Ruɗani: INEC Ta Dora NDC amma Babu Sunan Aminu Gwarzo a Jerin Yan Takarar Gwamnan Kano

Ruɗani: INEC Ta Dora NDC amma Babu Sunan Aminu Gwarzo a Jerin Yan Takarar Gwamnan Kano

  • Hukumar zaben Najeriya watau INEC ta sanya jam'iyyar NDC cikin jam'iyyu 20 da za su fafata a zaɓen gwamnan Kano na 2027
  • NDC ita ce jam'iyya ta 13 a cikin jerin jam'iyyun da hukumar ta amince su tsayar da 'yan takara babban zabe mai zuwa da za a yi a watan Fabrairun 2027
  • Sai dai hukumar ba ta bayyana sunan Aminu Abdussalam Gwarzo a matsayin ɗan takarar NDC ba, tana mai cewa hakan ya biyo bayan umarnin kotu

Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kano, Nigeria - Hukumar Zaɓe Mai Zaman Kanta ta Ƙasa (INEC) ta sanya jam'iyyar NDC cikin jerin jam'iyyun da za su fafata a zaɓen gwamnan jihar Kano da za a gudanar a watan Fabrairun 2027.

Binciken da Legit Hausa ta yi ya nuna hukumar zaɓen Najeriya ta sanya NDC a matsayin jam'iyya ta 13 cikin jam'iyyu 20 da INEC ta amince su tsayar da 'yan takara a zaɓen gwamnan Kano.

Kara karanta wannan

"Ba sabon alkawari ba"; Gwamna Radda ya fadi abin da yake kamfen da shi

Aminu Gwarzo.
Dan takarar gwamnan jihar Kano karkashin iniwar jam'iyyar NDC, Kwamared Aminu Abdussalam Gwarzo Hoto: Aminu Abdussalam Gwarzo
Source: Facebook

Hakan na kunshe a jerin sunayen jam'iyyu da yan takarar gwamnan Kano da za su fafata a zaben 2027, wanda INEC ta yi wa gyara kuma ta wallafa a shafinta na yanar gizo da safiyar yau Asabar, 31 ga watan Oktoba, 2026.

INEC ba ta dora sunan Aminu Gwarzo ba

Sai dai sabanin jihar Gombe, inda hukumar ta bayyana sunan Farfesa Pantami a matsayin ɗan takarar gwamna na PDP, a jerin sunayen 'yan takarar jihar Kano, sunan jam'iyyar NDC kawai aka bayyana.

Hukumar ba ta bayyana sunan Kwamared Aminu Abdussalam Gwarzo a matsayin ɗan takarar gwamnan jihar Kano ba.

A ƙarshen bayanin da ta fitar, hukumar INEC ta bayyana cewa ta ɗauki wannan mataki ne sakamakon wani umarnin kotu.

Gwarzo ya shigar da ƙorafi ga hukumar bayan da aka tsallake sunansa a jerin farko na ’yan takarar da aka wallafa a ranar 10 ga Oktoba, 2026.

Kara karanta wannan

Ana shirye shiryen zaben 2027, Atiku ya mika babbar bukata ga INEC

Dalilin rashin maida sunan Aminu Gwarzo

Kwamishinan INEC na ƙasa, Mohammed Haruna, ya bayyana a baya cewa ƙorafin Gwarzo ya yi nasara, sai dai ya ce wallafa sunansa zai dogara da hukuncin ƙarshe kan wani umarnin kotun tarayya da ke Kano.

Binciken da Legit Hausa ta yi a shafin yanar gizon INEC ya nuna cewa sunan Gwarzo da na mataimakinsa ba su bayyana a sabon jerin sunayen ba.

Hukumar ta sanya “Court Order”, wato umarnin kotu, a sashen bayanin da ya shafi takarar tasu.

INEC Nigeria.
Tambarin hukumar zabe mai zaman kanta ta kasa (INEC) Hoto: INEC Nigeria
Source: Twitter

NDC ta nemi kotu ta tilasta wa INEC

Wannan sabon mataki ya sake tayar da tambayoyi kan matsayin tikitin takarar gwamnan Kano na jam’iyyar NDC.

A ranar 27 ga Oktoba, NDC ta garzaya zuwa babbar kotun tarayya da ke Abuja domin ƙalubalantar rashin saka sunan ɗan takararta a jerin ’yan takarar gwamna.

INEC ta maida sunan Sheikh Pantami

Kun ji cewa hukumar zabe mai zaman kanta ta kasa (INEC) ta saka sunan Farfesa Isa Ali Pantami cikin jerin ’yan takarar gwamnan jihar Gombe na zaben 2027.

Legit Hausa ta gano sunan tsohon ministan sadarwa da tattalin arzikin zamani a shafin INEC, inda aka jera shi tare da Haruna Ahmad a matsayin wanda zai yi masa mataimaki.

Asali: Legit.ng

Authors:
Ahmad Yusuf avatar

Ahmad Yusuf (Hausa editor) Ahmad Yusuf ma'aikacin jaridar Legit.ng sashin Hausa ya fara aiki a 2021, ya kware wajen kawo labarai da rahotanni da suka shafi siyasa da al'amuran yau da kullum. Matashin ɗan jaridar ya koyi Lissafi a digirinsa na farko a Jami'ar Kimiyya da Fasaha da ke Wudil, Kano (KUST) ya kuma samu shaidar kwarewa a fannin aikin jaridar zamani daga Reuters a 2022. Kafin fara aiki da Legit Ahmad ya yi aiki da jaridu da dama na turanci da Hausa tun 2012. Mail: ahmad.yusuf@corp.legit.ng 07032379262