Atiku Ya Sake Dura kan Tinubu saboda Matsalar Rashin Tsaro a Najeriya

• Tsohon mataimakin shugaban kasa, Atiku Abubakar, ya yi martani kan sace 'yar uwar Adebayo Adelabu da 'yan bindiga suka yi
• Atiku Abubakar ya koka da cewa matsalar rashin tsaro na kara tabarbarewa a karkashin jagorancin Shugaba Tinubu
• Tsohon mataimakin shugaban kasar ya nuna cewa ana sanya 'yan Najeriya cikin zullumi da fargaba saboda rashin tsaro

​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon mataimakin shugaban kasa Alhaji Atiku Abubakar, ya soki Shugaba Bola Ahmed Tinubu kan matsalar rashin tsaro.

Atiku ya soki Tinubu ne yayin da ya mayar da martani game da labarin sace 'yar uwa da kuma tagwayen yayar tsohon Ministan wutar lantarki, Adebayo Adelabu.

Jaridar The Punch ta ce hakan na kunshe ne a cikin wata sanarwa da hadimin Atiku, Phrank Shaibu, ya fitar ranar Laraba, 3 ga watan Yunin 2026.

Kara karanta wannan

Lokuta 3 da Babachir Lawal ya canza gidan siyasa daga mulkin Buhari zuwa yau

Atiku Abubakar ya taya Bayo Adelabu jimami

Atiku ya nuna goyon bayansa ga iyalan Adelabu, inda ya bayyana cewa wannan lamari ya fallasa mummunan mataki na ƙalubalen rashin tsaro a Najeriya.

Ya bayyana cewa sace 'yar uwar ta Adelabu a matsayin abin mamaki ƙwarai da gaske cewa irin wannan garkuwa da mutane da aka yi da daddare ta faru ne a tsakiyar birnin Ibadan a wata babbar tasha.

A cewarsa, kasancewar masu garkuwa da mutane za su iya ƙaddamar da hari a irin wannan fitaccen fili na jama'a ba tare da fargabar tsangwama ko kama su ba, yana nuna gagarumin matsayi na yadda sha'anin tsaro ke ƙara taɓarbarewa a ƙasar.

Atiku ya soki Gwamnatin Tinubu

Tsohon mataimakin shugaban kasar ya koka da cewa a faɗin ƙasar, ana sanya iyalai cikin wata irin fargaba da raunin zuciya da ba za a iya siffantawa ba, yayin da masu garkuwa da sauran ɓata-gari ke gudanar da ayyukansu.

Kara karanta wannan

'Tinubu jan wuya ne a murde zabe': Babachir Lawal na ganin APC za ta zarce

“Ana sace yaran 'yan makaranta daga azuzuwan karatu, ana korar manoma daga gonakinsu, ana sace matafiya a kan manyan hanyoyi, kuma ana tsare daukacin al'ummomi a matsayin garkuwa saboda tsoro."

"Duk da haka, bayan waɗannan munanan abubuwa, martanin gwamnati galibi ana siffanta shi ne da hujjoji na ƙarya, farfaganda, da kayan tallafi maimakon ɗaukar kwararan matakai."

- Atiku Abubakar

Atiku ya koka kan rashin tsaro a mulkin Tinubu

Atiku ya lura cewa masu garkuwa da mutane ba su tambayar katin zama mamban jam'iyya kafin su ƙaddamar da hari. Ba su rarrabe tsakanin mambobin APC da magoya bayan adawa, rahoton TheCable ya nuna hakan.

Ba su damu ba ko waɗanda abin ya shafa ministoci ne, tsofaffin ministoci, 'yan kasuwa, malamai, ɗalibai, ko manoma.

'Yan bindiga sun sace dalibai

A wani labarin kuma, kun ji cewa 'yan bindiga sun yi awon gaba da wasu dalibai na makarantar kimiyya da fasaha ta tarayya a jihar Zamfara.

'Yan bindigan sun sace daliban ne bayan sun afka wa rukunin gidajensu na wajen makaranta da ke gefen rukunin gidaje na Low-Cost a garin Kaura Namoda.

Rundunar 'yan sandan jihar Zamfara ta bayyana cewa ta tura jami'ai domin kokarin ceto daliban da aka yi garkuwa da su.

Wanda ya tantance Muhammad Malumfashi, babban edita a Legit.ng.

Asali: Legit.ng