"Ba Makamin Azabtarwa ba ne"; Atiku Ya Nuna Damuwa kan Sharuddan Belin El Rufai

• Tsohon gwamnan jihar Kaduna, Nasir Ahmed El-Rufai na ci gaba da zama a tsare bayan ya kasa cika sharuddan belin da aka gindaya masa
• Jagoran adawa, Atiku Abubakar ya nuna damuwa kan tsauraran sharuddan da aka gindaya yayin bayar da belin na Malam Nasir El-Rufai
• Tsohon mataimakin shugaban kasar ya bayyana cewa bai kamata beli ya zama wani makami da za a ci gaba yin azabtarwa da shi ba

​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon mataimakin shugaban kasa Atiku Abubakar ya nuna damuwa game da ci gaba da tsare tsohon gwamnan jihar Kaduna, Mallam Nasir El-Rufai.

Atiku ya nuna damuwa ne biyo bayan kin da babbar kotun tarayya ta yi na sake duba sharuɗɗan beli waɗanda suka kasance masu wahalar cikawa.

Jaridar Daily Trust ta ce Atiku ya bayyana hakan ne a cikin wata sanarwa da hadiminsa, Phrank Shaibu ya fitar a ranar Laraba, 24 ga watan Yunin 2026.

Kara karanta wannan

An daga shari'a, El Rufa'i zai shafe kusan kwana 100 a rufe kafin a dawo kotu

Sharuddan belin El-Rufai sun damu Atiku

Atiku ya ce lamarin yana tayar da tambayoyi masu tayar da hankali game da yadda ake gudanar da shari'a, da kuma ƙaruwar dabi'ar amfani da hanyoyin shari'a a matsayin makami na yaƙar abokan hamayyar siyasa.

Tsohon mataimakin shugaban kasar ya lura cewa ko da yake kotuna suna da iko na sanya sharuɗɗan beli, dole ne a yi amfani da wannan ikon cikin tsari na shari'a da adalci, jaridar The Punch ta kawo labarin.

Ya ce sharuɗɗan da suka kasance sun wuce kima, ba su da ma'ana, ko kuma ba za su yuwu a cika su ba, suna rushe ainihin manufar beli kuma suna zama tamkar tsare mutum ne ta hanyoyin dabaru.

Atiku ya ce bai kamata a tsawwala ba

“Doka ta riga ta bayyana cewa wanda ake zargi ba shi da laifi har sai an tabbatar da hakan. Beli yana nan ne domin kare wancan kariya ta tsarin mulki. Ba a taɓa tsara shi don ya zama wani nagartaccen makami na azabtarwa kafin a yanke hukunci ba.”

Kara karanta wannan

Fadar shugaban kasa ta tanka da Peter Obi ya nemi Tinubu ya yi murabus

“Lokacin da kotu ta toge a kan sharuɗɗan da ke buƙatar wanda ake ƙara ya kawo ma'aikacin gwamnatin tarayya mai mataki na 17 wanda kuma dole ne ya kasance yana da kadarori da za a iya tabbatarwa a Maitama ko Asokoro."

"Tare da cika wasu rukunin sharuɗɗan na daban, 'yan Najeriya suna da haƙƙin su yi tambaya mai sauƙi: shin manufar ita ce a ba da belin ko kuma a tabbatar da cewa belin ya kasance abin da ba za a iya samu ba?”

- Atiku Abubakar

Atiku ya gargadi hukumomin Najeriya

Atiku Abubakar ya yi gargaɗin cewa haɗarin irin waɗannan misalan ya wuce a kan Nasir El-Rufai kaɗai.

“Wannan ba kawai ya shafi mutum guda ba ne. Yana shafar mizanai da ke ƙarfafa al'ummar da ke da dimokuradiyya wadda ke ƙarƙashin tsarin doka."

"Yau El-Rufai ne. Gobe kuma yana iya zama kowane ɗan ƙasa wanda 'yancinsa ya dogara ba ga doka ba, a'a, ga ko zai iya cika sharuɗɗan da 'yan Najeriya kaɗan ne kawai za su iya cikawa."

- Atiku Abubakar

An gabatar da shaida kan El-Rufai

A wani labarin kuma, kun ji cewa lauya Deji Adeyanju ya bayar da shaida a shari'ar da ake yi wa tsohon gwamnan jihar Kaduna, Nasir El-Rufai.

Kara karanta wannan

Ahmed Makarfi: Tsohon gwamnan Kaduna ya samo mafita ga Tinubu kan rashin tsaro

Adeyanju ya shaida wa alkalin kotu cewa El-Rufai ya furta a wata hira ta talabijin cewa sun saurari tattaunawar wayar Nuhu Ribadu.

A karkashin tambayoyin da lauyan El-Rufai, Paul Erokoro, ya yi masa, Adeyanju ya ce bai ji tsohon gwamnan yana cewa shi ne ya yi kutse a layukan wayar Nuhu Ribadu ba.

Wanda ya tantance Muhammad Malumfashi, babban edita a Legit.ng.

Asali: Legit.ng