Gwamna Ya Yi Zarra, Ya Saye Jiragen Yaki don Ruguza 'Yan Ta'adda

• Gwamnan jihar Oyo, Seyi Makinde, ya karɓi sababbin jiragen leƙen asiri guda biyu domin ƙarfafa yaƙi da matsalolin tsaro a faɗin jihar
• Makinde ya ce an sayo jiragen ne saboda girman faɗin jihar Oyo domin taimaka wa jami'an tsaro wajen tattara bayanan sirri cikin gaggawa
• Gwamnan ya bayyana cewa jiragen za su fara aiki nan take tare da haɗin gwiwar Rundunar Sojin Sama ta Najeriya (NAF)

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Jihar Oyo – Gwamnan jihar Oyo, Seyi Makinde, ya karɓi jiragen leƙen asiri guda biyu da gwamnatinsa ta saya domin inganta tattara bayanan sirri da ƙarfafa tsarin tsaro a jihar.

Makinde ya bayyana cewa jiragen za su taimaka wajen sa ido kan manyan yankuna na jihar cikin sauri, domin tallafa wa jami'an tsaro wajen magance matsalolin rashin tsaro.

Kara karanta wannan

Tsohon IGP ya fallasa gwamnati, ya fadi abin da ya jawo lalacewar tsaron Najeriya

Punch ta rahoto cewa gwamnan ya yi wannan bayani ne bayan jiragen sun sauka a filin jirgin saman Ibadan ranar Talata.

Dalilin sayen jiragen Oyo

Makinde ya ce gwamnatin jihar ta yanke shawarar sayen jiragen ne saboda girman faɗin jihar Oyo da kuma buƙatar samun bayanan sirri ta sama cikin gaggawa.

Ya ce:

"Lokacin da muka yanke shawarar sayen waɗannan jiragen leƙen asiri, mun yi hakan ne saboda girman jihar Oyo. Mun san dole ne mu ƙara wa jami'an tsaro da ke ƙasa ƙarfi."

Ya ƙara da cewa ko da yake ba su hango wasu matsalolin tsaron da suka taso daga baya ba, sayen jiragen ya zama mataki mai amfani a lokacin da ya dace.

Batun hadin gwiwa da sojoji

A sakon da ya wallafa a X, gwamnan ya bayyana farin cikinsa da isowar jiragen, yana mai cewa za su fara aiki nan take domin kare rayuka da dukiyoyin al'umma.

Kara karanta wannan

Yaki da yunwa: Oluremi ta fadi yadda Tinubu ya tallafa wa yan kasa da abinci

Ya ce Rundunar Sojin Sama ta Najeriya (NAF) ce ta kawo jiragen zuwa Ibadan, kuma gwamnatin jihar ta rattaba hannu kan yarjejeniyar haɗin gwiwa da rundunar domin tabbatar da amfani da su yadda ya kamata.

Tun da farko, Kwamishinan Yaɗa Labarai na jihar Oyo, Dotun Oyelade, ya ce isowar jiragen ya cika alƙawarin da gwamnatin jihar ta ɗauka na inganta tsaro ta hanyar amfani da fasahar leƙen asiri ta sama.

Ya ƙara da cewa jiragen za su yi aiki tare da jami'an Amotekun da sauran hukumomin tsaro wajen sanya ido kan dazuka, iyakoki da wuraren da ake yawan samun matsalolin tsaro.

Najeriya za ta mallaki jirage

A wani labarin, mun ruwaito cewa Rundunar Sojin Sama ta Najeriya (NAF) ta samu gagarumar nasara bayan kammala gwajin karɓar jiragen yaƙi na M-346 guda uku a ƙasar Italiya.

Rundunar ta bayyana cewa an gudanar da gwajin ne tsakanin ranar 29 ga Yuni zuwa 9 ga Yulin 2026 tare da haɗin gwiwar Ma'aikatar Tsaro da kamfanin Leonardo.

NAF ta ce jiragen, masu lambobin NAF 01, NAF 02 da NAF 03, sun cika dukkan ƙa'idodin fasaha da aminci, kuma ana sa ran za a kawo su Najeriya domin fara aiki.

Asali: Legit.ng