Amurka Ta Gamu da Asara da Jirgin Yakinta Ya Rikito daga Sararin Samaniya

• Wani jirgin yaƙin F-16 na Amurka ya yi hatsari a sansanin sojin Spangdahlem da ke yammacin Jamus
• Matuƙin jirgin ya tsira bayan ya yi amfani da kujerar ficewa ta gaggawa, amma ya samu raunuka kuma ana kula da lafiyarsa
• Hukumomin sojin Amurka sun ce ana ci gaba da bincike domin gano musabbabin hatsarin wanda ya ritsa da jirgin yakin

​​​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Kasar Jamus - Wani jirgin yaƙin sojojin Amurka kirar F-16 Fighting Falcon ya yi hatsari a wani sansanin sojin Amurka da ke yammacin ƙasar Jamus.

Lamarin hatsarin wanda ya jikkata matuƙin jirgin ya auku ne a ranar Talata, 22 ga watan Satumban 2026.

Tashar AP News ta ce hakan na kunshe ne a cikin wata sanarwa da sansanin sojin saman Amurka na Spangdahlem Air Base ya fitar.

Kara karanta wannan

"Za a iya cikin kwanaki 7"; Iran ta sanar da Amurka sharadin bude mashigar Hormuz

A cikin sanarwar, an bayyana cewa matuƙin jirgin ya yi amfani da kujerar ficewa ta gaggawa kafin jirgin ya faɗi, kuma a halin yanzu yana samun kulawar likitoci.

Sanarwar ta ce jirgin, wanda ke ƙarƙashin rundunar 52nd Fighter Wing, ya yi hatsari ne da misalin ƙarfe 2:30 na rana agogon ƙasar Jamus.

Ana binciken musabbabin hatsarin

Hukumomin sojin Amurka sun ce ana ci gaba da bincike domin gano musabbabin hatsarin.

Tun da farko, hukumomin yankin da sansanin Spangdahlem yake sun bayyana cewa jami’an kashe gobara da na ceto sun garzaya wurin bayan faruwar lamarin.

Kamfanin dillancin labarai na Jamus, dpa, ya ruwaito cewa sansanin Spangdahlem na da rundunar jiragen yaƙin F-16 guda kusan 20.

Shaidu sun ga jirgin yana sauka cikin sauri

Rahotanni sun ce wasu shaidu sun ga jirgin yana sauka cikin sauri kafin a ga wani babban hayaƙi baƙi yana tashi kusa da titin saukar jiragen sama.

Ko da yake matuƙin jirgin ya samu raunuka, babu rahoton cewa wani mutum a ƙasa ya rasa rai ko ya ji rauni sakamakon hatsarin.

Kara karanta wannan

'Yan ta'adda sun shiga uku, gwamnatin tarayya ta sayo sababbin jiragen yaki

Hatsari na biyu cikin kwanaki biyar

Wannan shi ne jirgin F-16 na biyu da Amurka ta rasa cikin kwanaki biyar, bayan wani jirgin horo ya yi hatsari a jihar Michigan ranar 17 ga Satumba.

Rundunar jiragen yaƙin da ke sansanin Spangdahlem na taka muhimmiyar rawa wajen ayyukan sojin saman Amurka da ƙungiyar tsaron NATO a sassa daban-daban na duniya.

Sansanin na da ma’aikatan soja da farar hula kusan 5,000 tare da iyalansu, sannan yana samar da aikin yi ga ’yan ƙasar Jamus tsakanin 700 zuwa 800.

Sojojin saman Amurka sun kasance a sansanin Spangdahlem tun daga tsakiyar shekarun 1950, kuma tare da sansanin Ramstein, ana kallon wuraren biyu a matsayin manyan sansanonin sojin Amurka a Turai.

Jirgin sama ya yi hatsari a Malaysia

A wani labarin kuma, kun ji cewa jirgin sama mai saukar ungulu ya faɗi a wani filin jirgi mai nisa a cikin jihar Sarawak, da ke arewa maso yammacin tsibirin Borneo a Malaysia.

Jami’an ƙasar sun tabbatar da cewa mutane biyar sun mutu a jirgin na BO-105, wanda ke aiki da hukumar Flying Doctor Service.

Asali: Legit.ng