Atiku Ya Zayyano Kurakuran Gwamnatin Tinubu kan Rashin Tsaro "Ta Ki Daukar Darasi"

• ​Ana ci gaba da fuskantar matsalar rashin tsaro a sassan daban-daban na Najeriya inda ake garkuwa da mutane ciki har da dalibai
• Tsohon mataimakin shugaban kasar Najeriya, Atiku Abubakar, ya soki gwamnatin Bola Ahmed Tinubu kan yadda ta kasa daukar darasi
• Atiku ya bayyana cewa tuni 'yan ta'adda suke sauya dabaru da koyon darussa kan hare-harensu, yayin da suka bar gwamnati a baya

​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon mataimakin shugaban kasa, Atiku Abubakar, ya soki yadda gwamnatin Shugaba Bola Tinubu ke tafiyar da sha'anin rashin tsaro.

Atiku ya bayyana cewa yayin da 'yan ta'adda da 'yan bindiga ke ci gaba da sauya dabarunsu, ita kuwa gwamnatin Najeriya ta kasa koyon darasi daga hare-haren baya domin garambawul ga dabarun yaki da ta'addanci.

Jaridar The Punch ta ce tsohon mataimakin shugaban kasar ya bayyana hakan ne cikin wata sanarwa da hadiminsa, Phrank Shaibu, ya fitar a ranar Alhamis, 4 ga watan Yunin 2026.

Kara karanta wannan

Bayan sace yayar tsohon minista, ƴan bindiga sun harbe shugaban jam'iyyar adawa

Atiku Abubakar ya yi magana kan rashin tsaro

Atiku ya ce ci gaba da yaɗuwar ta'addanci, fashi da makami, da garkuwa da mutane daga Arewacin Najeriya zuwa sauran sassan ƙasar, shaida ce da ke nuna cewa tsarin tsaron ƙasar ya kasa tafiya daidai da sauye-sauyen barazanar tsaro da ake fuskanta.

“'Yan ta'adda suna koyon darasi daga kowane hari. Suna nazarin nasarorinsu da gazawarsu. Suna tace dabarunsu. Suna gano wuraren da ke da rauni. Suna sauyawa kuma su sake ƙaddamar da hari."

"Tambayar da ya kamata 'yan Najeriya su yi tana da sauƙi: Me ya sa gwamnati ba ta yin abin da ya dace ita ma?”

- Atiku Abubakar

Atiku ya ce gwamnati ba ta daukar darasi

Atiku ya jaddada cewa tsarin tsaron ƙasar yana buƙatar sake tsari cikin gaggawa domin magance barazanar tsaro da ke ƙara zama ta zamani da kuma yaɗuwa a sassan ƙasar, rahoton TheCable ya nuna hakan.

A cewarsa, wani tabbataccen tsari da ke yawan faruwa ya ɓullo a faɗin ƙasar, inda bayan kowane hari ake samun fushin jama'a, alƙawura na hukuma, da kwamitocin bincike, kawai sai a sake samun sababbin hare-hare ba tare da an yi amfani da wani darasi mai ma'ana ba.

Kara karanta wannan

Atiku ya sake dura kan Tinubu saboda matsalar rashin tsaro a Najeriya

“Daga Chibok zuwa Oyo, daga ƙauyuka marasa adadi a Arewa maso Yamma zuwa kauyuka a faɗin Arewa ta Tsakiya da sauran wurare, wannan tsarin ya zama sananne cikin takaici da ban tausayi."

"Hari zai faru. Za a yi jimami a kasa. Za a yi alƙawura. Za a sanar da kwamitoci. Bayan haka sai wani harin ya sake biyo baya. Kasar da ta ƙi koyon darasi daga masifunta, a bayyana yake za ta sake fuskantar su."

- Atiku Abubakar

Wace shawara ya ba gwamnati?

Ya buƙaci gwamnatin tarayya da ta hanzarta gudanar da cikakkiyar bita kan tsarin manufofin yaƙi da ta'addanci na Najeriya, inda ya ce dole ne matakan tsaro na gaba dole ne su ginu a kan darussan da aka koya daga abubuwan da ke faruwa a cikin gida.

“Mun fuskanci mummunan masifa ta sace yaran makarantar Chibok. Raɗadin waccan fargaba ta ƙasa ya kasance a bayyane har abada a cikin tunaninmu. Duk da haka, shekaru bayan haka, har yanzu ana sace yaran makaranta da malamai a sassa daban-daban na ƙasar."

“Ya kamata a ce mun koyi darussa masu muhimmanci da alamun ankararwa na riga-kafi daga Chibok da sauran makamancin waɗannan lamura, domin tabbatar da cewa abin da ya faru kwanan nan a Jihar Oyo da sauran wurare bai sake faruwa ba."

Kara karanta wannan

'Yan bindiga sun sace dalibai a jihar Zamfara ana jimamin abin da ya faru a Oyo

- Atiku Abubakar

An ba Atiku shawara kan zaben 2027

A wani labarin kuma, kun ji cewa wani kusa a jam'iyyar ADC, Eze Chukwuemeka Eze, ya kawo shawara kan wanda ya dace ya zama dan takarar mataimakin shugaban kasa a zaben 2027.

Eze ya bukaci dan takarar shugaban kasa na ADC, Atiku Abubakar, ya dauki tsohon Ministan sufuri, Rotimi Amaechi, a matsayin mataimakinsa.

Ya ce Amaechi yana da karfin siyasa, tsari da kuma magoya baya da za su iya taimakawa wajen karfafa damar ADC a babban zaben 2027.

Wanda ya tantance Muhammad Malumfashi, babban edita a Legit.ng.

Asali: Legit.ng