Bayan Jefa Pantami a Matsala, Wanda Ya Nemi Takarar Gwamna a PDP Ya Koma APC

• Abdulkadir Hamma Saleh, tsohon ɗan takarar gwamnan Gombe a PDP, ya fice daga jam’iyyar ya koma APC gabanin zaɓen gwamna na 2027
• Saleh ya fafata da Isa Ali Ibrahim Pantami neman tikitin PDP, wanda fuskantar ƙalubalen shari’a ya sa aka sake gudanar da zaɓen fidda gwani
• Ya buƙaci magoya bayansa a faɗin Gombe su bi shi zuwa APC, su kuma goyi bayan ’yan takarar jam’iyyar a zaɓukan 2027

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Gombe - Abdulkadir Hamma Saleh, tsohon ɗan takarar gwamna a jam’iyyar PDP a Gombe, ya fice daga jam’iyyar adawa.

Rahotanni sun tabbatar da cewa Hammah Saleh ya koma jam'iyyar APC mai mulki gabanin zaɓen gwamna na 2027.

Hamma Saleh ya koma APC daga PDP

Aminiya ta ruwaito cewa Hamma Saleh, yana da cikin wadanda suka fafata da tsohon ministan sadarwa da tattalin arzikin zamani, Isa Ali Ibrahim Pantami.

Kara karanta wannan

Bayan ƙarewar wa'adin INEC, ina makomar Pantami da Gwarzo da sauransu?

Sun nemi tikitin takarar gwamnan PDP, kafin ya sanar da sauya sheƙarsa cikin wata sanarwa da aka rabawa ’yan jarida a Gombe.

Bayan yanke shawarar komawa APC, tsohon ɗan takarar ya buƙaci magoya bayansa a faɗin jihar Gombe su bi shi zuwa jam’iyyar mai mulki, tare da goyon bayan ’yan takararta a zaɓukan 2027.

Wannan mataki na zuwa ne a daidai lokacin da ake takaddama kan tikitin takarar gwamnan PDP a jihar Gombe.

An ƙalubalanci nasarar farko da Pantami ya samu a kotu, lamarin da ya kai ga sake gudanar da zaɓen fitar da gwani wanda tsohon ministan ya yi nasara.

Babu sunan Pantami a cikin yan takara

Daga bisani hukumar INEC ta fitar da jerin sunayen yan takarar gwamnoni da yan majalisun jihohi a fadin kasar ba tare da sunansa ba.

Hukumar INEC ta amince da ’yan takara 16 domin fafatawa a zaɓen gwamnan jihar da za a gudanar a ranar 6 ga Fabrairu, 2027.

Kara karanta wannan

Wike ya faɗi abin da zai hana Obi zama shugaban ƙasa, ya tuna mummunan halinsa 1

Kotun Ƙoli ta dawo da wasu sassan Dokar Zaɓe ta 2026 da suka hana jam’iyyu tsayar da ’yan takarar da sunayensu ba sa cikin rajistar mambobin da aka miƙa wa INEC.

Daga nan ne Pantami ya kalubalanci matakin cire sunan na shi inda lauyoyinsa suka ba hukumar wa'adi awanni da su yi gaggawar mayar da sunansa cikin jerin yan takarar.

Martanin hadimin gwamna Inuwa ga Legit Hausa

Daga daga cikin hadiman Gwamna Inuwa ya bayyana cewa lokaci kawai suke jira domin sai sun kwashe dukan yan adawa.

Yusuf Alyusra ya bayyana cewa layin takarar PDP a rufe take duba da yadda rikita-rikitia da rashin gaskiya ta yi yawa.

Ya ce:

"Sauran ma watakila za su biyo baya, muna neman hada tawagar da za ta ba Jamilu Isiyaku Gwamna nasara a 2027.

Aliyu Garry ya sake kai karar Pantami

Mun ba ku labarin cewa wani mai neman tikitin PDP a Gombe, Usman Aliyu Garry, ya shigar da ƙorafi ga INEC kan cancantar jam’iyyar ta tsayar da Farfesa Isa Ali Ibrahim Pantami takarar gwamna a 2027.

Garry ya nemi INEC ta binciki kundin rajistar mambobin PDP a jihar, domin tabbatar da ko jam’iyyar ta bi ƙa’idojin dokar zaɓe wajen rajistar mambobinta da tsayar da ɗan takara.

Korafin ya ƙara tsananta takaddamar siyasa da ta shari’a da ke tattare da zaɓen ɗan takarar gwamnan PDP a Gombe gabanin babban zaɓen 2027.

Asali: Legit.ng