Mutane Sun Fusata bayan 'Yan Sanda Sun Hana 'Yan 'Tinubu Must Go' Yin Taro a Kano

• Abba Hikima, ɗaya daga cikin waɗanda suka kafa ƙungiyar Tinubu Must Go, ya ce ’yan sanda sun hana su shiga wurin da suka tanada domin taro a Kano
• Lauyan ya yi zargin cewa an girke motocin ’yan sandan tafi-da-gidanka sama da 10 a wurin, duk da cewa sun biya kuɗin amfani da wajen taron
• Kakakin rundunar ’yan sandan Kano, CSP Abdullahi Haruna Kiyawa, bai amsa kiran waya da saƙonnin da aka aika masa domin jin dalilin matakin ba

​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Kano - Wasu mambobin ƙungiyar “Tinubu Must Go” sun nuna rashin amincewarsu da matakin da suka ce ’yan sanda suka ɗauka na tare hanyar shiga wurin da suka shirya gudanar da taronsu a jihar Kano.

Abba Hikima, lauya kuma ɗaya daga cikin waɗanda suka kafa ƙungiyar, ya nuna damuwa kan lamarin, yana zargin jami’an ’yan sanda da hana su shiga wurin taron.

Kara karanta wannan

Kakar miliyoyin matasa ta yanke saƙa, an fadada shirin tallafin rage talauci a Najeriya

Abba Hikima ya bayyana hakan ne wani bidiyo kai-tsaye da ya wallafa a shafinsa na Facebook da aka tabbatar nasa ne a ranar Lahadi, 11 ga Oktoba, 2026.

Hikima ya zargi ’yan sanda da tare wurin taron

Lauyan sanye da riga da hula mai rubutun “Tinubu Must Go”, ya yi zargin cewa an ajiye motocin ’yan sandan tafi-da-gidanka kusan 10 a wurin da suka shirya taron.

Ya ce sun taru ne a jihar Kano domin amfani da ’yancinsu, haɗuwa cikin ’yanci, musayar ra’ayoyi da kuma wayar da kan juna kan buƙatar sauya gwamnatin Tinubu a zaɓen 2027.

“A yau, 11 ga Oktoba, 2026, mun taru a nan jihar Kano domin amfani da ’yancinmu na asali, da haɗuwa cikin ’yanci, domin musayar ra’ayoyi da kuma wayar da kan juna kan buƙatar cire gwamnatin Bola Ahmed Tinubu daga mulki a Najeriya."

“A bayyane yake ga ’yan Najeriya cewa Tinubu ya gaza. A bayyane yake ga kowa cewa ya gaza, don haka akwai buƙatar ’yan Najeriya su fito su cire shi daga mulki."

Kara karanta wannan

Yadda aka tono gawar basarake a Kano bayan 'yan bindiga sun kashe shi

“Amma a yau, kamar yadda aka saba, kuma a matsayin wani ɓangare na cin hanci da rashawa da suka zama ruwan dare a tsarin ƙasar nan, rashin tsaro, sakaci da rashin adalci, za ku ga an ajiye motocin ’yan sandan tafi-da-gidanka sama da 10 a nan."

“An ajiye su ne domin hana mu shiga wani wuri na musamman da muka biya kuɗin amfani da shi. Mun zo ne domin gudanar da taro da amfani da ’yancinmu na ’yan ƙasa. Wannan ma ya ƙara tabbatar da dalilin da ya sa Tinubu dole ya tafi.”

- Abba Hikima

Hikima ya ce ya yi magana da kwamishinan ’yan sanda

Abba Hikima ya bayyana cewa ya tattauna ta waya da kwamishinan ’yan sandan jihar Kano, wanda ya gaya masa cewa ya kamata su sanar da jami’an tsaro game da taron.

Sai dai ya ce ya tabbatar wa kwamishinan cewa taron zai gudana cikin lumana, kuma za su kiyaye dokokin ƙasa.

"Mu ba masu laifi ba ne, ba ’yan daba ba ne, ba ’yan ta’adda ba ne, kuma ba mu aikata wani laifi ba. Babu wani abu da ba daidai ba a abin da muke yi yanzu."

“Abin da muke yi yana cikin iyakokin doka. Ina so na bayyana cewa a jiya, kwamishinan ’yan sandan jihar Kano, Ibrahim Bakori, ya kira ni ta waya, ya ce bisa al’ada ya kamata na sanar da su game da taron."

Kara karanta wannan

An ga tashin hankali da 'yan ta'adda suka hallaka sojoji da dan kasar waje a Kebbi

“Na ce masa, ‘Ranka ya daɗe, taronmu zai gudana ne a cikin wani wuri da aka killace, kuma za mu gudanar da shi cikin lumana. Mu lauyoyi ne."

- Abba Hikima

Hikima ya ƙara da cewa, a fahimtarsa, doka ba ta buƙatar mutum ya nemi izinin ’yan sanda kafin gudanar da taro.

Ya yi nuni da sashe na 39 na Kundin Tsarin Mulkin Najeriya, wanda ya ce yana ba ’yan ƙasa ’yancin bayyana ra’ayoyinsu, da kuma sashe na 40 da ya shafi ’yancin haɗuwa da kafa ƙungiyoyi. Ya kuma ambaci sashe na 35 game da ’yancin mutum.

Ƙungiyar ta ce za ta ci gaba da gudanar da taruka

Abba Hikima ya zargi ’yan sanda da zaluntar masu taron, yana mai cewa wasu jami’an sun gaya masa cewa ba su da matsala da taron, amma ba sa son su sanya kayan da ke ɗauke da tambarin “Tinubu Must Go”.

Ya kuma ce hukuncin Kotun Ɗaukaka Ƙara da suka dogara da shi yana nan daram, don haka ba ya ganin wajibi ne ya sanar da jami’an tsaro kafin gudanar da gangamin siyasa.

Kara karanta wannan

INEC ta raba gardama, ta fadi matakin dauka kan jam'iyyun da suka karya dokar zabe

Hikima ya ƙara da cewa za su iya shirya zanga-zanga da sauran ayyukan nuna rashin amincewa a nan gaba, yana mai cewa za su ci gaba da fafutukarsu. An ji wasu daga cikin mutanen da ke wurin suna rera taken “Tinubu Must Go”.

’Yan sandan Kano ba su yi martani ba

Kakakin rundunar ’yan sandan jihar Kano, CSP Abdullahi Haruna Kiyawa, bai amsa kiran waya ko saƙonnin rubutu da aka aika masa ta waya da WhatsApp ba.

An tuntube shi ne domin jin dalilin da ya sa jami’an ’yan sanda suka tare wurin taron, amma bai mayar da martani ba har zuwa lokacin kammala rahoton.

Makinde ya bayar da shawara kan Tinubu

A wani labarin kuma, kun ji cewa dan takarar shugaban ƙasa na jam’iyyar Alliance People’s Movement (APM), Seyi Makinde, ya ba 'yan Najeriya shawara kan Shugaba Bola Ahmed Tinubu.

Gwamna Makinde ya buƙaci ’yan Najeriya su riƙa yi wa Shugaba Bola Tinubu hisabi kan alkawuran da ya ɗauka, sannan su ƙi zaɓensa a zaɓen 2027.

Asali: Legit.ng