Kwankwaso Ya ba Obi Kariya bayan Shettima Ya Masa Zarge Zarge

• Sanata Rabiu Kwankwaso, ya soki mataimakin shugaban ƙasa, Kashim Shettima, kan kiran Peter Obi ƙwararre wajen amfani da ƙididdiga marasa tushe
• Kwankwaso ya ce Obi ya san harkar ƙididdiga sosai, kuma yawancin alkaluman da yake gabatarwa suna da inganci idan aka bincika su
• Tsohon gwamnan Kano ya bayyana cewa kowa na iya yin kuskure, amma bai yarda da kalaman Shettima kan ɗan takarar shugaban ƙasarsu ba

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja – Mataimakin ɗan takarar shugaban ƙasa na jam’iyyar NDC, Rabiu Kwankwaso, ya soki mataimakin shugaban ƙasa, Kashim Shettima, kan sukar da ya yi wa ɗan takarar shugaban ƙasa na jam’iyyar, Peter Obi.

Shettima ya bayyana Obi a matsayin mutumin da ya ƙware wajen gabatar da ƙididdiga marasa tushe da kuma shawarwarin tattalin arziki marasa daidaito.

Kara karanta wannan

"Sun tsorata," Kwankwaso ya gano sasu shirin maguɗi a zaɓen shugaban ƙasa na 2027

Da yake mayar da martani a shirin Politics Today na Channels Television ranar Alhamis, Kwankwaso ya kare Obi, yana mai cewa ya san harkar ƙididdiga kuma galibi yana gabatar da alkaluma masu inganci.

Rabiu Kwankwaso ya kare Peter Obi

Tsohon gwamnan jihar Kano ya bayyana cewa yana sauraron kalaman Obi kamar yadda yake sauraron sauran ’yan siyasa, sannan ya kan binciki alkaluman da yake gabatarwa domin tabbatar da ingancinsu.

Kwankwaso ya ce yawancin alkaluman da ya bincika daga bakin Obi sun kasance daidai, duk da cewa mutum na iya yin kuskure ko furta wani abu ba da niyya ba.

Ya ce:

“Ni kullum ina sauraron sa (Peter Obi), kamar yadda nake sauraron sauran mutane, kuma ina ɗaukar lokaci ina bincika ƙididdigar da yake gabatarwa.

"A ganina, yawancin alkaluman da yake faɗa daidai ne. Sai dai, kamar yadda yake ga kowane ɗan Adam, mutum na iya yin kuskure ko ya yi zamewar harshe.”

Kara karanta wannan

Kwankwaso ya sake maganganu kan Atiku, ya tono tsohon tarihi

Kwankwaso ya soki Kashim Shettima

Kwankwaso ya ce bai yarda da kalaman Shettima na cewa Obi ya ƙware wajen gabatar da ƙididdiga marasa tushe ba.

Ya bayyana cewa yana farin ciki da kasancewar ɗan takarar shugaban ƙasarsu mutum ne da ya san harkar ƙididdiga, ba a Najeriya kaɗai ba, har ma da sauran sassan duniya.

Ya ce:

“Amma shi (Shettima) ya fito ya yi wannan magana, ban ga alamar cewa yana da gaskiya ba. Ina farin ciki da cewa ɗan takarar shugaban ƙasarmu mutum ne da ya san harkar ƙididdiga, ba a wannan ƙasa kaɗai ba, har ma a faɗin duniya, a Turai, Asiya da sauran wurare. Ina ganin wannan abu ne mai kyau.”

Alakar Kwankwaso da Atiku Abubakar

A wani rahoton, mun rahoto cewa Kwankwaso ya bayyana dalilin da ya sa yake son tsohon mataimakin shugaban ƙasa, Atiku Abubakar, ya janye takararsa domin ya bai wa Peter Obi dama a 2027.

Kara karanta wannan

Minista ya ɓallo ruwa a gaban ƙasashen duniya, ya yi maganar da ka iya juyo wa kan Tinubu

Kwankwaso ya bayyana hakan ne yayin wata hira, inda ya yi bayani kan doguwar alaƙar siyasa tsakaninsa da Atiku da kuma dalilin da ya sa ya haɗa kai da Obi.

A bayanin da ya yi, tsohon gwamnan Kano ya ce ba ya adawa da Atiku, amma yana ganin lokaci ya yi da za a samar da sabon tsarin siyasa.

Asali: Legit.ng