ta yi saiti, Tinubu ya juyo kan abin da ya fi damun yan Najeriya

Kokarin gwamna Nwifuru a bangaren ilimi

Nwifuru ya ce gwamnatinsa ta gina tubalan azuzuwan zamani guda 39 a faɗin ƙananan hukumomi 13 na jihar.

Ya ƙara da cewa gwamnati ta inganta samar da kayan koyarwa da koyo, ciki har da littattafan karatu, kayan bincike, kayan koyar da yara ƙanana, kujeru da sauran kayayyakin makarantu.

A cewarsa, gwamnati ta kuma samar da guraben karatu na digiri na gaba a cikin Najeriya da ƙasashen waje ga ɗaliban Ebonyi da suka cancanta, cewar Vanguard.

Ya ce an kammala ginin Majalisar Dattawa a Jami’ar ICT da ke Oferekpe Agbaja, yayin da ake ci gaba da aikin gina gine-ginen kwanan ɗalibai guda takwas masu hawa uku.

Gwamna ya nada hadimai fiye da 1000

An ji cewa Gwamnan Ondo ya nada kwamishina guda daya, masu ba shi shawara uku, manyan mataimaka da mataimaka na musamman da dama.

Aiyedatiwa ya tura sunan Erelu Taibat Oloruntoba daga Akoko Arewa ta Yamma zuwa Majalisar Dokokin Ondo domin tantancewa.

Sababbin masu ba gwamna shawara sun hada da Abimbola Fajolu kan muhalli, Ade Adeniyi kan ci gaban karkara da Muyiwa Ogunyemi kan sufuri.

Asali: Legit.ng