Abubakar Malami Ya Yi Magana da Ake Zarge Shi da Cin Hanci a Shari'ar Mambilla

• Tsohon Antoni-Janar na Tarayya Abubakar Malami ya yi maraba da nasarar Najeriya a shari’ar aikin wutar lantarkin Mambilla
• Malami ya musanta zargin cewa ya kulla wata yarjejeniyar cin hanci da Leno Adesanya na kamfanin Sunrise Power
• Ya ce shari’ar kasuwanci ce ta sasantawa, ba shari’ar laifi ba, don haka hukuncin bai kamata a ɗauke shi a matsayin samun laifin aikata laifi a kansa ba

​​​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon Antoni-Janar na Tarayya kuma tsohon Ministan Shari’a, Abubakar Malami, SAN, ya yi maraba da nasarar Najeriya a shari’ar sasantawa kan aikin samar da wutar lantarkin Mambilla.

Abubakar Malami ya musanta zargin cewa ya kulla wata yarjejeniyar cin hanci da Leno Adesanya na kamfanin Sunrise Power.

Mataimakinsa na musamman kan harkokin yaɗa labarai, Mohammed Doka, ne ya bayyana matsayar Malami a cikin wata sanarwa ranar Talata, 22 ga watan Satumban 2026, cewar rahoton jaridar The Punch.

Kara karanta wannan

'Yan ta'adda sun shiga uku, gwamnatin tarayya ta sayo sababbin jiragen yaki

Kotun ICC ta yi watsi da ƙarar Sunrise

Matakin ya biyo bayan hukuncin kotun sasantawa ta International Chamber of Commerce (ICC), wadda ta yi watsi da ƙarar da Sunrise Power and Transmission Company Limited ya shigar kan Najeriya.

A cikin hukuncin ƙarshe mai shafuka 616, wanda aka gabatar a Paris ranar 16 ga Satumba 2026, kotun ta yi watsi da buƙatun Sunrise da suka shafi aikin Mambilla.

Kotun ta kuma umarci kamfanin da Adesanya su mayar wa Najeriya wani kaso mai yawa na kuɗaɗen da ta kashe wajen kare kanta a shari’ar.

An zargi Malami kan yadda ya tafiyar da yarjejeniya

Sai dai rahotannin hukuncin sun ce kotun ta yi wasu kalamai marasa kyau game da yadda Malami ya tafiyar da wata yarjejeniyar sasanta rikicin da Sunrise.

Rahotannin sun kuma danganta hukuncin da wani zargin cewa an samu yarjejeniyar cin hanci tsakanin Malami da Adesanya.

Da yake martani, Malami ya jaddada cewa shari’ar da aka gudanar shari’ar kasuwanci ce ta sasantawa, ba shari’ar laifi ba.

Kara karanta wannan

Magana ta fito: Dalilin da ya sa Tinubu ya ki zuwa Amurka, ya tura Shettima taron UNGA

“Ba a yanke mini hukuncin laifi ba”

A cikin sanarwar, Malami ya ce bai kamata a gabatar da hukuncin kotun a matsayin hukuncin da ya tabbatar da aikata laifi a kansa ba.

Sanarwar ta ce:

“Shari’ar ta kasance shari’ar sasantawa ta kasuwanci tsakanin ɓangarorin da ke da takaddama. Ba shari’ar laifi ba ce a kan Abubakar Malami, SAN, kuma hukuncin bai kasance hukuncin da ya tabbatar da aikata laifi a kansa ba.”

Sai dai Malami ya amince cewa abubuwan da aka ruwaito daga hukuncin suna da muhimmanci, yana mai cewa ya kamata a duba su bisa cikakken kundin takardu da shaidun da aka gabatar.

Malami ya ba da tarihin rikicin Mambilla

Tsohon AGF ya kuma yi ƙoƙarin bayyana tarihin rikicin da ke tsakanin Sunrise Power da Najeriya kan aikin Mambilla. Ya ce rikicin ya fara ne shekaru kafin ya zama Antoni-Janar na Tarayya.

A cewarsa, Sunrise ta shiga cikin shirin aikin Mambilla a shekarar 2003, yayin da gwamnatoci daban-daban da Antoni-Janar na ƙasa suka gudanar da batutuwan kwangila da suka shafi kamfanin.

Kara karanta wannan

Rigima ta kunno kai a NDC kan kwamitin yakin neman zaben Kwankwaso da Obi

Ya musanta kulla yarjejeniyar cin hanci

Malami ya musanta zargin cewa ayyukan da ya gudanar a matsayinsa na jami’in gwamnati sun samo asali ne daga wata yarjejeniyar cin hanci da Adesanya.

“Malami ya yi watsi da duk wata magana da ke nuna cewa ya gudanar da ayyukansa na gwamnati bisa wata yarjejeniyar cin hanci ko domin samun wata fa’ida ta kuɗi ga kansa.” In ji sanarwar.

Sanarwar ta ƙara da cewa ya kamata a gwada zargin da cikakken bayanan da shaidun da ke cikin kundin shari’ar, ciki har da ko Malami ya taɓa karɓar kuɗi ko wata fa’ida ta kuɗi daga Sunrise, Adesanya ko wata ƙungiya mai alaƙa da su.

Malami ya zabi abokin takara

A wani labarin kuma, kun ji cewa dan takarar gwamnan jam'iyyar ADC a Jihar Kebbi, Abubakar Malami, ya zabi abokin takara a zaben 2027.

Abubakar Malami ya zaɓi Musa Zagi a matsayin mataimakin ɗan takarar gwamna domin tunkarar zaɓen shekarar 2027.

Asali: Legit.ng