Albashin Wasu Sojoji Ya Zarce Naira Miliyan 2 duk Wata a Najeriya

• Gwamnatin Tarayya ta amince da sabon tsarin albashi na jami’an Rundunar Sojin Najeriya, inda Janar-janar suka kasance za su fi samun kudi
• Sabon tsarin ya sanya mafi girman albashi na shekara ga manyan hafsoshin a N29.75m, wanda ya yi daidai da kusan N2.48m a duk wata
• Tsarin, wanda Hukumar Kula da Albashi, Kudin Shiga da Albashi ta Kasa ta fitar, ya fara aiki daga 1 ga Satumba 2026, kuma zai shafi sojoji baki daya

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Abuja – Gwamnatin Tarayya ta amince da sabon tsarin albashi ga jami’an Rundunar Sojin Najeriya, inda manyan hafsoshin soja suka samu mafi girman adadin albashin da ake amfani da shi wajen lissafin fansho.

Sabon tsarin ya shafi Sojojin Kasa, Rundunar Sojin Ruwa da Rundunar Sojin Sama, kuma ya kunshi adadin albashin shekara-shekara bisa mukamai da matakan albashi.

Kara karanta wannan

Iran ta fuskanci Koriya ta Kudu, ta mata gargadi kan hada kai da Amurka

Punch ta wallafa cewa Hukumar Kula da Albashi, Kudaden Shiga da Albashi ta Kasa ta bayyana cewa sabon tsarin ya fara aiki daga 1 ga Satumba 2026.

Sabon tsarin albashin sojoji

Wata sanarwa da hukumar ta fitar a ranar 3 ga Satumba 2026 ta bayyana cewa an yi sabon tsarin ne bisa tanadin Kundin Tsarin Mulkin Najeriya na 1999 da kuma amincewar Shugaba Bola Tinubu.

Sanarwar ta yi nuni da wata takarda da hukumar ta fitar a ranar 28 ga Agusta 2026 wadda ta yi garambawul ga tsarin albashin rundunonin soja na kasa.

Takardar ta ce an amince da sabon tsarin albashin domin amfani da shi wajen lissafin hakkokin fansho na jami’an rundunonin tsaro.

Albashin janar-janar a Najeriya

A karkashin sabon tsarin, Janar-janar, Admirals da Air Chief Marshals za su samu albashi na shekara daga N21,898,443 zuwa N29,745,561, gwargwadon matakin albashi.

Wannan na nufin mafi girman adadin, idan aka raba shi zuwa watanni 12, ya kai kusan N2.48m a wata.

Kara karanta wannan

Dalung ya jefawa Christopher Musa tambayoyi kan zargin Nasir El Rufa'i

Laftanar Janar, Vice Admirals da Air Marshals za su samu tsakanin N16,995,355 zuwa N25,908,856 a shekara.

Manjo Janar, Rear Admirals da Air Vice Marshals kuma za su samu tsakanin N14,977,173 da N23,899,084 a shekara.

Albashin sauran manyan hafsoshi

Birgediya Janar, Commodores da Air Commodores za su samu tsakanin N13,863,954 da N16,387,106 a shekara.

Kanal, Kyaftin za su samu tsakanin N8,313,134 da N9,489,244, yayin da Laftanal Kanal, da wasu Kwamandoji za su samu tsakanin N7,552,046 da N8,739,205.

Manjo za su samu albashin fansho na shekara daga N5,987,815 zuwa N7,009,293. Takardar ta ce:

“Sabon tsarin zai fara aiki daga 1 ga Satumba 2026.”

Maganar juyin mulki a Najeriya

A wani labarin, mun ruwaito cewa Ministan Tsaro, Christopher Musa, ya ce za a saki wasu daga cikin mutanen da aka kama kan zargin yunkurin juyin mulki idan bincike ya tabbatar ba su da laifi.

Musa ya bayyana hakan ne a wata hira, inda ya ce masu bincike na daukar lokaci domin tabbatar da cewa ba a zargi mutanen da ba su da hannu cikin lamarin ba.

Ya ce Hukumar DSS da NIA suna ci gaba da bincike, yayin da wasu daga cikin wadanda aka kama tuni aka gurfanar da su a gaban kotu.

Asali: Legit.ng