Yan Bindiga Sun Nuna Rashin Imani, Sun Kashe Wani Malami da Bayin Allah da Dama
- ‘Yan bindiga sun kashe limamin wata cocinnBaptist da wasu mutane tara a hare-hare daban-daban a Barakin-Ladi da Riyom da ke jihar Filato
- Rahotanni sun nuna cewa an kashe mutane shida bayan an kai wa fasinjojin da ke tafiya daga kauyen Gana-Ropp hari
- Wadannan sababbin hare-haren sun sanya tsoro ya karu a tsakanin mazauna yankunan kananan hukumomi biyu
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Plateau, Nigeria - Wani malamin Cocin Baptist da wasu mutane tara sun rasa rayukansu tsakanin daren Asabar zuwa safiyar Lahadi bayan wasu ‘yan bindiga sun kai hare-hare a jihar Filato.
An ruwaito cewa maharan sun kashe limamin cocin tare da mutane 9 ne a kauyukan da ke yankin karamar hukumar Barkin Ladi.
Source: Original
Jaridar Nigerian Tribune ta gano cewa maharan sun kai hari kan fasinjojin da ke tafiya zuwa Gana-Ropp a Barakin-Ladi a yammacin Asabar, inda suka kashe mutane shida tare da jikkata wasu da ke cikin motar.
Wani mazaunin yankin da ya shaida lamarin, Ukasha Garba, ya ce mutanen shida da aka kashe fasinjoji ne daga kauyen Gana-Ropp, wadanda ke tafiya zuwa aikin gona.
Yan bindiga sun kashe fasto
An kuma gano cewa a sanyin safiyar jiya Lahadi, yan bindiga suka yi wa wani fasto na Cocin Baptist, sakatarensa da wani mutum guda kwanton bauna tare da harbe su har lahira a lokacin da suke kan hanyarsu ta zuwa coci a Dorowa Babuje.
Lamarin ya kawo cikas ga gudanar da ibadar Lahadi a wasu garuruwa da ke makwabtaka, yayin da mutane suka fasa zuwa coci saboda fargabar sake kai wasu hare-hare.
Haka kuma, an ruwaito cewa an kashe wata mata a daren Asabar a Beaten Wereng da ke karamar hukumar Riyom, yayin da aka kashe wani mutum a gundumar Ratyidiin Fan.
Kungiyar BYM ta yi Allah wadai
Sakataren yada labarai na kungiyar Berom (BYM) ta kasa, Rwang Tengwong, ya tabbatar da hare-haren, yana mai bayyana su a matsayin abin damuwa kuma abin da ba za a amince da shi ba.
Ya ce:
“Mun yinAllah wadai da wadannan hare-hare da kakkausar murya, kuma muna kira ga hukumomin tsaro da su gaggauta karfafa matakan tsare al'umma. Dole ne a kawo karshen kashe-kashen mutanen da ba su ji ba, ba su gani ba.”
Ya yi kira da a gudanar da bincike cikin gaggawa kan hare-haren, tare da kama wadanda ke da hannu a ciki da gurfanar da su a gaban kotu, kamar yadda Vanguard ta ruwaito.
Source: Twitter
Tengwong ya kuma bukaci mazauna yankin da su kwantar da hankalinsu tare da kasancewa cikin shiri, yayin da ya yi kira ga hukumomin tsaro da su dauki matakan kariya tun kafin a sake kai hare-hare.
Yunkurin tuntubar kakakin rundunar ‘yan sandan jihar, SP Alfred Alabo, bai yi nasara ba, domin ba a same shi ta wayarsa ba.
Yan bindiga sun kashe mutane a kasuwa
Kun ji cewa ‘yan bindiga sun kai hari wata kasuwar amfanin gona da ke Mangu, inda suka kashe mutane uku tare da jikkata wasu da dama.
Mazauna garin Mangu sun ce harin ya faru da misalin karfe 8.30 na dare, lokacin da ‘yan kasuwa da masu sayayya ke shirin rufe kasuwar.
Asali: Legit.ng
