Sanata Hanga, Gaya da Mutane Fiye da 100,000 Sun Tattara Komatsansu zuwa APC

• Tsofaffin sanatoci Rufa’i Sani Hanga da Kabiru Gaya sun koma APC tare da wasu manyan ’yan siyasa a Kano
• Shugaban tsagin NNPP, Sanata Mas’ud El-Jibrin Doguwa, ya shiga APC tare da wasu mambobin jam’iyyar
• APC ta karɓi mutane 136,038 daga ƙungiyoyin siyasa, lamarin da ake sa ran zai ƙara mata ƙarfi a matakin ƙananan hukumomi

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kano - Jam’iyyar APC mai mulki a Kano ta karɓi tsofaffin sanatoci Rufa’i Sani Hanga da Kabiru Ibrahim Gaya, tare da wasu manyan ’yan siyasa.

Shugaban tsagin NNPP, Sanata Mas’ud El-Jibrin Doguwa, da wasu mutane 136,038 su ma sun shiga APC tare da sauran waɗanda suka sauya sheka.

An karɓi waɗanda suka sauya sheka ne yayin ƙaddamar da ƙungiyoyin yakin neman zaɓen Shugaba Bola Tinubu a Kano, kamar yadda Barau Jibrin ya tabbatar a Facebook.

Kara karanta wannan

2027: Yadda Abba Kabir zai kafa tubalin goyon bayan Tinubu a Kano a yau

Manyan yan siyasa da suka koma APC

Daga cikin fitattun ’yan siyasar da suka shiga APC akwai mataimakin shugaban NDC a Kano, Hon. Ali Datti Yako, tare da wasu shugabannin jam’iyyar.

Haka kuma, tsohon shugaban ƙaramar hukumar Ungogo, Hon. Badaru Umar, ya shiga jam’iyyar tare da wasu mambobin ƙungiyar Dr Nasiru Yusuf Gawuna.

Tsohon Kakakin Majalisar Dokokin Kano, Rt. Hon. Isyaku Ali Danja, shi ma ya koma jam’iyyar APC tare da dimbin magoya bayansa.

Sauran waɗanda suka sauya sheka sun haɗa da tsohon ɗan takarar mataimakin gwamnan PDP, Hon. Yusuf Bello Danbatta, da magoya bayansa.

Tsohuwar mai ba Shugaban Ƙasa shawara ta musamman, Sanata Baraka Sani, ita ma tana cikin waɗanda suka koma APC a wannan sauyin siyasa.

Shugaban NNPP na ɓangaren mai tambarin littafi, Hon. Abdullahi Zubairu Abiya, shi ma ya kasance cikin sababbin mambobin APC da aka karɓa.

Tsohon ɗan takarar sanata na NNPP, Sanata Abdulmajid Dauda Dandawaki, ya koma APC tare da magoya bayansa, yayin da Hon. Kabiru Adamu Kofar Ruwa ya bi sahu.

Kara karanta wannan

Yan kabilar Igbo a Arewa sun nuna kwarin guiwa, za su ba Tinubu kuri’u miliyan 2

Kofar Ruwa, wanda ɗan takarar NDC ne na Majalisar Dokokin Kano, ya shiga APC tare da magoya bayansa, kamar yadda Daily Trust ta ruwaito.

Sauyin ya ƙara zurfafa sake fasalin siyasar Kano gabanin zaɓen 2027, yayin da fitattun ’yan siyasa da ƙungiyoyi ke ci gaba da komawa APC.

Yadda APC ke kara karfi a Kano

Ana sa ran wannan sauyin sheka na jama’a zai ƙarfafa tsarin siyasar APC a Kano, yayin da jam’iyyar ke ƙara shirye-shiryen zaɓukan ƙasa.

APC ta samu sauyin shiga daga jam’iyyun adawa, musamman NNPP, bayan Gwamna Abba Kabir Yusuf ya koma jam’iyyar mai mulki.

Bayan komawar gwamnan APC, wasu ’yan majalisa da masu riƙe da mukaman siyasa su ma sun sauya sheka, abin da ya ƙara sauya yanayin siyasar Kano.

Sababbin mambobin sun haɗa da ’yan siyasa masu gogewa a Majalisar Dattawa, Majalisar Wakilai, majalisar dokoki ta jiha, ƙananan hukumomi da gudanarwar jam’iyyu.

Shigowarsu, tare da wasu mutane 136,038, ana sa ran zai ƙara wa APC sababbin hanyoyin isa ga jama’a a ƙananan hukumomi daban-daban na Kano.

Wannan ya zo ne yayin da jam’iyyun siyasa ke ƙara gangamin neman goyon baya gabanin zaɓen 2027, yayin da APC ke ƙoƙarin ƙarfafa matsayinta.

Kara karanta wannan

2027: Dawo da tallafin mai da alkawura 6 da Atiku ya yi wa talakawa

Abba Kabir zai karfafi yan annywood

A wani labarin, an ji cewa Gwamnan Kano, Abba Kabir Yusuf, ya sake jaddada aniyarsa ta tallafa wa Kannywood domin bunƙasa matasa da tattalin arzikin jihar.

Gwamnan ya ce gwamnatinsa za ta ci gaba da samar da yanayin da zai ba mawaƙa, ‘yan fim da sauran masu fasaha damar amfani da basirarsu.

Abba Yusuf ya bayyana hakan ne yayin da ya karɓi shugabanni da mambobin Tripple R masu goyon bayan shugaba Bola Tinubu.

Asali: Legit.ng