An Kashe Mutane 18 ana Saura Kwana 6 Zaben Gwamna, APC Ta Rasa Mambobi 10

• An shiga fargabar sake barkewar rikici a Osun yayin da ake ƙara kusantar zaɓen gwamna na 15 ga Agusta
• APC ta ce an kashe aƙalla mambobinta 10 tun bayan fara kamfen, yayin da Accord Party ta ce ta rasa mambobi takwas
• Kafafen kare dimokuraɗiyya sun ce an samu hare-haren siyasa 44 da suka yi sanadin mutuwar mutane 13 a jihar tsakanin Oktoba 2025 da Yuni 2026

Sani Hamza ƙwararren edita ne a fannin nishaɗi, al'amuran yau da kullum, da kuma siyasa, wanda ke da shekaru sama da takwas a aikin jarida

Osun – Sabbin fargabar barkewar tashin hankali sun mamaye Jihar Osun yayin da ake tunkarar zaɓen gwamna da za a gudanar a ranar 15 ga Agusta, inda manyan jam’iyyun adawa biyu, APC da Accord Party, suka yi zargin cewa sun rasa mambobi 18 gaba ɗaya a yayin shirye-shiryen zaɓen.

Lamarin ya ƙara jawo damuwa kan tsaron masu kaɗa kuri’a, jam’iyyun siyasa da jami’an zaɓe, musamman bayan sanar da tura jami’an ’yan sanda 15,000 domin aikin tabbatar da tsaro a lokacin zaɓen.

Kara karanta wannan

Ana dab da zaben gwamna, 'yan sanda sun cafke kwamishina a jihar Osun

Hare-haren siyasa sun ƙaru a Osun

Sai dai matakin tura jami’an tsaron ya haifar da ra’ayoyi mabambanta tsakanin jam’iyyun siyasa da ƙungiyoyin fararen hula, yayin da ake ci gaba da fuskantar hare-hare da rikice-rikicen siyasa a sassa daban-daban na jihar, in ji rahoton Vanguard.

Tun kafin zaɓen 15 ga Agusta, an samu jerin hare-haren tashin hankali a Osun, ciki har da kai wa magoya bayan jam’iyyu hari, kai farmaki kan ayarin motocin kamfen, harbe-harbe da kuma zargin yunkurin kisan wasu ’yan siyasa.

A watan Mayu, an kashe wani mamba na Accord Party, Kolade Eluyera, a ƙaramar hukumar Irewole.

Jam’iyyar ta zargi wasu magoya bayan APC da hannu a kisan, amma APC ta musanta zargin.

A ranar 3 ga Yuni kuma, an harbe shugaban Accord Party na ƙaramar hukumar Osogbo, Asimiyu Ajibola, inda aka garzaya da shi asibiti domin samun kulawa.

Haka kuma, an kashe wani magoyin bayan Accord Party mai suna Ajayi Rogba a Esa-Oke, a daidai lokacin da harkokin siyasa ke ƙara ɗaukar zafi a jihar.

Kara karanta wannan

Juyin mulki: Abin ɓoye ya fito fili, an gano dalilin Tinubu na ƙara rundunar sojoji

Tun da farko ma, an samu rikice-rikice, harbe-harbe da hare-hare kan ayarin motocin kamfen a Ede, Osogbo da wasu sassan jihar.

An samu mace-mace 13

Ƙungiyar Kimpact Development Initiative ta ce an samu hare-haren da suka shafi zaɓe 44 a Osun tsakanin Oktoba 2025 da Yuni 2026, waɗanda suka yi sanadin mutuwar mutane 13.

Sai dai jam’iyyun siyasar biyu sun gabatar da alkaluman da suka fi wannan yawa dangane da mambobinsu da aka kashe.

Kwamitin yaƙin neman zaɓen APC ya ce an kashe mambobinsa 10 tun bayan fara kamfen, yayin da Accord Party ta ce mambobinta takwas sun rasa rayukansu.

Ba a tabbatar da alkaluman jam’iyyun biyu a matsayin adadin mace-mace guda ɗaya ba, amma zarge-zargen sun ƙara jawo fargabar yiwuwar ɗaukar fansa da sake barkewar rikici kafin, lokacin da kuma bayan zaɓen.

APC ta ce an kashe mambobinta 10

Kwamitin yaƙin neman zaɓen APC ya ce yawan jami’an tsaron da aka tura ba shi ne muhimmin abu ba, sai dai ƙwarewarsu, kayan aikin da suke da su da kuma iya tabbatar da zaɓe cikin ’yanci, adalci da gaskiya.

Kara karanta wannan

Yan APC sun samu raunuka bayan yan daba sun tarwatsa kamfen APC da harbe harbe

Wani mamba na kwamitin kamfen ɗin APC, Kehinde Ayantunji, wanda ya yi magana a madadin shugaban kwamitin, ya ce jami’an tsaro 15,000 kaɗai ba za su wadatar ba idan ba su da kayan aiki da horon da ya dace domin tabbatar da zaman lafiya yayin zaɓen.

“Tun farkon wannan kamfen, an kashe aƙalla mambobin jam’iyyarmu 10 a Ilesa, Iwo, Osogbo, Ijebu-Jesa da wasu al’ummomi. Abin takaici ne ganin cewa rayukan mutane suna cikin wannan lamari, kuma babu wani zaɓe da ya cancanci a rasa ran mutum saboda shi.”

- Kehinde Ayantunji.

Shirin ba kuri'a kariya a Osun

A wani labari, mun ruwaito cewa, ICPC ta ce za ta tura jami'anta zuwa dukkan ƙananan hukumomi 30 na Jihar Osun domin sa ido kan zaɓen gwamna da za a yi ranar 15 ga Agusta, 2026.

Matakin ya na daga cikin riga-kafi da ake yi na sayar da kuri'a ko aikata wani abu da zai jawo matsala a zaben da za a gudanar a cikin makonni.

Hukumar ta yi gargaɗin cewa mai ba da kuɗi da mai karɓa wajen sayen ƙuri'a duk sun karya doka kuma za a kama su tare da gurfanar da su a kotu.

Asali: Legit.ng