Gwamna Ya Ji Korafin Musulmi, Zai Gina Masallaci kusa da Gidan Abubakar Malami
- Gwamnan Kebbi, Nasir Idris, ya amince da sayen wani gida domin mayar da masallacin wucin gadi zuwa na dindindin
- An sayi gidan ne a yankin Go-Slow da ke Birnin Kebbi, kusa da gidan Abubakar Malami, tsohon ministan shari’a
- Matasa sun yabawa matakin, inda suka roki gwamnan ya gina masallaci da makarantar Islamiyya domin yaransu
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
Kebbi - Gwamnan Kebbi, Nasir Idris, ya amince da sayen wani gida domin mayar da wani masallacin wucin gadi da ke yankin Go-Slow
Yankin yana Birnin Kebbi, kusa da gidan dangin Abubakar Malami, SAN, wanda shi ne ɗan takarar ADC na gwamnan Kebbi.
Source: Facebook
Gwamna zai gina wa Musulmi masallaci
Mai ba gwamnan shawara kan harkokin addini, Mallam Imrana Bin-Usman, ne ya bayyana hakan yayin miƙa takardar gidan ga mazauna yankin, cewar Daily Trust.
Bin-Usman ya ce gwamnati ta ɗauki matakin ne bayan mazauna yankin sun nemi a samar musu da wurin ibada na dindindin.
Ya ce buƙatar ta biyo bayan sanya fitilun hasken rana da gwamnatin jihar ta yi a kan titunan yankin domin inganta tsaro.
Ya ce gwamna Nasir ya saurari koken mazauna yankin, sannan ya bayar da umarnin sayen gidan domin mayar da masallacin wucin gadi can.
Bin-Usman ya ce wannan mataki tarihi ne, domin ba da jimawa ba gwamnatin ta samar da fitilun hasken rana a yankin.
Ya ce bayan an kammala aikin, mazauna yankin sun bayyana bukatarsu ta mayar da masallacin wucin gadi zuwa wurin ibada na dindindin.
Source: Original
Matasan yankin sun yaba wa Gwamna
Jagoran matasan yankin, Mallam Taslim Tukur-Kola, ya bayyana matakin gwamnan a matsayin abin farin ciki da zai kawo sauƙi ga mazauna.
Ya ce mazauna yankin sun yaba da shawarar gwamnan na magance matsalar rashin ingantaccen wurin ibada na dindindin.
Tukur-Kola ya ce yankin ya samar da fitattun ’yan siyasa, amma bai samu irin wannan tallafi wajen samar da masallacin dindindin ba, cewar Tribune.
Ya ƙara da cewa wurin yana da tazarar wasu ’yan mita daga gidan dangin Malami, tsohon Antoni-Janar na Tarayya kuma ministan shari’a.
Malami ya riƙe wannan mukami daga shekarar 2015 zuwa 2023, amma Tukur-Kola ya ce bai tallafa wajen sayen ko gina masallacin ba.
Shi ma limamin masallacin, Mallam Muhammad Sani, ya nuna godiyarsa ga gwamnan Kebbi saboda wannan tallafi da ya samar wa al’umma.
Sani ya yi addu’ar Allah ya taimaki Idris wajen cimma burinsa na siyasa, tare da ci gaba da shiryar da shi kan al’amuran jihar.
Gwamna ya yi Allah wadai da harin yan bindiga
Mun ba ku labarin cewa wasu ‘yan bindiga sun kai hari kauyen Lafagu, inda suka kashe basaraken ƙauyen tare da tilasta wa mazauna gudun hijira zuwa wuraren da suka fi aminci.
Gwamnan jihar Kebbi, Dr. Nasir Idris ya yi Allah-wadai da kisan basaraken, yana mai bayyana harin a matsayin dabbanci.
Gwamnatin jihar Kebbin ta tabbatar da cewa tana aiki da jami’an tsaro domin kamo waɗanda suka aikata wannan danyen aiki.
Asali: Legit.ng
