Takarar Gwarzo: Ƴan Kwankwasiyya Sun Yi Zanga Zanga a Ofishin INEC na Kano

• Magoya bayan Kwankwasiyya sun gudanar da zanga-zangar lumana a Kano, suna neman INEC ta dawo da sunan ɗan takarar gwamnan NDC
• Mataimakin ɗan takarar mataimakin gwamna na NDC, Mustapha Rabiu Kwankwaso ne ya jagoranci masu zanga-zangar zuwa ofishin INEC
• Kwankwasiyya ta zargi wani ma’aikacin INEC da hannu wajen amfani da takardun da ake zargin an ƙirƙira sa hannun bogi

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kano - Magoya bayan tafiyar Kwankwasiyya sun gudanar da zanga-zangar lumana a Kano ranar Juma’a bayan INEC ta fitar sunayen yan takara.

Yan Kwankwasiyyar sun gudanar da zanga-zangar lumana a Kano, suna neman INEC ta dawo da sunan ɗan takarar gwamnan NDC, Aminu Abdussalam Gwarzo, cikin jerin sunayen ’yan takara.

Kara karanta wannan

'Nadamar da APC za ta yi a ranar zabe': Kwankwaso ya jaddada kwarin guiwarsu

Jaridar Daily Trust ta ruwaito cewa sunan Gwarzo bai bayyana cikin jerin sunayen da Hukumar Zaɓe Mai Zaman Kanta ta Ƙasa (INEC) ta fitar a farkon makon nan ba.

Yaron Kwankwaso ya jagoranci zanga-zanga

Mataimakin ɗan takarar mataimakin gwamna na NDC, Mustapha Rabiu Kwankwaso, ya jagoranci masu zanga-zangar zuwa ofishin INEC, inda suka miƙa takardar ƙorafi kan cire sunan Gwarzo.

Kwankwasiyya ta zargi wani ma’aikacin INEC da hannu wajen amfani da takardun da ake zargin an ƙirƙira sa hannun bogi, yayin da hukumar ta tabbatar da samun ƙorafin.

Mataimakin ɗan takarar mataimakin gwamna na jam’iyyar, Mustapha Rabiu Kwankwaso, ne ya jagoranci masu zanga-zangar zuwa ofishin INEC na jihar Kano, inda suka miƙa takardar ƙorafi.

Mustapha Kwankwaso ya dage cewa jam’iyyar ta bi duk ƙa’idojin da suka shafi tsayar da ’yan takara, yana mai bayyana cire sunan Gwarzo a matsayin rashin adalci.

Kara karanta wannan

A karshe, Kwankwaso ya yi magana kan cire sunan Aminu Gwarzo da INEC ta yi

INEC ta tabbatar da samun ƙorafin

Kwamishinan Zaɓe na INEC a Kano, Abdu Zango, ya tabbatar da karɓar takardar ƙorafin, yana mai cewa an riga an sanar da dalilan cire sunan.

Sai dai ya tabbatar musu cewa har yanzu akwai damar ɗaukaka ƙara, inda wa’adin yin hakan zai ƙare ranar 24 ga Oktoba.

Ya jaddada cewa ofishin INEC na Kano ba ya goyon bayan kowace jam’iyya, sannan ya yaba wa masu zanga-zangar bisa nuna ladabi da bin doka.

Zango ya ce:

“Mun karɓi dukkan ƙorafe-ƙorafen, kuma mun tabbatar wa tawagar cewa za a ba da kulawar da ta dace ga takardar ƙorafinsu.”

Ya ƙara da cewa za su aika da takardar zuwa hedikwatar hukumar ta ƙasa domin nazari, yana mai yabawa ƙungiyar bisa gudanar da zanga-zangar cikin lumana.

Baya ga cire sunan Gwarzo, tafiyar Kwankwasiyya ta zargi wani ma’aikacin INEC da hannu wajen ƙirƙirar takardu da haɗa baki da wasu mutane.

Kara karanta wannan

Kungiyar Musulunci ta shiga batun cire sunan Pantami, ta yi kira ga Tinubu

Mai magana da yawun ƙungiyar, Dr. Habib Mohammed, ya ce an miƙa wasu wasiƙu ba tare da izini ba, waɗanda ake zargin an ƙirƙira sa hannun bogi a kansu.

Kwankwaso ya magantu kan cire sunan Gwarzo.

An ji cewa Rabiu Kwankwaso ya yi fatan hukumar INEC za ta gyara kuskuren cire sunan ɗan takarar gwamnan Kano na NDC, Aminu Abdulsalam Gwarzo.

Kwankwaso ya ce jam’iyyar ta rubuta wa INEC wasiƙa kamar yadda hukumar ta buƙata, amma har yanzu ba ta samu amsa ba.

Shugaban jam’iyyar na Kano ya ce INEC ta yi alƙawarin bincikar lamarin, kuma za ta iya mayar da sunayen ’yan takarar idan aka gano kuskure aka yi.

Asali: Legit.ng