Abin Tausayi: Yadda Yan Bindiga Suka Rika Tashin Mutane daga Barci, Su Harbe Su Har Lahira

• Aƙalla mutane 24 ne aka kashe a harin da ‘yan bindiga suka kai kauyen Bin-Per da ke yankin karamar hukumar Mangu a Filato
• Bayanai daga mazauna yankin da suka tsira sun ce ‘yan bindigar sun rika shiga gidaje suna harbe mutanen da ke barci
• Wani mazaunin yankin ya ce an kashe mata da ’ya’yansa huɗu a harin wanda ya auku da tsakar dare

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Plateau - Galibin mazauna kauyen Bin-Per da ke gundumar Kombun sun kwanta barci a daren Litinin, 17 ga Agusta, ba tare da tunanin cewa wasu ’yan bindiga ɗauke da muggan makamai sun riga sun doso gidajensu ba

Da misalin ƙarfe 11:30 na dare zuwa farkon safiyar Talata, 18 ga Agusta, ’yan bindigar sun jefa al’ummar cikin firgici, inda rahotanni suka ce sun fara harbin ’yan sa-kai kafin su rarrabu gida-gida.

Kara karanta wannan

Mahara sun shiga gida gida, sun yi wa mutane sama da 20 yankar rago suna cikin barci

Vanguard ta ruwaito cewa a lokacin da maharan suka janye, aƙalla mutane 24 sun rasa rayukansu, a cewar majiyoyin al’umma, yayin da wasu suka samu raunuka.

An kuma ƙona wasu gidaje tare da lalata gonaki da amfanin gona, lamarin da ya jefa iyalai cikin matsanancin baƙin ciki tare da barin al’ummar cikin ruɗani kan girman bala’in.

Amma baya ga adadin waɗanda aka kashe, labarin bala’in Bin-Per ya ƙara muni ta hanyar labaran waɗanda suka tsira, waɗanda suka ga ’yan uwansu suna ɓacewa cikin duhun dare.

Yan bindiga sun kashe yan gida daya

Girman kisan ya ƙara tayar da hankali yayin da mazauna yankin ke ba da labarin yadda aka shafe wasu iyalai gaba ɗaya.

Wani mazaunin yankin, Fangwsak James, ya ce an kashe mutane takwas daga cikin iyali guda a wani gida, inda aka bar wani yaro mai shekaru biyu kaɗai da ya tsira, duk da cewa ya samu raunin harbi a ƙafarsa da ƙugunsa.

Kara karanta wannan

'Yan bindiga sama da 100 sun tafka ta'asa yayin wani hari a Katsina

Wani mazaunin yankin, Shedrack Ayuba, ya ce ya rasa matarsa da ’ya’yansa huɗu a harin.

Maharan sun fi karfin yan sa-kai

A cewar Ayuba, yana sintiri tare da wasu ’yan sa-kai a lokacin da kwatsam suka ji karar harbe-harbe daga wurare daban-daban.

“Na kasance tare da wasu ’yan sa-kaina muna gadin al’umma lokacin da muka ji ana harbe-harbe daga ko’ina,” in ji shi.

Ayuba ya ce ya yi ƙoƙarin tserewa ta wani gini, amma aka harbe shi a ƙafa.

“Na samu damar tserewa ta wata gonar masara. Amma ba a bar matata da ’ya’yana ba. Sun shiga gidana suka fara harbinsu yayin da suke barci.

“An kai ni asibiti. Sai washegari na gano cewa an kashe matata,” in ji shi.

Wani mazaunin yankin ya ce wani mutum kuma ya rasa ’ya’yansa uku a harin, lamarin da ya ƙara nuna irin mummunan tasirin da harin ya yi kan iyalai.

Yadda mahar suka shiga gida-gida

Mazauna yankin sun ce maharan sun yi kamar sun tsara yadda za su kewaye garin gaba daya domin hana mutane tserewa.

Kara karanta wannan

'Yan bindiga sun yi ta'addanci a Sokoto, sun kashe mutum 32

Ronbak Maxwell, wani mazaunin yankin, ya ce maharan sun fara harbin ’yan sa-kai ne kafin su samu damar shiga cikin garin.

Ya ce lamarin ya fara ne da misalin ƙarfe 11:30 na dare, inda aka kashe kusan ’yan sa-kai biyu kafin maharan su kutsa cikin kauyen

A cewarsa, ’yan bindigar sun rarrabu gida-gida, inda suka fara shiga gidaje suna harbin mutane, kamar yadda Leadership ta kawo.

“Mun nemi taimako amma ba a samu martani cikin sauri ba,” in ji Maxwell.

An kama wanda ya shirya harin

A wani labarin, kun ji cewa dakarun Rundunar 'Yan sanda sun kama babban wanda ake zargi da hannu a harin da ya yi ajalin mutane 25 a yankin Mangu ta jihar Filato.

Sojoji sun ƙaddamar da Operation Hard Nut tare da tura ƙarin dakaru domin farautar maharan a yankin da lamarin ya auku.

Asali: Legit.ng