Bayan Ƙarewar Wa'adin INEC, Ina Makomar Pantami da Gwarzo da Sauransu?

• Hukumar INEC ba ta bayyana matsayarta kan korafe-korafen Aminu Gwarzo na Kano da Isa Pantami na Gombe ba, duk da cikar wa’adin shigar da ƙorafi
• Jam’iyyar NDC ta ce INEC ta karɓi ƙorafinta kan cire sunan Gwarzo, yayin da PDP ta garzaya kotu domin neman dawo da sunan Pantami
• INEC ta ce cire sunayen ’yan takara ya biyo bayan hukuncin Kotun Ƙoli kan rajistar mambobin jam’iyyu, amma har yanzu ba a warware lamarin ba

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Jam’iyyar Nigeria Democratic Congress (NDC) ta ce Hukumar Zaɓe ta tabbatar da karɓar ƙorafinta kan cire sunan ɗan takararta, Aminu Abdussalam Gwarzo.

Hakan ya biyo bayan cire sunansa daga jerin ’yan takarar gwamnan Kano, amma har yanzu ba ta bayar da amsa ta ƙarshe ba.

Kara karanta wannan

Siyasa na ɗaukar zafi, ƴan daba sun farmaki ɗan takarar majalisa, an rasa rai

Jam’iyyar PDP ta shigar da takardar rantsuwa domin neman a dawo da sunan Isa Pantami cikin jerin ’yan takarar gwamnan Gombe, cewar Leadership.

Yan takarar da abin ya shafa

Baya ga Gwarzo da Pantami, ɗan takarar jam’iyyar NNPP a Oyo, Adebiyi Adedapo, da ’yan takarar jam’iyyar SDP a Oyo da Benue, sun kuma koka kan cire sunayensu.

Rikicin da ya dabaibaye cire sunayen Gwarzo na NDC, Pantami na PDP da sauran ’yan takara bai warware ba, duk da cewa wa’adin da INEC ta bayar na gabatar da ƙorafe-ƙorafe ya ƙare ranar Asabar, 24 ga Oktoba, 2026.

Rahotannin kafafen yaɗa labarai na ranar Lahadi, 25 ga Oktoba, sun nuna cewa hukumar ba ta sanar da ko za ta gyara jerin sunayen ’yan takarar da ta wallafa ba.

Saboda haka, har yanzu ba a san matsayin takarar Gwarzo da Pantami ba, yayin da zaɓen gwamnoni ke tafe a ranar 6 ga Fabrairu, 2027.

Kara karanta wannan

Kwana 1 kafin wa'adin INEC; wane hali takarar Pantami a 2027 ke ciki?

NDC ta shigar da korafi ga INEC

NDC ta ce ta rubuta wa INEC wasiƙa domin neman a sake duba cire sunayen Gwarzo da abokin takararsa, Mustapha Rabiu Kwankwaso, daga jerin ’yan takarar gwamnan Kano.

Sakataren yaɗa labaran jam’iyyar na ƙasa, Osa Director, ya shaida wa manema labarai cewa hukumar ta karɓi wasiƙun ƙorafin jam’iyyar, ta kuma tabbatar da hakan.

Shugaban NDC na Jihar Kano, Hussaini Mairiga, shi ma ya ce jam’iyyar ta gabatar da ƙorafinta ta hannun shugabancinta na ƙasa, bisa tsarin da hukumar ta tsara.

Sai dai rahotannin da ake da su ba su tabbatar da cewa INEC ta amince da ƙorafin NDC ko ta dawo da sunayen ’yan takararta cikin jerin da ta wallafa ba.

Pantami: PDP ta dauki matakin shari’a

A Jihar Gombe, PDP ta kalubalanci cire sunan Pantami daga jerin ’yan takarar gwamna, inda ta dage cewa ta cika dukkan sharuddan da ake buƙata.

Pantami ya zama ɗan takarar jam’iyyar bayan gudanar da sabon zaɓen fitar da gwani a ranar 29 ga Satumba, 2026, bisa umarnin kotu.

Kara karanta wannan

Kwankwaso na fuskantar matsala a Kano, yan takara 5 sun dura kan 'yan Kwankwasiyya

Sunansa ya bayyana a jerin wucin-gadi na INEC da aka wallafa ranar 29 ga Agusta, amma bai bayyana a jerin ƙarshe da aka fitar ranar 10 ga Oktoba ba.

Duk da wannan matakin shari’a, rahotannin da aka wallafa bayan wa’adin bai tabbatar da cewa INEC ta amince da buƙatar PDP ko ta dawo da sunan Pantami ba.

An gabatar da dukkan takardun da ake buƙata?

Rahotannin da ake da su sun tabbatar da cewa NDC ta aika da wasiƙun ƙorafi, kuma INEC ta tabbatar da karɓarsu.

Sai dai babu tabbaci mai zaman kansa da ke nuna cewa jam’iyyar ta gabatar da dukkan takardun da doka ta buƙata ko kuma hukumar ta amince da ƙorafinta.

Dangane da PDP, rahotannin labarai sun nuna cewa jam’iyyar ta shigar da takardar rantsuwa domin neman a dawo da sunayen Isa Ali Pantami da Adebutu cikin jerin ’yan takara.

Sai dai har yanzu ba a bayyana ko wannan matakin ya haifar da sauye-sauyen da jam’iyyar ke nema ba, cewar Punch.

Menene zai faru a gaba?

Yayin da wa’adin 24 ga Oktoba ya riga ya ƙare, har yanzu ba a san makomar lamarin ba. NDC ta ce za ta bi hanyoyin shari’a idan hukumar ta gaza warware ƙorafinta, yayin da PDP ta riga ta ɗauki matakin shari’a kan cire wasu ’yan takararta.

Kara karanta wannan

2027: PDP, NDC sun shiga kafar wando da INEC kan cire sunayen yan takararsu

A cewar rahotannin baya-bayan nan da ake da su, INEC ba ta fitar da sanarwar tabbatar da cewa an dawo da sunayen Gwarzo ko Pantami cikin jerin ƙarshe na ’yan takara ba.

Saboda haka, ba za a iya cewa an warware lamarin ba har sai hukumar ta sanar da takamaiman matakin da ta ɗauka ko ta wallafa sabon jerin sunayen da ke nuna sauye-sauyen da aka yi.

Pantami ya zargi kulla masa makirci

A baya, an ji cewa Farfesa Isa Ali Pantami, ɗan takarar gwamnan Gombe a PDP, ya gode wa magoya bayansa bisa addu’o’i da goyon bayan da suke nuna masa.

Pantami ya bukaci magoya bayansa da kada su karaya saboda izgili da ake yi musu kan addu’o’in neman nasarar tafiyar siyasar Pantamiyya.

Tsohon ministan ya yi zargin cewa an kashe makudan kudade domin kawo cikas ga tafiyarsa, yana mai cewa nan gaba zai tona asirin makircin.

Asali: Legit.ng