Bankin Duniya Ya Zuga Tinubu kan Halin da Ƙasa ke Ciki, Ya Yi Alƙawari

• Shugaba Bola Tinubu ya yi maraba da rahoton Bankin Duniya, yana mai cewa sauye-sauyen gwamnatinsa sun fara inganta tattalin arziki
• Bankin Duniya ya ce tattalin arzikin Najeriya ya bunƙasa da kashi 4.2 cikin 100 a farkon shekarar 2026, yayin da hauhawar farashi ta ragu
• Tinubu ya amince cewa har yanzu jama'a ba su fara jin cikakken amfanin sauye-sauyen ba, ya kuma yi alkawarin rage farashin abinci da samar da ayyukan yi

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Shugaban Najeriya, Bola Tinubu, ya yi maraba da sabon rahoton Bankin Duniya kan tattalin arzikin ƙasar.

Shugaban ya bayyana cewa ya tabbatar da cewa sauye-sauyen gwamnatinsa sun fara aiki, duk da cewa ana buƙatar ƙarin ƙoƙari domin inganta rayuwar jama'a.

Hakan na cikin wata sanarwa da mai ba shi shawara na musamman kan yaɗa labarai da dabaru, Bayo Onanuga, ya fitar a shafin Facebook.

Kara karanta wannan

An hango Shettima a gona a kasar Habasha, ya fadi alherin da zai kawo Najeriya

Abin da Bankin Duniya ya ce

Shugaban ya ce rahoton Bankin Duniya na watan Oktoban 2026 ya tabbatar da cewa cire tallafin man fetur, haɗa kasuwannin canjin kuɗaɗen waje da kuma kiyaye tsauraran matakan kashe kuɗi sun fara daidaita tattalin arzikin Najeriya.

Tinubu ya ce waɗannan bayanai sun tabbatar da cewa matakan cire tallafin man fetur, haɗa kasuwannin canjin kuɗaɗen waje da ƙarfafa bin ƙa'idojin kashe kuɗi sun ƙara yawan kuɗaɗen shiga, sun daidaita tattalin arziki, tare da samar wa kowane matakin gwamnati damar saka kuɗi wajen inganta rayuwar jama'a.

Bankin Duniya ya bayyana cewa tattalin arzikin Najeriya ya bunƙasa da kashi 4.2 cikin 100 a farkon rabin shekarar 2026, idan aka kwatanta da kashi 3.9 cikin 100 a daidai lokacin shekarar 2025, duk da matsin tattalin arziki da yaƙin Gabas ta Tsakiya ya haddasa.

Tinubu ya amince ana buƙatar ƙarin aiki

Duk da waɗannan alamun ci gaba, Bola Tinubu ya amince cewa har yanzu ba dukkan iyalan Najeriya ne suka fara jin amfanin sauye-sauyen tattalin arzikin ba.

Kara karanta wannan

An zo wajen: Gwamnatin Tinubu ta amince cewa ta jefa 'yan Najeriya cikin talauci

Ya ce ana fara ganin amfanin sauye-sauyen, amma akwai sauran aiki domin tabbatar da cewa sun inganta rayuwar kowace iyali, musamman ta hanyar rage farashin abinci da samar da ayyukan yi masu kyau ga matasa.

Shugaban ya yi alkawarin faɗaɗa shirin tallafin kuɗi kai tsaye ga iyalai masu buƙata, wanda ya ce ya riga ya tallafa wa gidaje sama da miliyan 10.

Ya kuma yi alƙawarin hanzarta faɗaɗa amfani da iskar gas mai matsewa a matsayin makamashin ababen hawa, ƙara yawan amfanin gona da inganta damar samun ingantaccen kiwon lafiya da ilimi mai nagarta.

Bashin Najeriya: An caccaki Bankin Duniya

A baya, an ji cewa 'yan Najeriya sun cika shafukan Bankin Duniya da martani mai zafi kan shirin ba gwamnatin Bola Tinubu sabon bashin dala biliyan 1.2.

Bankin Duniya ya ce ya takaita sashen sharhi a wasu bangarorin shafinsa na Instagram bayan yawaitar martani daga ’yan Najeriya.

Rahotanni sun nuna cewa idan aka amince da bashin, jimillar kudaden da Bankin Duniya ya bai wa Najeriya za su kai kusan dala biliyan 10.

Asali: Legit.ng