Asiwajun Kano Zai Taimakawa Al'ummar Jihar da Tallafi saboda Bola Tinubu

• Wani kwamitin tallafa wa mazauna Kano ya shirya ƙaddamar da shirin ƙarfafa tattalin arziki domin samun goyon bayan Bola Tinubu
• Shirin da Leke Abejide ke jagoranta zai tallafa wa matasa, mata, ’yan kasuwa, masu sana’o’i da ƙananan ’yan kasuwa a faɗin Kano
• Kwamitin ya ce shirin ba siyasa kawai yake nufi ba, zai samar da damarmaki, ƙarfafa al’umma da kuma ƙara shiga cikin harkokin dimokuraɗiyya

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kano - Wani dan majalisar tarayya daga Kogi ya shirya kaddamar da tallafi ga wasu al'ummar jihar Kano domin dogaro da kansu.

Kwamitin Ƙarfafa Al’umma a Kano ya sanar da shirin ƙaddamar da wani shiri na tallafa wa al’umma karkashin jagorancin Hon. Leke Abejide.

Shirin na ƙarfafa goyon bayan al’umma ga Shugaba Bola Ahmed Tinubu da manufofin gwamnatin sa na Renewed Hope Agenda, cewar Premium Times.

Kara karanta wannan

Alkawarin gwamnan Kebbi ga iyalan jam'ian yan sanda da yan bindiga suka kashe

Kwamitin, wanda Alhaji Sulaiman Jimoh ke jagoranta tare da Hon. Seyi Olorunsola a matsayin sakatare, zai tallafa wa matasa, mata da ’yan kasuwa.

Haka kuma, shirin zai shafi masu sana’o’i, ƙananan ’yan kasuwa da sauran mazauna Kano domin inganta rayuwarsu da samar musu damarmaki.

Da yake magana bayan ƙaddamar da kwamitin mambobi 21, masu shirya shirin sun ce manufarsa ta wuce tara mutane domin siyasa.

Sun ce za a samar da damarmakin tattalin arziki ga mazauna Kano, tare da ƙarfafa haɗin gwiwar al’umma da tallafa wa iyalai.

Kwamitin ya ce:

“Wannan ba batun siyasa kawai ba ne; batun mutane ne. Shugabanci yana da ma’ana idan yana samar da damarmaki.”

Sun ƙara da cewa shirin zai ƙara kusantar shugabanni da al’umma, inganta ƙarfafa tattalin arziki da kuma ƙara shiga harkokin dimokuraɗiyya.

Ga Abejide, wanda ke wakiltar mazabar Yagba ta tarayya a Kogi a Majalisar Wakilai, shirin Kano yana nuna alaƙarsa mai ɗorewa da jihar.

Ɗan majalisar, wanda ke wa’adinsa na biyu kuma ke neman sake zaɓe a 2027, ya ce ya fara sana’o’insa ne a Kano, cewar Daily Post.

Kara karanta wannan

Kano ta karyata sanya wasu dattawa a auren gata, ta ba limaman Juma'a umarni

Ya ce a lokacin da yake Kano, ya ƙulla dangantaka mai ƙarfi da mutane, kafin daga bisani ya koma Kogi domin shiga harkokin siyasa.

Abejide, wanda ke jagorantar Kwamitin Kwastam da Haraji na Majalisar Wakilai, yana daga cikin masu goyon bayan Shugaba Tinubu.

Ya bayyana goyon bayansa ga Renewed Hope Agenda, yana kallonsa a matsayin hanyar da za ta taimaka wajen bunƙasa tattalin arzikin Najeriya.

Kwamitin mambobi 21 da aka ƙaddamar ranar Talata ne ke da alhakin tsara shirin, tattara goyon bayan al’umma da kuma aiwatar da ayyukansa.

Ana sa ran kwamitin zai yi aiki tare da shugabannin al’umma da ƙungiyoyi daban-daban a Kano domin tabbatar da isar da tallafin ga waɗanda aka tsara.

Ana kuma sa ran bikin ƙaddamar da shirin zai samu halartar shugabannin al’umma, matasa, mata, ’yan kasuwa da masu ruwa da tsaki.

Kwamitin ya bukaci mazauna Kano da masu ruwa da tsaki su mara wa shirin baya domin ganin an cimma manufofinsa.

Jimoh ya jaddada muhimmancin ƙarfafa al’umma a harkokin siyasa, yana mai cewa ya kamata tallafa wa jama’a ya kasance ginshiƙi.

Kara karanta wannan

Shugaban APC ya tona yadda yan siyasa ke gwara yan Najeriya da sunan addini

Tinubu: Dan majalisa zan hada kan Yarbawa

Kun ji cewa dan majalisar wakilai, Hon. Leke Abejide ya bukaci hadin kan Yarbawa a yankin kan zaben 2027.

Hon. Abejide ya bukaci shugabannin Yarbawa a Arewa su marawa Bola Tinubu baya a takararsa ta 2027 don ci gaban al'umma.

A taron cika shekara 10 na shugabannin gargajiya na Yarbawa a Arewa, Abejide ya jaddada muhimmancin hadin kai da gujewa siyasar rarrabuwar kawuna.

Asali: Legit.ng