Atiku Ya Bukaci a Gaggauta Sakin El Rufai, Ya Aika Sako ga Tinubu da Uba Sani

• Tsohon gwamnan jihar Kaduna, Nasir Ahmed El-Rufai na ci gaba da zama a tsare a hannun hukumar yaki da cin hanci da rashawa ta EFCC
• Atiku Abubakar ya yi kira ga hukumomi da su gaggauta sakin El-Rufai kafin bukukuwan babbar Sallah da ke tafe
• Tsohon mataimakin shugaban kasar ya nuna cewa ci gaba da tsare El-Rufai zai kasance wani bita da kullin siyasa wanda ya sabawa ka'idoji

​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon mataimakin shugaban kasa, Atiku Abubakar, ya yi kira ga hukumomin tarayya da gwamnatin jihar Kaduna da su gaggauta sakin Nasir El-Rufai.

Atiku ya bayyana ci gaba da tsare El-Rufai gabanin bukukuwan Sallar Layya (Eid-el-Kabir) a matsayin abin da yake zalunci maras dalili, da kuma ban mamaki matuƙa.

Jaridar The Punch ta ce hakan na kunshe ne a cikin wata sanarwa da mai taimakawa Atiku kan harkokin yada labarai, Phrank Shaibu, ya fitar a ranar Juma'a, 15 ga watan Mayun 2026.

Kara karanta wannan

Majalisar dinkin duniya ta sa baki kan harin sojojin sama da ya kashe farar hula a Zamfara

Atiku ya yi magana kan tsare El-Rufai

Atiku ya siffanta lamarin a matsayin take hakkin bil’adama, rusa tsarin dimokuraɗiyya, da kuma kin bin doka da oda, sannan ya yi gargaɗi game da yin amfani da hukumomin gwamnati domin tsoratar da waɗanda ake gani a matsayin abokan hamayyar siyasa.

Tsohon mataimakin shugaban ƙasar, wanda ke zaman jigo a ADC, ya bayyana ci gaba da tsare El-Rufai a matsayin farautar siyasa wanda bai dace da ƙa’idodin shari’a da dimokuraɗiyya ba.

Atiku ya bukaci a saki El-Rufai

“A daidai lokacin da miliyoyin musulmi a faɗin Najeriya da ma faɗin duniya ke shirin gudanar da bukukuwan Sallar Layya, wani lokaci mai tsarki na sadaukarwa, gafarar juna, da haɗuwar iyali."

"Zai kasance rashin tausayi ga kowace gwamnati ta mayar da ikon gwamnati makami ta hanyar da za ta hana ɗan ƙasa ’yancinsa ba tare da wani kyakkyawan dalili ba, musamman a cikin yanayin da ke haifar da halatacciyar fargaba game da tsananta wa mutum saboda siyasa.”

Kara karanta wannan

Atiku ya 'bankado' shirin gwamnoni game da tazarcen Tinubu a zaben 2027

“Sallah lokaci ne na jinkai, sulhu, da jin tausayin ɗan adam. Babu ko wane irin dalili na raba mutum da iyalinsa a lokaci mai muhimmanci na addini kamar wannan, musamman ma inda ba a nuna bin ƙa’idodin shari’a a sarari ba.”

“Sakamakon haka, ina kira da a gaggauta sakin Mallam El-Rufai kuma ina buƙatar dukkan hukumomin da abin ya shafa da su yi watsi da ɗacin rai na siyasa kuma su yi aiki domin muradin shari’a, zaman lafiya, da haɗin kan ƙasa.”

- Atiku Abubakar

Wane sako ya ba Tinubu da Uba Sani

Atiku ya ce dole ne gwamnatin tarayya da hukumomin jihar Kaduna su tabbatar da cewa ana auna dimokuraɗiyya ne ta yadda ake mutunta abokan hamayya cikin adalci, yana mai gargaɗin cewa adalcin son rai yana ruguza amana ga bin doka da oda.

Ya bayyana cewa idan har ana tsare da tsohon gwamnan na Kaduna ne ta hanyar tsarin shari’a, to ya kamata hukumomi su fito fili su bayyana wa ’yan Najeriya gaskiyar lamarin, jaridar Vanguard ta kawo labarin.

“Dole ne gwamnatin tarayya da hukumomin jihar Kaduna su fahimci cewa adalcin son rai shi ne rashin adalci da kansa. Ana auna sahihancin kowace dimokuraɗiyya ne ba wai ta yadda take bi da masu biyayya gare ta ba, a’a, ta yadda take bi da waɗanda ake gani a matsayin abokan hamayya."

Kara karanta wannan

An shiga tashin hankali a Filato, ƴan bindiga sun kashe gomman mutane a sabon hari

- Atiku Abubakar

An fara tara kudin sayawa El-Rufai fom

A wani labarin kuma, kun ji cewa an fara tara kudi domin sayawa tsohon gwamnan jihar Kaduna, Nasir El-Rufai fom din tsayawa takara.

Magoya bayan tsohon gwamnan jihar Kaduna ne suka kaddamar da asusun tara kuɗi daga jama’a domin saya masa fom ɗin takarar shugaban kasa na 2027.

Ƙungiyar El-Rufai Support Group (ESG) ce ta sanar da hakan, lamarin da ya ƙara jawo muhawara a fagen siyasar Najeriya.

Asali: Legit.ng