Iran Ta Kakkabo Jirgin Yaƙin Amurka Marar Matuki a Mashigar Hormuz

Iran Ta Kakkabo Jirgin Yaƙin Amurka Marar Matuki a Mashigar Hormuz

  • Rundunar dakarun sojin Musulunci ta Iran ta ce ta kakkabo jirgin yaƙin Amurka marar matuki samfurin MQ-1 a mashigar Hormuz
  • Iran ta bayyana cewa jirgin shi ne na huɗu da ta kakkabo cikin sa'o'i 24 kamar yadda rahotanni daga waje suke bayyanawa
  • Amurka ba ta tabbatar ko musanta ikirarin Iran ba har zuwa lokacin haɗa wannan rahoto, ana ci gaba da jiran bahasi daga kasar

Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!

Rundunar sojin juyin juya halin Musulunci ta Iran (IRGC) ta sanar a ranar Lahadi cewa ta kakkabo wani jirgin yaƙin Amurka marar matuki samfurin MQ-1 a gabashin mashigar Hormuz.

A cewar rundunar, wannan shi ne jirgin yaƙin Amurka marar matuki na huɗu da ta yi ikirarin kakkabowa cikin sa'o'i 24.

Idan baku manta ba, ana ci gaba da kai ruwa rana tsakanin kasar Iran da yadda hare-haren Amurka da Isra'ila a yankin.

Yadda Iran ta kakkabo jirgin Amurka
Jirgin MQ-1 na Amurka | Hoto: Watchara Phomicinda/MediaNews Group/The Press-Enterprise | Misali kawai aka yi da wannan hoton
Source: Getty Images

Iran ta yi karin bayani

A cikin wata sanarwa a takaice, IRGC ta bayyana cewa jirgin MQ-1 ne, wanda ake amfani da shi wajen tattara bayanan sirri da kuma kai hare-hare.

Kara karanta wannan

Iran ta kakkabo jirgin yakin Amurka a kusa da mashigar Hormuz

Rundunar ta ce lamarin ya faru ne a gabashin mashigar Hormuz, wata muhimmiyar hanyar ruwa da ta haɗa Tekun Fasha da Tekun Oman.

Ta ƙara da cewa jirgin na cikin jerin jiragen Amurka da ta kai wa hari cikin kwana guda. Iran ta bayyana lamarin a matsayin gagarumar nasara wajen kare ruwanta.

Amurka ba ta mayar da martani ba

A halin da ake ciki, rundunar sojin Amurka ta CENTCOM ba ta fitar da sanarwar da ta tabbatar ko musanta ikirarin Iran ba.

Haka kuma, babu wata sanarwa daga jami'an Amurka ko Ma'aikatar Tsaron ƙasar, Pentagon, har zuwa lokacin haɗa wannan rahoto.

Masu sa ido kan harkokin tsaro sun ce rashin martanin Amurka ya sa ba a san ainihin yadda lamarin ya faru ba, inji rahoton BBC Hausa.

Tasirin lamarin ga tsaron yankin

Ikirarin kakkabo jirgin ya zo ne a daidai lokacin da ake samun ƙaruwar takun saka tsakanin Tehran da Washington kan 'yancin zirga-zirgar jiragen ruwa, takunkuman tattalin arziki da kuma hamayyar siyasa a Gabas ta Tsakiya.

Kara karanta wannan

An ba 'yar Amurka Dala miliyan 4.5 bayan ta yi hira da Shugaba Tinubu? Gaskiya ta bayyana

Mashigar Hormuz na ɗaya daga cikin muhimman hanyoyin da ake bi wajen jigilar man fetur a duniya. Duk wani rikici a yankin na iya shafar kasuwannin duniya.

Masana sun yi gargaɗin cewa ci gaba da samun irin waɗannan al'amura da suka shafi jiragen sama marasa matuki na iya ƙara haɗarin samun kuskuren fahimta tsakanin ƙasashen biyu, musamman yayin da suke ci gaba da gudanar da sintiri da ayyukan sa ido a yankin.

Abin da ake sa ran zai faru

Yayin da ikirarin IRGC ke nuna cewa Iran na ƙalubalantar zirga-zirgar jiragen saman Amurka a yankin, rashin tabbaci daga hukumomin Amurka na nufin har yanzu ba a tabbatar da yadda lamarin ya faru ba.

Ana sa ran gwamnatocin yankin da masu sa ido kan harkokin ƙasa da ƙasa za su ci gaba da bibiyar lamarin da kuma duk wani sabon bayani da zai fito daga ɓangarorin biyu.

Hakazalika, ana ci gaba da muhawara kan gaskiyar Amurka da Iran a wannan yaki da ke aukuwar tun farkon shekarar 2026 da ke kan gabar karewa.

Asali: Legit.ng

Authors:
Salisu Ibrahim avatar

Salisu Ibrahim (Head of Hausa Desk) Salisu holds BSc in IT (IOU, 2021) and leads the Hausa Desk at Legit.ng. He is AfricaCheck's ambassador and HumAngle Technology and Civic Impact Fellow. He brings over five years of experience in writing, publishing and management. Trained by Reuters, AFP, and Solutions Journalism Network, he curates news stories for the Hausa-speaking audience. His commitment to excellence has earned him recognition, including the Legit Fearless Team Player of the Year 2023 and 2024 Distinguished Editorial Leadership Award. Email: salisu.ibrahim@corp.legit.ng