"Za a Iya cikin Kwanaki 7"; Iran Ta Sanar da Amurka Sharadin Bude Mashigar Hormuz

• Iran ta ce za ta iya sake buɗe Mashigar Hormuz cikin kwanaki bakwai idan Amurka ta yi wasu abubuwan da take so
• Wani babban jami’in Iran ya ce Tehran na son Amurka ta bayyana a hukumance cewa tana son warware rikicin ta hanyar diflomasiyya
• Jami’in ya ce wakilan Iran da ke New York domin halartar babban taron Majalisar Ɗinkin Duniya suna da cikakken iko na farfaɗo da tattaunawar diflomasiyya da Amurka

​​​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Birnin Tehran, Iran - Iran ta ce za ta iya sake buɗe Mashigar Hormuz cikin kwanaki bakwai idan Amurka ta sassauta matsin lamba ta soji.

Hakazalika ɗage killacen da ta kakaba wa tashoshin jiragen ruwan Iran na daga cikin sharuddan da take so a cika.

Wani babban jami’in Iran ne ya bayyana hakan a wata hira da kamfanin dillancin labarai na Reuters ranar Talata, 22 ga watan Satumban 2026.

Kara karanta wannan

Gwamna ya ɗauki zafi da 'yan bindiga suka shiga gari, suka kashe basarake a Najeriya

Iran ta nemi Amurka ta koma diflomasiyya

A ranar Lahadi, rundunar sojin Iran ta ce cibiyar kwamandojin sojin ƙasar ta samu bayanin cewa Amurka na shirin sake fara ayyukan soji tare da tallafin wasu ƙasashen yankin.

Rundunar ta kuma yi gargadin cewa idan Amurka ta sake kai hari, martanin Tehran zai kasance ba tare da iyaka ko wani sharaɗi ba.

Jami’in ya ce Amurka na bukatar ta bayyana a fili cewa tana son warware matsalar ta hanyar diflomasiyya tare da sanar da hakan a hukumance.

Ya ce daga nan ne za a iya cimma matsaya kan jadawalin yadda za a fara aiwatar da wannan tsari.

Wakilan Iran na New York suna da ikon tattaunawa

Jami’in ya bayyana cewa tawagar Iran da ke halartar babban taron Majalisar Ɗinkin Duniya a New York tana da cikakken iko na farfaɗo da tattaunawar diflomasiyya da Amurka.

Ya kuma ce Shugaban Iran, Masoud Pezeshkian, wanda ya bar Tehran zuwa New York da safiyar Talata, ba zai gana da Shugaban Amurka Donald Trump a hedikwatar Majalisar Ɗinkin Duniya ba.

Kara karanta wannan

Iran ta gindaya sharuddan kawo karshen yaki da Amurka

Sai dai jami’in ya ce ana iya tattauna cikakkun bayanai kan yarjejeniyar kawo ƙarshen yaƙi tsakanin Washington da Tehran a New York ta hanyar masu shiga tsakani.

A cewarsa, Iran ta riga ta isar da shawararta ga Amurka ta hannun masu shiga tsakani a ranar 16 ga Satumban 2026.

Iran ta ce tana maraba da diflomasiyya

Jami’in ya bayyana taron Majalisar Ɗinkin Duniya a matsayin wata babbar dama da Amurka za ta iya amfani da ita wajen komawa teburin diflomasiyya.

Ya ce Tehran a shirye take ta farfaɗo da tattaunawar diflomasiyya da Washington idan Amurka ta ɗauki matakai na zahiri da za su nuna aniyar warware rikicin ta hanyar tattaunawa.

An kai karar Trump a Amurka

A wani labarin kuma, kun ji cewa CNN, MS NOW da Politico sun kai ƙarar gwamnatin Shugaban Amurka Donald Trump gaban kotu.

Kamfanonin yada labaran sun kai karar ne bayan an hana ’yan jaridarsu shiga Fadar White House tare da soke takardun izinin aikin manema labarai.

Asali: Legit.ng