Najeriya Ta Sake Yin Babban Rashi, Tsohon Shugaban Jam'iyyar PDP na Kasa Ya Rasu

• Tsohon shugaban Jam’iyyar PDP na ƙasa, Alhaji Bamanga Tukur, ya rasu yana da shekara 91 bayan fama da rashin lafiya
• Ɗaya daga cikin ’ya’yansa ya tabbatar da rasuwar, inda ya ce tsohon gwamnan ya rasu a gidansa da ke Abuja
• Bamanga Tukur ya taɓa zama gwamnan tsohuwar Jihar Gongola tare da riƙe muƙaman gwamnati da na siyasa daban-daban

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja, Nigeria - Tsohon shugaban Jam’iyyar PDP na ƙasa, Bamanga Muhammad Tukur, ya rasu yana da shekara 91, bayan ya shafe wani lokaci yana fama da rashin lafiya.

Rasuwar Tukur ta kawo ƙarshen rayuwar wani fitaccen ɗan siyasa da ɗan kasuwa wanda ya shafe shekaru yana taka muhimmiyar rawa a harkokin gwamnati da siyasar Najeriya.

Ɗaya daga cikin ’ya’yansa ne ya tabbatar da rasuwar ga BBC Hausa, inda ya bayyana cewa mahaifinsu ya rasu a gidansa da ke Abuja.

Kara karanta wannan

An yi wa Kwankwaso wankin babban bargo da ya nemi Atiku ya janye takarar 2027

Sai dai bai bayyana ƙarin bayani kan irin rashin lafiyar da tsohon ɗan siyasar ya yi fama da ita ba kafin Allah Ya karbi rayuwarsa

Yadda Bamanga Tukur ya jagoranci PDP

Bamanga Tukur ya taɓa jagorantar PDP ta ƙasa daga shekarar 2012 zuwa 2014, a lokacin da jam’iyyar ke fuskantar manyan ƙalubale na siyasa.

A lokacin da yake shugabancin jam’iyyar, PDP na daga cikin manyan ƙungiyoyin siyasa a Najeriya, kuma tana da muhimmiyar rawa wajen tafiyar da harkokin siyasar ƙasar.

Tukur ya kasance cikin manyan ’yan siyasar da suka yi tasiri a harkokin jam’iyyar, musamman a lokacin da ake fuskantar sauye-sauye da sabani a cikin siyasar Najeriya.

Bayan shekaru biyu yana jagorantar PDP, ya bar shugabancin jam’iyyar a shekarar 2014. Wannan ya kasance wani muhimmin mataki a rayuwarsa ta siyasa, bayan dogon lokaci yana riƙe da muƙamai daban-daban.

Ya rike kujerar gwamnan Gongola

Kafin ya zama shugaban PDP na ƙasa, Tukur ya taɓa zama gwamnan tsohuwar Jihar Gongola. Wannan muƙami ya kasance ɗaya daga cikin manyan mukaman da ya riƙe a tsawon rayuwarsa a fagen siyasa da gwamnati.

Kara karanta wannan

"Allah ne kadai zai iya dakatar da shi," Datti ya hango abin da ke shirin faruwa a zaben 2027

Tsohuwar Jihar Gongola ta ƙunshi yankunan da daga baya aka raba suka zama wasu jihohi, ciki har da Adamawa da Taraba.

Baya ga siyasa, Tukur ya kuma kasance ɗan kasuwa, kuma ya riƙe wasu muƙaman gwamnati daban-daban a tsawon rayuwarsa.

Tukur ya rasu yana da shekara 91 a Abuja, bayan ya shafe shekaru yana rayuwa a matsayin ɗaya daga cikin tsofaffin ’yan siyasar Najeriya.

Karin bayani na tafe...

Asali: Legit.ng