Kwana 1 kafin Ci Gaba da Yaki, Shugaban Amurka Ya Fadi Abin da Yake Tsammani daga Iran
- Shugaba Donald Trump ya ce yana tsammanin Amurka za ta cimma yarjejeniya mai kyau da kasar Iran kafin karewar wa'adin tsagaita wuta
- A gobe Laraba, 22 ga watan Afrilu, 2026 yarjejeniyar tsagaita wuta ta makonni biyu da aka cimma tsakanin Iran da Amurka/Isra'ila za ta kare
- Trump ya yi ikirarin cewa iran ba ta da sauran karfin soji da za ta iya ci gaba da yaki da Amurka, don haka sulhu ne kadai zabin da ya rage
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
United states - Shugaban Amurka, Donald Trump, ya bayyana cewa yana da yakinin cewa kasarsa za ta cimma “kyakkyawar yarjejeniya” da Iran domin kawo karshen yakin da ya shafe makonni ana yi.
Shugaba Trump ya fadi hakan ne jim kadan bayan ya sake jaddada cewa ba zai tsawaita yarjejeniyar tsagaita wuta da za ta kare gobe Laraba ba.
Source: Getty Images
Trump ya bayyana hakan ne a wata hira da tashar CNBC a shirin “Squawk Box”, inda ya ce yana sa ran samun sakamako mai kyau daga zagaye na biyu na tattaunawar zaman lafiya da Iran.
“Ina ganin ba su da wani zabi,” in ji Trump, yana mai nuni da cewa Iran za ta koma teburin tattaunawa domin hakan shi ne mafi alheri ga kasar.
Donald Trump ya yi ikirarin raunana karfin Iran
Shugaban ya kara da cewa Amurka ta riga ta lalata muhimman bangarorin karfin sojin Iran, ciki har da rundunar ruwanta da ta sama.
“Mun rusa rundunar sojojin ruwansu, mun rusa rundunar sojojin sama, mun kuma kawar da shugabanninsu,” in ji shi
Sai dai Shugaba Trump ya amince cewa kawar da shugabannin ya kawo wasu kalubale, amma ya ce sababbin jagororin Iran sun fi nuna hankali wajen yanke hukunci.
“Gaskiya ne, mun cire shugabanninsu, wanda hakan ya 'dan rikitar da al’amura ta wata fuska, amma wadannan shugabannin na yanzu sun fi hankali,” in ji shi.
Amurka na tunanin ta sauya Gwamnatin Iran
Shugaba Donald Trump ya bayyana cewa abin da ya faru a Iran na iya zama kamar sauyin gwamnati, ko da yake bai fito fili ya ce hakan ne manufarsa ba tun farko
“Wannan sauyin gwamnati ne, ko da kuwa me za ka kira shi, duk da ban bayyana cewa zan yi hakan ba, amma ya faru ta wata hanya,” in ji shi.
Source: Getty Images
Lokacin da aka tambaye shi ko zai tsawaita yarjejeniyar tsagaita wuta domin bai wa tattaunawar karin lokaci, Trump ya ce ba ya son yin hakan.
Idan dai ba a tsawaita wa'adin tsagaita wuta ba kuma ba a cimma matsayar sulhu tsakanin kasashen ba, Amurka na Iran na iya komawa fagen yaki a karo na biyu.
Trump ya sake yi wa Iran barazana
A wani rahoton, kun ji cewa Shugaban Amurka, Donald Trump ya sake yin barazanar ci gaba da kai hare-hare Iran matukar ba a cimma yarjejeniyar zaman lafiya ba.
Shugaban na kasar Amurka ya ce a halin yanzu babu wani lokaci da ya rage, yana mai gargadin cewa dole ne kasar Iran ta dauki mataki cikin gaggawa.
Trump ya kuma bayyana cewa sojojin Amurka sun yi amfani da lokacin tsagaita wuta wajen sake sabunta makamai, kuma yanzu a shirye suke su koma kai hare-hare.
Wanda ya tantance Muhammad Malumfashi, babban edita a Legit.ng.
Asali: Legit.ng
