INEC Ta Bude Shafin Daukar Ma'aikata, Ta Jero Irin Mutanen da Ta ke Nema

• Hukumar INEC ta buɗe shafin neman aikin ma'aikatan wucin gadi da za su taimaka wajen gudanar da babban zaɓen 2027
• Matsayin da ake nema ya haɗa da jami'an kula da rumfunan zaɓe, masu kula da cibiyoyin rajista da masu ba da tallafin fasaha
• INEC ta ce shafin neman aikin zai kasance a buɗe har zuwa tsakar daren 18 ga Nuwamba 2026, inda ta buƙaci masu so su gaggauta

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja – Hukumar Zaɓe Mai Zaman Kanta ta Ƙasa (INEC) ta buɗe shafin neman aikin ma'aikatan wucin gadi da za su taimaka wajen gudanar da babban zaɓen 2027.

Hukumar ta ce aikin neman ma'aikatan zai gudana ne ta tsarin daukar ma'aikata na INEC, inda ƴan Najeriya da suka cika sharuɗɗan za su iya neman aikin a jihohin ƙasar.

Kara karanta wannan

Ciwon zuciya ya yi kamari: Gwamnatin Tinubu ta nemo dabarun yaki da cutar

A sakon da ta wallafa a X, INEC ta ce za a rufe shafin neman aikin ne da tsakar dare ranar 18 ga Nuwamba 2026.

Matsayin da INEC ke dauka

Matsayin da hukumar ta sanar sun haɗa da manyan jami'an kula da rumfunan zaɓe, manajojin cibiyoyin rajistar masu zaɓe, ma'aikatan tallafin fasaha na cibiyoyin rajista, jami'an rumfunan zaɓe da mataimakansu.

The Guardian ta wallafa cewa INEC ta ce masu neman aikin dole ne su cika takamaiman sharuɗan da aka gindaya ga kowane matsayi da suke nema.

Hukumar ta tanadi buƙatu daban-daban ga nau'o'in ma'aikatan wucin gadi, inda wasu daga cikin guraben suke ga ƴan bautar ƙasa (NYSC), ɗaliban manyan makarantu da ma'aikatan gwamnati da suka cancanta.

Mutanen da za su iya nema

INEC ta ce, ban da masu neman guraben aikin fasaha, galibi ana buƙatar masu neman aikin su kasance mazauna jihar da suka zaɓa yayin cike fom ɗin neman aikin.

Kara karanta wannan

Obi ya dawo ya dauko irin salon Atiku, ya ce zai maido tallafin man fetur

Hukumar ta kuma ce masu neman aikin ba za su kasance mambobin wata jam'iyyar siyasa ba, kuma bai kamata su kasance sun nuna goyon baya ga wani ɗan takara ko jam'iyyar siyasa ba.

Matakin na daga cikin shirye-shiryen INEC na babban zaɓen 2027, wanda zai buƙaci tura ma'aikatan wucin gadi zuwa rumfunan zaɓe da sauran wuraren da aka tanada a faɗin ƙasar.

INEC ta kuma yi gargaɗi ga ƴan Najeriya da su yi hattara da shafukan bogi ko wasu mutane da za su nemi kuɗi a madadin taimaka musu wajen samun aikin.

An fara yajin aiki a Najeriya

A wani labarin, mun ruwaito cewa ma'aikatan gwamnati ƙarƙashin Ƙungiyar Haɗin Kan Majalisar Tattaunawar Ma'aikatan Gwamnatin Ƙasa (JNPSNC) sun fara yajin aikin gargadi na kwanaki uku.

Yajin aikin ya biyo bayan abin da ƙungiyar ta bayyana a matsayin gazawar gwamnatin tarayya wajen magance buƙatun ma'aikatan da suka dade suna nema.

A wata sanarwa da sakataren ƙasa na JNPSNC, Gbenga Olowoyo, ya fitar, ƙungiyar ta umarci shugabannin ƙungiyoyin da ke ƙarƙashinta su tabbatar da bin yajin aikin gaba ɗaya.

Asali: Legit.ng