Tsaro Ya Lalace: ’Yan Bindiga Sun Sace Kansila da ’Ya’yansa 2 a Kaduna

• Wasu da ake zargin ’yan bindiga ne sun yi garkuwa da kansilan Zaria tare da ’ya’yansa biyu lamarin da ya firgita mazauna yankin
• Lamarin ya faru da tsakar dare a unguwar Wucicciri, yankin Abba, inda maharan suka kutsa gidan kansilan
• Yankin ya daɗe yana fama da satar mutane da shanu, yayin da ƙoƙarin jin ta bakin ’yan sanda da hukumomin ƙaramar hukumar bai yi nasara ba

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Zaria, Kaduna - An shiga tashin hankali da ake zargin ’yan bindiga sun yi garkuwa da kansila a Ƙaramar Hukumar Zaria ta Jihar Kaduna.

Rahotanni sun tabbatar da cewa an sace Lamido Muhammad ne tare da ’ya’yansa biyu, Aliyu Lamido da Amir Lamido yayin harin.

Yadda aka sace kansila da 'ya'yansa

An ce abin ya faru ne da misalin ƙarfe 12 na dare ranar Lahadi, lokacin da maharan suka kutsa gidan kansilan da ke unguwar Wucicciri, a yankin Abba na ƙaramar hukumar, cewar Aminiya.

Kara karanta wannan

Bayan hana su taro, 'yan Tinubu Must sun yi wa 'yan sanda tambaya 9 masu zafi

Rahotanni sun ce maharan sun tafi da jami’in da ’ya’yansa zuwa wani wuri da har yanzu ba a san inda yake ba.

Mutumin wanda ɗan asalin ƙauyen Kaladi da ke gundumar Wucicciri ne, tsohon malamin makaranta ne kafin ya shiga harkokin siyasa, inda daga baya ya zama kansila mai kula da ayyuka na musamman a ƙaramar hukumar.

Har ila yau, waa majiya ta bayyana cewa kansilan na daga cikin mutanen da ke ba da gudummawa wajen ci gaban al’ummarsa.

Rahotannin sun kara da cewa ana sa ran zai kasance cikin waɗanda za su gudanar da aikin Hajjin bana.

Garkuwa da kansilan da ’ya’yansa ya faru ne a yankin da ya daɗe yana fama da matsalolin tsaro, musamman satar mutane da satar shanu.

Majiyoyi sun nuna cewa ƙauyukan Kaladi da Yaskwake, da kuma unguwannin Zakarar Mahauta da Zakarar Fulani, sun fuskanci hare-haren ’yan bindiga a shekarun baya.

Yan bindiga suna dade suna addabar kansila

Kara karanta wannan

Mutane sun fusata bayan 'yan sanda sun hana 'yan 'Tinubu Must Go' yin taro a Kano

Rahotanni suka ce a shekarar da ta gabata ma, Lamido yana cikin mutanen da ’yan bindiga suka sace wa shanunsu yayin wani hari da suka kai ƙauyensu.

Dalilin wannan lamarin da ya faru ne ma, manema labarai suka je ofishin Ƙaramar Hukumar saboda neman ƙarin bayani kan lamarin, amma ba a yi nasarar samun wani jami’i ba domin tabbatarda lamarin.

Har ila yau, ƙoƙarin jin ta bakin mai magana da yawun yan Sandan Jihar Kaduna, bai yi nasara ba, duk da kiransa da aka yi ta waya da saƙonnin ka da ta kwana.

Hatsabibin dan bindiga, Wakiyu ya mutu

An ji labarin cewa rundunar tsaro da hadin guiwa sun yi ajalin wani harsabiban yan bindiga da ake kiwa Wakiyu a Katsina.

Majiyoyi suka ce an kashe wani fitaccen dan bindigan ne yayin arangama tsakanin sojoji, ’yan sanda da jami’an C-Watch a Katsina da ke fama da matsalar tsaro.

Rahotanni sun ce marigayin na da alaƙa da ƙungiyar Kachalla Maha, kuma ana zarginsa da addabar mazauna Matazu da makwabtansu.

Asali: Legit.ng