Datti Baba Ahmed Ya Hango Matsala tun Yanzu a Tafiyar Kwankwaso da Peter Obi

• Ana ci gaba da magana kan hadewar Sanata Rabiu Musa Kwankwaso da Petee Obi a sabuwar jam'iyyar NDC mai adawa
• Tsohon dan takarar mataimakin shugaban kasa a zaben 2023, Yusuf Datti Baba-Ahmed, ya nuna shakku kan wannan sabuwar tafiyar
• Hakazalika, ya soki tsohon mai gidansa Peter Obi kan yadda ya rabu da jam'iyyar LP saboda rikicin da ya addabe ta

​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Tsohon dan takarar mataimakin shugaban kasa a zaben 2023, Yusuf Datti Baba-Ahmed, ya ce ficewar Peter Obi daga jam’iyyar LP a tsakiyar rikici ba mataki ne mai kyau na shugabanci ba.

Yusuf Datti Baba-Ahmed ya nuna cewa ba lallai ba ne masu zaɓe na Arewa su goyi bayan haɗakar siyasa tsakanin Peter Obi da Rabiu Musa Kwankwaso.

Jaridar TheCable ta ce Yusuf Datti Baba-Ahmed ya bayyana hakan ne yayin da yake jawabi ga manema labarai a ranar Litinin, 5 ga watan Mayu 2026 bayan sauya shekarsa zuwa PRP.

Kara karanta wannan

Buba Galadima ya gayyaci Atiku zuwa NDC bayan sauya shekar Kwankwaso da Obi

Obi, ɗan takarar shugaban ƙasa na LP a 2023, da Kwankwaso, tsohon gwamnan Kano, sun shiga jam’iyyar NDC a hukumance ranar Lahadi, 3 ga watan Mayun 2026.

Arewa za ta zabi Obi da Kwankwaso?

Ya ce wannan ra’ayinsa ne na kashin kai, inda ya lura cewa har yanzu yana riƙe da kyakkyawar dangantaka da dukkan ’yan siyasar biyu.

“Gwargwadon iko, ina ƙoƙarin kauce wa kiran sunan kowa a wannan matakin ko kuma siyasar kowa. Amma yana da wahala sosai Arewa ta goyi bayan Obi da Kwankwaso."

- Yusuf Datti Baba-Ahmed

Yusuf Datti Baba-Ahmed ya ƙara da cewa a baya ya ba Obi shawarar ya tuntuɓi Kwankwaso da sauran shugabannin adawa gabanin zaɓen 2027.

Ɗan siyasar ya ƙara da cewa ya ba da shawarar haɗakar ne a matsayin wani ɓangare na tsarin siyasa na dogon lokaci, amma ya lura cewa hakan yana haifar da tambayoyi game da dorewarsa.

“Idan a 2024 ba za ka iya tsara 2027 ba, yi haƙuri, ba zan iya ci gaba da kasancewa tare da kai ba."

“Don haka yanzu suna tafiya tare da Kwankwaso, ra’ayina ne. Shin kun fahimta? Shin hakan zai yi aiki? Ina tsammanin wannan babbar tambaya ce. Za mu zuba ido mu gani.”

Kara karanta wannan

ADC ta fadi hanyar da za ta zabi dan takarar shugaban kasa bayan ficewar Kwankwaso da Obi

- Yusuf Datti Baba-Ahmed

Ya nuna shakku kan hadakar Kwankwaso, Obi

Tsohon dan takarar mataimakin shugaban kasar ya kuma yi tambayar dalilin da ya sa Kwankwaso bai marawa Obi baya ba a zaɓen 2023, jaridar Vanguard ta kawo labarin.

“Duk da haka, ku tuna, me ya sa Kwankwaso bai marawa Peter Obi baya ba a 2022/23? Mene ne ya sauya tsakanin 2022 da 23?”

- Yusuf Datti Baba-Ahmed

Yusuf Datti Baba-Ahmed ya bayyana ra’ayin cewa yanayin siyasa na raba muƙaman shugabanci a cikin irin wannan haɗakar na iya fuskantar ƙalubale.

“Kana da mataimakin shugaban ƙasa da ya girme ka, tun farko a shekaru, a ilimi, a matsayin siyasa, da sauran abubuwa da dama."

- Yusuf Datti Baba-Ahmed

Datti Baba-Ahmed ya soki Peter Obi

Baba-Ahmed ya ƙara da cewa ya kamata Peter Obi ya tsaya a LP don warware rikicin jam’iyyar amma ya ce ba zai zauna inda ake rigingimu ba.

“Mutumin da ya sami tikitin jam’iyyar LP cikin sauƙi haka, ya kamata ya tsaya ya gyara matsalolin jam’iyyar komai wahalarsu."

Kara karanta wannan

Jam'iyyar PRP ta yi magana kan sauya shekar Kwankwaso da Obi zuwa NDC

- Yusuf Datti Baba-Ahmed

Kwankwaso ya aika sako ga 'yan Najeriya

A wani labarin kuma, kun ji cewa Sanata Rabiu Musa Kwankwaso, ya mika kokon bararsa ga 'yan Najeriya bayan ya sauya sheka zuwa jam'iyyar NDC.

Tsohon dan takarar shugaban kasar a zaben 2023, ya bukaci magoya bayansa da su yi rajista da sabuwar jam'iyyar.

Sanata Rabiu Musa Kwankwaso ya nuna kwarin gwiwar cewa jam'iyyar NDC za ta ceto Najeriya daga halin da take ciki.

Asali: Legit.ng