Dan Takarar Shugaban Kasa Ya Gayawa Atiku da Obi Hanyar Kayar da Tinubu a Zaben 2027
- Donald Duke ya yi hasashen cewa Shugaba Bola Tinubu zai sake lashe zaɓen 2027 idan manyan ’yan adawa suka ki haɗa kai
- Duke ya ce rarrabuwar ƙuri’un Atiku Abubakar da Peter Obi na iya maimaita abin da ya faru a zaɓen shugaban ƙasa na 2023
- Tsohon gwamnan Cross River ya ce girman kai da rashin haɗin kan manyan ’yan adawa na iya rage musu damar fuskantar jam’iyyar APC a zaɓen 2027
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
FCT, Abuja - Ɗan takarar shugaban ƙasa na jam’iyyar PRP, Donald Duke, ya yi hasashen cewa Shugaba Bola Tinubu zai sake lashe zaɓen shugaban ƙasa na 2027 idan manyan ’yan adawa suka kasa haɗa kai.
Duke ya ce rarrabuwar ƙuri’un ’yan adawa tsakanin Atiku Abubakar na ADC da Peter Obi na NDC, na iya maimaita sakamakon zaɓen 2023.
Source: Instagram
Ya bayyana hakan ne a wata hira da shirin Morning Brief na Channels Tv ranar Laraba, 7 ga watan Oktoban 2026 yayin da yake magana kan yanayin fafatawar ’yan adawa a zaɓen shugaban ƙasa na 2027.
Rarrabuwar ’yan adawa na da amfani ga APC
Duke ya ce ’yan adawa za su sha wahala wajen kayar da jam’iyya mai mulki idan manyan ’yan takarar suka ci gaba da neman kujerar shugaban ƙasa daban-daban.
A cewarsa, tsarin siyasar Amurka da Najeriya ta yi koyi da shi na buƙatar manyan ƙungiyoyin siyasa su haɗa kai maimakon raba ƙuri’u tsakanin jam’iyyu da dama.
Ya yi misalin cewa idan aka raba jam’iyyar Democrats ta Amurka zuwa jam’iyyu biyu ko uku, jam’iyyar Republicans za ta iya ci gaba da kasancewa a kan mulki na dogon lokaci.
Duke ya koma kan abin da ya faru a zaɓen 2023
Duke ya ce rarrabuwar manyan ’yan adawa a zaɓen 2023 ta sa ƙuri’u suka rarrabu tsakanin ’yan takara daban-daban.
Ya ce Atiku Abubakar ya tsaya takara a ƙarƙashin PDP, Peter Obi ya tsaya a ƙarƙashin Labour Party a wancan lokacin, yayin da Rabiu Kwankwaso ya tsaya takara a ƙarƙashin NNPP.
A cewar dan takarar shugaban kasar, wannan rarrabuwa ce ta taimaka wajen wargaza ƙuri’un ’yan adawa.
Ya ce girman kai na kawo cikas ga haɗin kai
Tsohon gwamnan na Cross River ya danganta wahalar samar da haɗin kan ’yan adawa da abin da ya kira “manyan girman kai” na wasu daga cikin jagororin da ke neman takarar shugaban ƙasa.
Duke ya ce manyan ’yan adawa na shirin zaɓen 2027 ne da yakinin za su yi nasara, amma ya yi musu gargaɗin cewa za su iya fuskantar akasin abin da suke tsammani idan suka kasa aiki tare.
"Waɗannan mutanen, manyan da kuke magana a kansu, suna shirin bikin rantsar da su. Suna tunanin za su yi nasara. Ina da labari a gare su. Ba za su je ko’ina ba.” In ji shi.
Duke ya ce Tinubu zai iya sake lashe zaɓen
Duke ya ƙara da cewa bai ga ɗaya daga cikin manyan ’yan takarar adawa zai samu nasara ba idan ’yan adawa suka ci gaba da rarrabuwa.
Kara karanta wannan
Gwamnatin Uba Sani ta fadi abu 2 da suka fi rashin tsaro barazana ga zaman lafiya
“Idan na duba ƙwallon hasashe, abin da nake gani a cikinta ba su ba ne. Ina ganin wani mummunan abu na zuwa.”
Da aka tambaye shi kai tsaye ko hasashensa na nufin Shugaba Bola Tinubu zai lashe zaɓen shugaban ƙasa na 2027, Duke ya amsa da cewa: “Tabbas.”
Source: Facebook
Atiku ya soki gwamnatin Tinubu
A wani labarin kuma, kun ji cewa Atiku Abubakar, ya ce gwamnatin Shugaba Bola Ahmed Tinubu ta gaza wajen sauke daya daga cikin muhimman nauyin gwamnati.
Atiku ya yi ikirarin cewa gwamnatin Tinubu ta gaza kare talakawan Najeriya daga matsanancin yanayin tattalin arziki.
Asali: Legit.ng
